ਸ਼ੈਰੀਡਨ ਕਾਲਜ ਨੇ ਅਨੁਮਾਨਿਤ ਦਾਖਲਾ ਗਿਰਾਵਟ ਦੇ ਵਿਚਕਾਰ ਪ੍ਰੋਗਰਾਮਾਂ ਨੂੰ ਕੀਤਾ ਮੁਅੱਤਲ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਸਰਕਾਰ ਵਲੋਂ ਇੰਟਰਨੈਸ਼ਨਲ ਸਟੂਡੈਂਟਸ ’ਤੇ ਲਗਾਈ ਗਈ ਕੈਪ ਕਾਰਨ ਕੈਨੇਡੀਅਨ ਕਾਲਜ ਨੇ ਵਿੱਦਿਅਕ ਪ੍ਰੋਗਰਾਮ ਵਿਚ ਕਟੌਤੀ ਸ਼ੁਰੂ ਕਰ ਦਿੱਤੀ ਹੈ। ਓਨਟਾਰੀਓ ਦੇ ਸ਼ੈਰੀਡਨ ਕਾਲਜ ਨੇ ਸਟੂਡੈਂਟਸ ਦੇ ਦਾਖਲੇ ਵਿਚ ਅਨੁਮਾਨਿਤ ਗਿਰਾਵਟ ਦਾ ਹਵਾਲਾ ਦਿੰਦੇ ਐਨੀਮੇਸ਼ਨ, ਆਰਟਸ ਅਤੇ ਡਿਜ਼ਾਈਨ ਫੈਕਲਟੀ ਦੇ 6 ਪ੍ਰੋਗਰਾਮ ਸਮੇਤ 40 ਅਕਾਦਮਿਕ ਪ੍ਰੋਗਰਾਮ ਸਸਪੈਂਡ ਕਰ ਦਿੱਤੇ ਹਨ।

ਕਾਲਜ ਸਟਾਫ ਦੀ ਗਿਣਤੀ ਵਿਚ ਵੀ ਕਟੌਤੀ ਕਰ ਰਿਹਾ ਹੈ। ਸ਼ੈਰੀਡਨ ਕਾਲਜ ਦਾ ਕਹਿਣਾ ਹੈ ਕਿ ਉਸ ਨੇ ਅਗਲੇ ਸਾਲ ਸਟੂਡੈਂਟਸ ਦੀ ਗਿਣਤੀ ਵਿਚ 30 ਫੀਸਦੀ ਗਿਰਾਵਟ ਦਾ ਅਨੁਮਾਨ ਲਗਾਇਆ ਹੈ, ਜਿਸ ਕਾਰਨ ਉਸ ਨੂੰ $112 ਮਿਲੀਅਨ ਦਾ ਮਾਲੀਆ ਨੁਕਸਾਨ ਹੋਵੇਗਾ। ਕਾਲਜ ਵਲੋਂ ਸਸਪੈਂਡ ਕੀਤੇ ਜਾ ਰਹੇ ਪ੍ਰੋਗਰਾਮ ਵਿਚ 13 ਕਾਰੋਬਾਰੀ ਪ੍ਰੋਗਰਾਮ ਵੀ ਸ਼ਾਮਲ ਹਨ।

ਹਾਲਾਂਕਿ, ਜਿਹੜੇ ਸਟੂਡੈਂਟਸ ਇਸ ਸਮੇਂ ਇਨ੍ਹਾਂ ਪ੍ਰੋਗਰਾਮਾਂ ਵਿਚ ਦਾਖਲ ਹਨ ਉਨ੍ਹਾਂ ਦੀ ਡਿਗਰੀ ਪ੍ਰਭਾਵਿਤ ਨਹੀਂ ਹੋਵੇਗੀ। ਕਾਲਜ ਨੇ ਇਹ ਵੀ ਕਿਹਾ ਹੈ ਕਿ ਉਹ 27 ਹੋਰ ਪ੍ਰੋਗਰਾਮ ਦਾ ਕੁਸ਼ਲਤਾ ਦੀ ਸਮੀਖਿਆ ਵੀ ਕਰੇਗਾ। ਸ਼ੈਰੀਡਨ ਕਾਲਜ ਦੇ ਕੈਂਪਸ ਬਰੈਂਪਟਨ, ਮਿਸੀਸਾਗਾ ਅਤੇ ਓਕਵਿਲ ਵਿਚ ਹਨ, ਇਸ ਦਾ ਕਹਿਣਾ ਹੈ ਕਿ ਕੁਝ ਪ੍ਰੋਗਰਾਮ ਦਾ ਮਈ ਵਿਚ ਸਸਪੈਨਸ਼ਨ ਸ਼ੁਰੂ ਹੋ ਜਾਵੇਗਾ।