ਕੈਮਲੂਪਸ ਵਿੱਚ ਪੁਲਿਸ ਨੇ ਕਾਰ ਵਿਚੋਂ ਜ਼ਬਤ ਕੀਤੇ ਕਈ ਹਥਿਆਰ ਅਤੇ ਨਸ਼ੀਲੇ ਪਦਾਰਥ

ਬੀ.ਸੀ. ਦੇ ਕੈਮਲੂਪਸ ਵਿਚ ਪਾਰਕ ਕੀਤੀ ਗਈ ਇੱਕ ਕਾਰ ਵਿਚੋਂ ਸੋਮਵਾਰ ਪੁਲਿਸ ਨੇ ਕਈ ਹਥਿਆਰ ਅਤੇ ਨਸ਼ੀਲੇ ਪਦਾਰਥ ਜ਼ਬਤ ਕੀਤੇ ਹਨ। ਪੁਲਿਸ ਮੁਤਾਬਕ ਉਨ੍ਹਾਂ ਨੂੰ ਤੜਕੇ ਕਰੀਬ 2.30 ਵਜੇ ਸੂਚਨਾ ਮਿਲੀ ਸੀ ਕਿ ਕੋਲੰਬੀਆ ਸਟ੍ਰੀਟ ਦੇ 500-ਬਲਾਕ ਵਿਚ ਨੀਂਦ ਵਿਚ ਵਿਅਕਤੀ ਡਰਾਈਵ ਕਰ ਰਿਹਾ ਹੈ। ਜਦ ਔਫੀਸਰਜ਼ ਇੱਥੇ ਜਾਂਚ ਕਰਨ ਆਏ ਤਾਂ ਉਨ੍ਹਾਂ ਨੂੰ ਕਾਰ ਵਿਚ ਕਈ ਹਥਿਆਰ ਮਿਲੇ।

ਜਾਂਚ ਵਿਚ ਉਨ੍ਹਾਂ ਨੇ ਇੱਥੋਂ ਭਰੀ ਹੋਈ ਹੈਂਡਗਨ, ਰਾਈਫਲ, ਮੈਗਜ਼ੀਨ, 1.5 ਕਿਲੋ ਸ਼ੱਕੀ ਫੈਂਟਾਨਾਇਲ ਅਤੇ 85 ਗ੍ਰਾਮ ਕੋਕੀਨ ਜ਼ਬਤ ਕੀਤੀ ਅਤੇ 30 ਸਾਲਾ ਡਰਾਈਵਰ ਨੂੰ ਹਿਰਾਸਤ ਵਿਚ ਲੈ ਲਿਆ। ਬਾਅਦ ਵਿਚ ਉਸ ਨੂੰ ਰਿਹਾਅ ਕਰ ਦਿੱਤਾ ਗਿਆ ਅਤੇ ਉਸ ’ਤੇ ਚਾਰਜਿਜ਼ ਲੱਗਣੇ ਬਾਕੀ ਹਨ।

ਇਸ ਸਬੰਧੀ ਅਜੇ ਵਧੇਰੇ ਜਾਣਕਾਰੀ ਸਾਹਮਣੇ ਨਹੀਂ ਆਈ। ਪੁਲਿਸ ਨੇ ਕਿਹਾ ਕਿ ਜੇਕਰ ਕਿਸੇ ਕੋਲ ਇਸ ਸਬੰਧੀ ਕੋਈ ਜਾਣਕਾਰੀ ਹੋਵੇ ਤਾਂ ਉਹ ਪੁਲਿਸ ਨੂੰ ਦੱਸ ਕੇ ਮਦਦ ਕਰ ਸਕਦਾ ਹੈ।