ਐਬਟਸਫੋਰਡ ਲਰਨਿੰਗ ਸੈਂਟਰ ਅੱਗ ਲੱਗਣ ਕਾਰਨ ਕੀਤਾ ਗਿਆ ਬੰਦ, ਪੁਲਿਸ ਵਲੋਂ ਕੀਤੀ ਜਾ ਰਹੀ ਜਾਂਚ

ਐਬਟਸਫੋਰਡ ਸਥਿਤ ਬੇਕਰਵਿਊ ਸੈਂਟਰ ਫਾਰ ਲਰਨਿੰਗ ਸਕੂਲ ਵਿਚ ਅੱਜ ਤੜਕੇ ਅੱਗ ਲੱਗਣ ਦੀ ਘਟਨਾ ਵਾਪਰੀ। ਪੁਲਿਸ ਵਲੋਂ ਇਸ ਮਾਮਲੇ ਨੂੰ ਸ਼ੱਕੀ ਮੰਨਦਿਆਂ ਆਰਸਨ ਦੇ ਐਂਗਲ ਵਜੋਂ ਇਨਵੈਸਟੀਗੇਟ ਕੀਤਾ ਜਾ ਰਿਹਾ ਹੈ। ਐਬਟਸਫੋਰਡ ਪੁਲਿਸ ਡਿਪਾਰਟਮੈਂਟ ਅਨੁਸਾਰ, ਮਾਰਸ਼ਲ ਰੋਡ ਦੇ 32600 ਬਲੌਕ ਵਿਚ ਸਥਿਤ ਇਸ ਐਜੂਕੇਸ਼ਨ ਸੈਂਟਰ ਵਿਚ ਅੱਗ ਲੱਗਣ ਦੀ ਸੂਚਨਾ ਤੜਕੇ ਕਰੀਬ 3:45 ਵਜੇ ਮਿਲੀ।

ਫਾਇਰ ਫਾਈਟਰਜ਼ ਨੇ ਮੌਕੇ ’ਤੇ ਪਹੁੰਚ ਕੇ ਅੱਗ ’ਤੇ ਸਮੇਂ ਸਿਰ ਕਾਬੂ ਪਾ ਲਿਆ ਪਰ ਇਮਾਰਤ ਦੇ ਅੰਦਰੂਨੀ ਅਤੇ ਬਾਹਰੀ ਹਿੱਸੇ ਨੂੰ ਕੁਝ ਨੁਕਸਾਨ ਪਹੁੰਚਿਆ ਹੈ। ਉਥੇ ਹੀ, ਜਾਂਚ ਦੇ ਮੱਦੇਨਜ਼ਰ ਸ਼ਹਿਰ ਦੇ ਸਕੂਲ ਡਿਸਟ੍ਰਿਕ ਵੱਲੋਂ ਸੋਮਵਾਰ ਲਈ ਇਸ ਸਕੂਲ ਨੂੰ ਸਟੂਡੈਂਟ ਅਤੇ ਸਟਾਫ ਲਈ ਪੂਰੀ ਤਰ੍ਹਾਂ ਬੰਦ ਰੱਖਿਆ ਗਿਆ ਹੈ। ਇਹ ਐਜੂਕੇਸ਼ਨ ਸੈਂਟਰ 14 ਤੋਂ 65 ਸਾਲ ਦੀ ਉਮਰ ਦੇ ਲੋਕਾਂ ਲਈ ਇੱਕ ਸਕੈਂਡਰੀ ਸਕੂਲ ਹੈ।

ਸਕੂਲ ਦੀ ਵੈੱਬਸਾਈਟ 'ਤੇ ਇੱਕ ਨੋਟਿਸ ਵਿਚ ਕਿਹਾ ਗਿਆ ਹੈ, ਜੇਕਰ ਸਕੂਲ ਬੰਦ ਰੱਖਣ ਦਾ ਫੈਸਲਾ ਅੱਜ ਤੋਂ ਬਾਅਦ ਵੀ ਵਧਦਾ ਹੈ ਤਾਂ ਸਟਾਫ ਅਤੇ ਪਰਿਵਾਰਾਂ ਨੂੰ ਸੂਚਿਤ ਕੀਤਾ ਜਾਵੇਗਾ। ਇਨਵੈਸਟੀਗੇਟਰਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਨੂੰ ਇਸ ਸ਼ੱਕੀ ਅੱਗ ਬਾਰੇ ਕੋਈ ਜਾਣਕਾਰੀ ਹੈ ਤਾਂ ਉਸ ਨੂੰ ਐਬਟਸਫੋਰਡ ਪੁਲਿਸ ਨਾਲ ਤੁਰੰਤ ਸੰਪਰਕ ਕਰਨਾ ਚਾਹੀਦਾ ਹੈ।