ਐਲਬਰਟਾ ਸਰਕਾਰ ਨੇ ਆਪਣੇ ਨਵੇਂ ਹੈਲਥ ਸਿਸਟਮ ਦਾ ਕਾਨੂੰਨੀ ਕੰਮ ਕੀਤਾ ਪੂਰਾ, 2026 ਵਿੱਚ ਲੋਕਾਂ ਨੂੰ ਹੋਣਗੇ ਇਸ ਦੇ ਫਾਇਦੇ

ਐਲਬਰਟਾ ਸਰਕਾਰ ਨੇ ਆਪਣੇ ਨਵੇਂ ਹੈਲਥ ਸਿਸਟਮ ਦਾ ਕਾਨੂੰਨੀ ਕੰਮ ਪੂਰਾ ਕਰ ਲਿਆ ਹੈ। ਪ੍ਰੀਮੀਅਰ ਡੈਨੀਅਲ ਸਮਿਥ ਦਾ ਕਹਿਣਾ ਹੈ ਕਿ ਹੁਣ 2026 ਵਿੱਚ ਲੋਕਾਂ ਨੂੰ ਇਸ ਦੇ ਫਾਇਦੇ ਦਿਖਾਈ ਦੇਣਗੇ। ਸੂਬੇ ਵਿਚ ਐਲਬਰਟਾ ਹੈਲਥ ਸਰਵਿਸਸ ਦੀ ਥਾਂ ਚਾਰ ਨਵੀਆਂ ਏਜੰਸੀਆਂ ਗੰਭੀਰ ਦੇਖਭਾਲ, ਨਿਰੰਤਰ ਦੇਖਭਾਲ, ਮਾਨਸਿਕ ਸਿਹਤ ਅਤੇ ਨਸ਼ਾ ਅਤੇ ਪ੍ਰਾਈਮਰੀ ਹੈਲਥ ਨੇ ਲੈ ਲਈ ਹੈ।

ਸਰਕਾਰ ਇਕ ਅਜਿਹਾ ਆਨਲਾਈਨ ਡੈਸ਼ਬੋਰਡ ਬਣਾਏਗੀ ਜਿੱਥੇ ਲੋਕ ਖੁਦ ਦੇਖ ਸਕਣਗੇ ਕਿ ਐਮਰਜੈਂਸੀ ਰੂਮ ਅਤੇ ਸਰਜਰੀਆਂ ਲਈ ਉਡੀਕ ਦਾ ਸਮਾਂ ਘੱਟ ਰਿਹਾ ਹੈ ਜਾਂ ਨਹੀਂ। ਨਰਸ ਪ੍ਰੈਕਟੀਸ਼ਨਰਾਂ ਨੂੰ ਆਪਣੇ ਕਲੀਨਿਕ ਖੋਲ੍ਹਣ ਦੀ ਇਜਾਜ਼ਤ ਦਿੱਤੀ ਗਈ ਹੈ ਤਾਂ ਜੋ ਵੱਧ ਤੋਂ ਵੱਧ ਲੋਕਾਂ ਨੂੰ ਫੈਮਿਲੀ ਡਾਕਟਰ ਵਰਗੀ ਸਹੂਲਤ ਮਿਲ ਸਕੇ। ਹੁਣ ਸਿਹਤ ਸਿਸਟਮ ਦੀ ਹਰ ਚੰਗੀ-ਮਾੜੀ ਗੱਲ ਲਈ ਉਹ ਖੁਦ ਪੂਰੀ ਜ਼ਿੰਮੇਵਾਰੀ ਲੈਣਗੇ।

ਵਿਰੋਧੀ ਧਿਰ ਐਨ.ਡੀ.ਪੀ. ਦੇ ਨੇਤਾ ਨਾਹੀਦ ਨੈਨਸ਼ੀ ਨੇ ਇਸ ਬਦਲਾਅ ਨੂੰ ਹਫੜਾ-ਦਫੜੀ ਦੱਸਿਆ ਹੈ। ਉਨ੍ਹਾਂ ਮੁਤਾਬਕ ਕਿਸੇ ਵੀ ਅਲਬਰਟਾਵਾਸੀ ਨੂੰ ਇਹ ਨਹੀਂ ਲੱਗਦਾ ਕਿ ਸਿਸਟਮ ਪਹਿਲਾਂ ਨਾਲੋਂ ਬਿਹਤਰ ਹੋਇਆ ਹੈ।ਸਮਿਥ ਸਰਕਾਰ 'ਤੇ ਭ੍ਰਿਸ਼ਟਾਚਾਰ ਦੇ ਦੋਸ਼ ਵੀ ਲੱਗੇ ਹਨ, ਜਿਸ ਕਾਰਨ ਕੈਬਨਿਟ ਮੰਤਰੀ ਪੀਟਰ ਗਥਰੀ ਨੇ ਅਸਤੀਫ਼ਾ ਦੇ ਦਿੱਤਾ ਸੀ।