ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਭਾਰਤ ਦੌਰੇ ’ਤੇ

ਕੈਨੇਡਾ ਨਾਲ ਕੂਟਨੀਤਿਕ ਵਿਵਾਦ ਵਿਚਕਾਰ ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਭਾਰਤ ਦੌਰੇ ’ਤੇ ਹਨ। 2018 ਵਿਚ ਅਹੁਦੇ ਦੀ ਸਹੁੰ ਚੁੱਕਣ ਤੋਂ ਬਾਅਦ ਇਹ ਉਨ੍ਹਾਂ ਦੀ ਤੀਜੀ ਭਾਰਤ ਯਾਤਰਾ ਹੈ।

ਸਕਾਟ ਮੋਅ ਭਾਰਤ ਨਾਲ ਸੂਬੇ ਦੇ ਵਪਾਰਕ ਰਿਸ਼ਤੇ ਮਜਬੂਤ ਕਰਨ ਲਈ ਉਥੇ ਪਹੁੰਚੇ ਹਨ। ਇਸ ਤੋਂ ਪਹਿਲਾਂ ਹਾਲ ਹੀ ਵਿਚ ਓਨਟਾਰੀਓ ਦੇ ਵਪਾਰ ਮੰਤਰੀ ਵਿਕਟਰ ਫੈਡੇਲੀ ਵੀ ਭਾਰਤ ਗਏ ਸਨ। ਬੀਤੇ ਕੱਲ੍ਹ ਸਸਕੈਚਵਨ ਦੇ ਪ੍ਰੀਮੀਅਰ ਵਲੋਂ ਨਵੀਂ ਦਿੱਲੀ ਵਿਚ ਵਿਦੇਸ਼ ਮੰਤਰੀ ਐੱਸ.ਜੈਸ਼ੰਕਰ ਨਾਲ ਮੁਲਾਕਾਤ ਕੀਤੀ ਗਈ।

ਸਕਾਟ ਮੋਅ ਨੇ ਇਸ ਦੌਰਾਨ ਕਿਹਾ ਕਿ ਸਸਕੈਚਵਨ ਭਾਰਤ ਦੇ ਨਾਲ ਕਈ ਸਾਲਾਂ ਤੋਂ ਕੰਮ ਕਰ ਰਿਹਾ ਹੈ ਅਤੇ ਅਸੀਂ ਜੋ ਰਿਸ਼ਤੇ ਬਣਾਏ ਨੇ ਉਸ ’ਤੇ ਉਨ੍ਹਾਂ ਨੂੰ ਮਾਣ ਹੈ। ਸਸਕੈਚਵਨ ਭਾਰਤ ਲਈ ਪੋਟਾਸ਼, ਦਾਲਾਂ ਅਤੇ ਯੂਰੇਨੀਅਮ ਦਾ ਮਹੱਤਵਪੂਰਨ ਸਪਲਾਇਰ ਹੈ।

ਪ੍ਰੀਮੀਅਰ ਦਾ ਕਹਿਣਾ ਹੈ ਕਿ ਸੂਬੇ ਦੀਆਂ ਹਜ਼ਾਰਾਂ ਨੌਕਰੀਆਂ ਨਿਰਯਾਤ ਬਾਜ਼ਾਰ ’ਤੇ ਨਿਰਭਰ ਹਨ। 2023 ਵਿਚ ਸੂਬੇ ਦਾ ਭਾਰਤ ਨੂੰ ਨਿਰਯਾਤ $1.3 ਬਿਲੀਅਨ ਤੋਂ ਵੱਧ ਰਿਹਾ ਹੈ। ਓਧਰ, ਸਸਕੈਚਵਨ ਦੀ ਵਿਰੋਧੀ ਧਿਰ ਐੱਨ.ਡੀ.ਪੀ. ਦੀ ਵਪਾਰ ਆਲੋਚਕ ਅਲਿਆਨਾ ਯੰਗ ਦੇ ਦੌਰੇ ਨੂੰ ਗੈਰ-ਜ਼ਰੂਰੀ ਕਰਾਰ ਦਿੱਤਾ ਅਤੇ ਕਿਹਾ ਕਿ ਲੱਗਦਾ ਹੈ ਕਿ ਸੂਬੇ ਦੇ ਗੰਭੀਰ ਮੁੱਦਿਆਂ ਨੂੰ ਹੱਲ ਕਰਨ ਲਈ ਸਰਕਾਰ ਆਪਣੇ ਪੈਰ ਜ਼ਮੀਨ ’ਤੇ ਲੰਬੇ ਸਮੇਂ ਤੱਕ ਨਹੀਂ ਰੱਖ ਸਕਦੀ।

ਉਨ੍ਹਾਂ ਹਰਦੀਪ ਸਿੰਘ ਨਿੱਝਰ ਦਾ ਮਾਮਲਾ ਉਠਾਉਂਦੇ ਹੋਏ ਇਹ ਵੀ ਕਿਹਾ ਕਿ ਭਾਰਤ ਸਸਕੈਚਵਨ ਲਈ ਮਹੱਤਵਪੂਰਨ ਵਪਾਰਕ ਭਾਈਵਾਲ ਹੈ ਪਰ ਕਿਸੇ ਵੀ ਕੈਨੇਡੀਅਨ ਨਾਗਰਿਕ ਦੀ ਹੱਤਿਆ ਦੀ ਹਰ ਪੱਧਰ ਦੀ ਸਰਕਾਰ ਨੂੰ ਚਿੰਤਾ ਕਰਨੀ ਚਾਹੀਦੀ ਹੈ।