ਸ਼ੌਨ ਫਰੇਜ਼ਰ ਨਹੀਂ ਲੜਨਗੇ ਅਗਲੀਆਂ ਫੈਡਰਲ ਚੋਣਾਂ

ਕੈਨੇਡਾ ਦੇ ਸਾਬਕਾ ਇਮੀਗ੍ਰੇਸ਼ਨ ਮਿਨਿਸਟਰ ਸ਼ੌਨ ਫਰੇਜ਼ਰ ਅਗਲੀਆਂ ਫੈਡਰਲ ਚੋਣਾਂ ਨਹੀਂ ਲੜਨਗੇ, ਉਨ੍ਹਾਂ ਅੱਜ ਔਟਵਾ ਵਿਚ ਇਸ ਦੀ ਘੋਸ਼ਣਾ ਕੀਤੀ। ਫਰੇਜ਼ਰ ਨੇ ਕਿਹਾ ਕਿ ਉਹ ਫੈਡਰਲ ਸਿਆਸਤ ਵਿਚ ਰਹਿੰਦਿਆਂ ਪਰਿਵਾਰ ਨੂੰ ਸਮਾਂ ਨਹੀਂ ਦੇ ਪਾ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਵਲੋਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਪਹਿਲਾਂ ਹੀ ਇਸ ਦੀ ਜਾਣਕਾਰੀ ਦੇ ਦਿੱਤੀ ਗਈ ਸੀ।

ਗੌਰਤਲਬ ਹੈ ਕਿ ਫਰੇਜ਼ਰ ਸਮੇਤ ਹੁਣ ਤੱਕ ਟਰੂਡੋ ਕੈਬਨਿਟ ਦੇ 6 ਮਿਨਿਸਟਰਸ ਦੁਬਾਰਾ ਚੋਣਾਂ ਨਾ ਲੜਨ ਦੀ ਘੋਸ਼ਣਾ ਕਰ ਚੁੱਕੇ ਹਨ। ਸ਼ੌਨ ਫਰੇਜ਼ਰ 2015 ਤੋਂ ਹਾਊਸ ਆਫ ਕਾਮਨਜ਼ ਵਿਚ ਨੋਵਾ ਸਕੋਸ਼ੀਆ ਦੀ ਸੈਂਟਰਲ ਨੋਵਾ ਰਾਈਡਿੰਗ ਦੀ ਨੁਮਾਇੰਦਗੀ ਕਰ ਰਹੇ ਸਨ।

ਇਹ ਉਹ ਸਮਾਂ ਸੀ ਜਦੋਂ ਟਰੂਡੋ ਸਰਕਾਰ ਪਹਿਲੀ ਵਾਰ ਸੱਤਾ ਵਿਚ ਆਈ ਸੀ। ਫਰੇਜ਼ਰ ਨੂੰ 2021 ਵਿਚ ਲਿਬਰਲਸ ਦੀ ਮੁੜ ਜਿੱਤ ਮਗਰੋਂ ਇਮੀਗ੍ਰੇਸ਼ਨ ਮਿਨਿਸਟਰ ਨਿਯਕੁਤ ਕੀਤਾ ਗਿਆ ਸੀ।

ਉਹ ਇਮੀਗ੍ਰੇਸ਼ਨ ਅਤੇ ਹਾਊਸਿੰਗ ਸੰਕਟ ਨੂੰ ਲੈ ਕੇ ਕੰਜ਼ਰਵੇਟਿਵ ਦੇ ਲਗਾਤਾਰ ਨਿਸ਼ਾਨੇ ’ਤੇ ਸਨ। ਹਾਲਾਂਕਿ ਉਨ੍ਹਾਂ ਨੂੰ ਲਿਬਰਲਸ ਦਾ ਮਜਬੂਤ ਕਮਿਊਨੀਕੇਟਰ ਅਤੇ ਉਭਰਦੇ ਸਿਤਾਰੇ ਮੰਨਿਆ ਜਾਂਦਾ ਸੀ।