19.36C Vancouver 19.36C VancouverApr 29, 2024 12:57 PM - The Associated Press
ਸਕਾਟਲੈਂਡ ਦੇ ਪਹਿਲੇ ਮੁਸਿਲਮ ਪ੍ਰਧਾਨ ਮੰਤਰੀ ਹਮਜ਼ਾ ਯੂਸਫ਼ ਨੇ ਅਸਤੀਫਾ ਦੇ ਦਿੱਤਾ ਹੈ। ਲਗਭਗ ਇੱਕ ਸਾਲ ਪਹਿਲਾਂ ਹੀ ਉਹ ਸਕਾਟਿਸ਼ ਨੈਸ਼ਨਲ ਪਾਰਟੀ ਦੇ ਲੀਡਰ ਚੁਣੇ ਗਏ ਸਨ। ਪਾਕਿਸਤਾਨ ਮੂਲ ਦੇ ਲੀਡਰ ਹਮਜ਼ਾ ਯੂਸਫ਼ ਨੇ ਕਿਹਾ ਕਿ ਜਦੋਂ ਤੱਕ ਪਾਰਟੀ ਨੂੰ ਨਵਾਂ ਪ੍ਰਧਾਨ ਨਹੀਂ ਮਿਲ ਜਾਂਦਾ ਉਦੋਂ ਤੱਕ ਉਹ ਇਸ ਅਹੁਦੇ ’ਤੇ ਬਣੇ ਰਹਿਣਗੇ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਪਾਰਟੀ ਦੇ ਰਾਸ਼ਟਰੀ ਸਕੱਤਰ ਨੂੰ ਲੀਡਰਸ਼ਿਪ ਚੋਣ ਜਲਦ ਤੋਂ ਜਲਦ ਸ਼ੁਰੂ ਕਰਨ ਲਈ ਕਿਹਾ ਹੈ। ਹਮਜ਼ਾ ਯੂਸਫ਼ ਦਾ ਅਸਤੀਫਾ ਉਸ ਸਮੇਂ ਆਇਆ ਹੈ ਜਦੋਂ ਉਹ ਸੰਸਦ ਵਿਚ ਦੋ ਅਵਿਸ਼ਵਾਸ ਮਤਿਆਂ ਦਾ ਸਾਹਮਣਾ ਕਰ ਰਹੇ ਸਨ। ਉਨ੍ਹਾਂ ਦੀ ਪਾਰਟੀ ਨੂੰ ਸਮਰਥਨ ਦੇਣ ਵਾਲੀ ਗ੍ਰੀਨਸ ਪਾਰਟੀ ਨੇ ਇਹ ਸਾਫ ਕਰ ਦਿੱਤਾ ਸੀ ਕਿ ਉਹ ਯੂਸਫ ਖਿਲਾਫ ਨੋ ਕੋਨਫੀਡੈਂਸ ਮੋਸ਼ਨ ਯਾਨੀ ਅਵਿਸ਼ਵਾਸ ਮਤੇ ਦੇ ਪੱਖ ਵਿਚ ਵੋਟ ਕਰੇਗੀ।
ਦੋਹਾਂ ਪਾਰਟੀਆਂ ਵਿਚਕਾਰ ਤਣਾਅ ਦੀ ਮੁੱਖ ਵਜ੍ਹਾ ਕਲਾਈਮੇਟ ਚੇਂਜ ਪੌਲਿਸੀ ਸੀ। ਗੌਰਤਲਬ ਹੈ ਕਿ ਹਮਜ਼ਾ ਯੂਸਫ਼ ਨੇ 2012 ਤੋਂ ਸਕਾਟਿਸ਼ ਸਰਕਾਰ ਵਿਚ ਕਈ ਮੰਤਰੀ ਅਹੁਦਿਆਂ ’ਤੇ ਕੰਮ ਕੀਤਾ ਹੈ। ਸਕਾਟਿਸ਼ ਨੈਸ਼ਨਲ ਪਾਰਟੀ ਬ੍ਰਿਟੇਨ ਦੀ ਸਭ ਤੋਂ ਪ੍ਰਭਾਵਸ਼ਾਲੀ ਅਤੇ ਪ੍ਰਮੁੱਖ ਸਿਆਸੀ ਪਾਰਟੀ ਰਹੀ ਹੈ।
