14.89C Vancouver 14.89C VancouverMar 23, 2026 6:31 PM - Connect Newsroom - Jasmine Singh
ਪੀਲ ਰੀਜਨਲ ਪੁਲਿਸ ਨੇ ਜੀ.ਟੀ. ਏ.ਵਿਚ ਸਰਗਰਮ ਇੱਕ ਹਿੰਸਕ ਕਾਰਜੈਕਿੰਗ ਨੈੱਟਵਰਕ ਦਾ ਪਰਦਾਫਾਸ਼ ਕੀਤਾ ਹੈ, ਜੋ ਮਹਿੰਗੀਆਂ ਗੱਡੀਆਂ ਖੋਹ ਕੇ ਉਨ੍ਹਾਂ ਨੂੰ ਅਫਰੀਕਾ ਸਮਗਲ ਕਰਦਾ ਸੀ। ਸੋਮਵਾਰ ਨੂੰ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਪੀਲ ਪੁਲਿਸ ਮੁੱਖ ਨਿਸ਼ਾਨ ਦੁਰਈਅੱਪਾ ਨੇ ਦੱਸਿਆ ਕਿ ਇਸ ਮਾਮਲੇ ਵਿਚ 6 ਸ਼ੱਕੀਆਂ ਨੂੰ ਗ੍ਰਿਫ਼ਤਾਰ ਕਰਕੇ ਉਨ੍ਹਾਂ 'ਤੇ 30 ਚਾਰਜਿਸ ਲਗਾਏ ਗਏ ਹਨ।
ਇਸ ਜਾਂਚ ਨੂੰ ਪ੍ਰੋਜੈਕਟ ਸਟ੍ਰੈਟਿਸ ਦਾ ਨਾਂ ਦਿੱਤਾ ਗਿਆ ਸੀ, ਜੋ 18 ਜਨਵਰੀ ਤੋਂ 1 ਫਰਵਰੀ ਦਰਮਿਆਨ ਹੋਈਆਂ ਕਈ ਹਥਿਆਰਬੰਦ ਕਾਰਜੈਕਿੰਗ ਦੀਆਂ ਘਟਨਾਵਾਂ ਤੋਂ ਬਾਅਦ ਸ਼ੁਰੂ ਕੀਤੀ ਗਈ ਸੀ। ਜਾਂਚ ਵਿਚ ਸਾਹਮਣੇ ਆਇਆ ਕਿ ਇਹ ਗਿਰੋਹ ਖਾਸ ਤੌਰ 'ਤੇ ਮਰਸੀਡੀਜ਼-ਬੈਂਜ਼ ਵਰਗੀਆਂ ਲਗਜ਼ਰੀ ਗੱਡੀਆਂ ਨੂੰ ਨਿਸ਼ਾਨਾ ਬਣਾਉਂਦਾ ਸੀ। ਇਨ੍ਹਾਂ ਗੱਡੀਆਂ ਦੇ ਵਾਹਨ ਪਛਾਣ ਨੰਬਰ ਬਦਲ ਕੇ ਇਨ੍ਹਾਂ ਨੂੰ ਵੇਚਣ ਲਈ ਘਾਨਾ ਭੇਜਿਆ ਜਾਂਦਾ ਸੀ।
ਪੁਲਿਸ ਅਨੁਸਾਰ, ਗ੍ਰਿਫ਼ਤਾਰ ਕੀਤੇ ਦੋ ਸ਼ੱਕੀ ਉਸ ਵੇਲੇ ਕਾਬੂ ਕੀਤੇ ਗਏ ਜਦੋਂ ਉਹ ਟੋਰਾਂਟੋ ਪੀਅਰਸਨ ਇੰਟਰਨੈਸ਼ਨਲ ਏਅਰਪੋਰਟ ਤੋਂ ਘਾਨਾ ਜਾਣ ਲਈ ਫਲਾਈਟ ਫੜਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਹੁਣ ਤੱਕ ਪੁਲਿਸ ਨੇ 8 ਗੱਡੀਆਂ ਬਰਾਮਦ ਕੀਤੀਆਂ ਹਨ, ਜੋ ਕਿ ਸਟੋਰੇਜ ਲਾਕਰ, ਆਟੋ ਬਾਡੀ ਸ਼ਾਪ ਅਤੇ ਸਮੁੰਦਰੀ ਕੰਟੇਨਰਜ਼ ਵਿਚ ਲੁਕਾ ਕੇ ਰੱਖੀਆਂ ਗਈਆਂ ਸਨ, ਇਹਨਾਂ ਦੀ ਕੁੱਲ ਕੀਮਤ ਲਗਭਗ $800,000 ਦੱਸੀ ਜਾ ਰਹੀ ਹੈ।
