ਕੈਨੇਡਾ ਦੇ ਸਿੱਖ ਭਾਈਚਾਰੇ ਨੇ ਕਿਊਬੈਕ ਦੇ ਬਿੱਲ 21 ਕੇਸ ਦੀ ਸੁਣਵਾਈ ਦੇ ਸੁਪਰੀਮ ਕੋਰਟ ਦੇ ਫੈਸਲੇ ਦਾ ਕੀਤਾ ਸਵਾਗਤ

ਕੈਨੇਡਾ ਦੇ ਸਿੱਖ ਭਾਈਚਾਰੇ ਨੇ ਸੁਪਰੀਮ ਕੋਰਟ ਵਲੋਂ ਕਿਊਬੈਕ ਦੇ ਬਿੱਲ-21 ਖਿਲਾਫ ਸੁਣਵਾਈ ਲਈ ਸਹਿਮਤ ਹੋਣ ਦਾ ਸਵਾਗਤ ਕੀਤਾ ਹੈ। ਇਸ ਮਾਮਲੇ ਵਿਚ ਵਰਲਡ ਸਿੱਖ ਆਰਗੇਨਾਈਜੇਸ਼ਨ ਆਫ ਕੈਨੇਡਾ ਅਤੇ ਕਿਊਬੈਕ ਦੀ ਸਿੱਖਿਅਕ ਅੰਮ੍ਰਿਤ ਕੌਰ ਵੀ ਅਪੀਲਕਰਤਾ ਹਨ। ਅੰਮ੍ਰਿਤ ਕੌਰ ਇੱਕ ਗੁਰਸਿੱਖ ਹਨ, ਉਨ੍ਹਾਂ ਨੂੰ ਕਿਊਬੈਕ ਦੇ ਇਸ ਵਿਵਾਦਤ ਬਿੱਲ ਕਾਰਨ ਸੂਬਾ ਛੱਡਣ ਲਈ ਮਜਬੂਰ ਹੋਣਾ ਪਿਆ ਸੀ।

ਇਹ ਕਾਨੂੰਨ ਸਿਵਿਲ ਸਰਵੈਂਟਸ, ਅਧਿਆਪਕਾਂ, ਪੁਲਿਸ ਅਫ਼ਸਰਾਂ, ਸਰਕਾਰੀ ਵਕੀਲਾਂ ਅਤੇ ਕਈ ਹੋਰ ਸਰਕਾਰੀ ਮੁਲਾਜ਼ਮਾਂ ਲਈ ਆਪਣੇ ਕੰਮ ਕਾਜ ਦੀਆਂ ਥਾਂਵਾਂ ’ਤੇ ਧਾਰਮਮਿਕ ਚਿੰਨ੍ਹ ਪਹਿਨਣ ਦੀ ਪਾਬੰਦੀ ਲਗਾਉਂਦਾ ਹੈ।

ਡਬਲਯੂ.ਐਸ.ਓ. ਦੇ ਪ੍ਰਧਾਨ ਦਾਨਿਸ਼ ਸਿੰਘ ਨੇ ਕਿਹਾ ਕਿ ਬਿੱਲ-21 ਨੇ ਅੰਮ੍ਰਿਤ ਕੌਰ ਵਰਗੇ ਵਿਅਕਤੀਆਂ ਨੂੰ ਆਪਣੇ ਧਰਮ ਅਤੇ ਆਪਣੇ ਪੇਸ਼ੇ ਵਿਚੋਂ ਇੱਕ ਦੀ ਚੋਣ ਕਰਨ ਲਈ ਮਜਬੂਰ ਕੀਤਾ, ਇੱਕ ਅਜਿਹੇ ਦੇਸ਼ ਵਿਚ ਜੋ ਮੌਲਿਕ ਅਧਿਕਾਰਾਂ ਦੀ ਰੱਖਿਆ ਲਈ ਵਚਨਬੱਧ ਹੈ।

ਉਨ੍ਹਾਂ ਕਿਹਾ ਕਿ ਅਸੀਂ ਸੁਪਰੀਮ ਕੋਰਟ ਆਫ ਕੈਨੇਡਾ ਦੇ ਫੈਸਲੇ ਦਾ ਸਵਾਗਤ ਕਰਦੇ ਹਾਂ ਜੋ ਇਸ ਮਾਮਲੇ ਵਿਚ ਸੁਣਵਾਈ ਲਈ ਸਹਿਮਤ ਹੋਇਆ। ਡਬਲਯੂ.ਐਸ.ਓ. ਨੇ ਕਿਹਾ ਕਿ ਅਸੀਂ ਬਿੱਲ 21 ਤੋਂ ਪ੍ਰਭਾਵਿਤ ਸਾਰੇ ਲੋਕਾਂ ਨਾਲ ਇਕਜੁੱਟਤਾ ਵਿਚ ਖੜ੍ਹੇ ਹਾਂ ਅਤੇ ਉਨ੍ਹਾਂ ਵਲੋਂ ਵਕਾਲਤ ਕਰਨਾ ਜਾਰੀ ਰੱਖਾਂਗੇ।