24.24C Vancouver 24.24C VancouverDec 15, 2023 5:31 PM - The Canadian Press
ਸਪੀਕਰ ਗ੍ਰੇਗ ਫਰਗਸ ਨੇ ਵੀਡੀਓ ਵਿਵਾਦ ਮਾਮਲੇ ਵਿੱਚ ਸ਼ੁੱਕਰਵਾਰ ਨੂੰ ਫਿਰ ਤੋਂ ਮੁਆਫ਼ੀ ਮੰਗ ਲਈ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਗੰਭੀਰ ਗਲਤੀ ਕੀਤੀ, ਮੈਨੂੰ ਕਦੇ ਵੀ ਇਹ ਵੀਡੀਓ ਸਪੀਕਰ ਦੀ ਪੋਸ਼ਾਕ ਵਿੱਚ, ਸਪੀਕਰ ਦੇ ਦਫ਼ਤਰ ਤੋਂ ਆਪਣੇ ਦੋਸਤ ਅਤੇ ਸਰਗਰਮ ਸਿਆਸਤਦਾਨ ਲਈ ਰਿਕਾਰਡ ਨਹੀਂ ਕਰਨੀ ਚਾਹੀਦੀ ਸੀ।
ਹਾਊਸ ਆਫ ਕਾਮਨਜ਼ ਨੂੰ ਸੰਬੋਧਨ ਵਿੱਚ ਉਨ੍ਹਾਂ ਕਿਹਾ ਮੈਨੂੰ ਬਹੁਤ ਅਫ਼ਸੋਸ ਹੈ। ਮੈਂ ਮੈਂਬਰਾਂ ਨੂੰ ਭਰੋਸਾ ਦਿਵਾਉਣਾ ਚਾਹੁੰਦਾ ਹਾਂ ਕਿ ਅਜਿਹਾ ਕਦੇ ਵੀ ਦੁਬਾਰਾ ਨਹੀਂ ਹੋਵੇਗਾ। ਗੌਰਤਲਬ ਹੈ ਕਿ ਓਨਟੇਰੀਓ ਲਿਬਰਲ ਪਾਰਟੀ ਦੇ ਸਮਾਗਮ ਵਿੱਚ ਉਨ੍ਹਾਂ ਦੀ 105 ਸੈਕਿੰਡ ਦਾ ਵੀਡੀਓ ਸੰਦੇਸ਼ ਦਿਖਾਏ ਜਾਣ ਤੋਂ ਬਾਅਦ ਫਰਗਸ ਇਸ ਮਹੀਨੇ ਦੇ ਸ਼ੁਰੂ ਤੋਂ ਹੀ ਵਿਵਾਦਾਂ ਵਿੱਚ ਸਨ।
ਇਹ ਵੀਡੀਓ ਸੰਦੇਸ਼ ਉਨ੍ਹਾਂ ਨੇ ਆਪਣੇ ਪੁਰਾਣੇ ਦੋਸਤ ਜੌਨ ਫਰੇਜ਼ਰ ਲਈ ਜਾਰੀ ਕੀਤਾ ਸੀ, ਜਿਨ੍ਹਾਂ ਦੀ ਉਸ ਦਿਨ ਓਨਟੇਰੀਓ ਲਿਬਰਲ ਦੇ ਅੰਤਰਿਮ ਨੇਤਾ ਵਜੋਂ ਵਿਦਾਈ ਹੋਈ ਸੀ। ਇਸ ਘਟਨਾ ਦੀ ਜਾਂਚ ਕਰਨ ਵਾਲੀ ਸੰਸਦੀ ਕਮੇਟੀ ਨੇ ਬੀਤੇ ਕੱਲ ਆਪਣੀ ਰਿਪੋਰਟ ਵਿੱਚ ਫਰਗਸ ਨੂੰ ਹਾਊਸ ਵਿੱਚ ਦੁਬਾਰਾ ਮੁਆਫ਼ੀ ਮੰਗਣ ਲਈ ਕਿਹਾ ਸੀ।
ਕਮੇਟੀ ਵਿੱਚ ਸ਼ਾਮਲ ਕੰਜ਼ਰਵੇਟਿਵ ਅਤੇ ਬਲਾਕ ਕਿਊਬੈਕਵਾ ਦੇ ਐਮ.ਪੀ ਨੇ ਫਰਗਸ ਦੇ ਅਸਤੀਫੇ ਦੀ ਮੰਗ ਕੀਤੀ ਸੀ ਪਰ ਲਿਬਰਲਸ ਅਤੇ ਨਿਊ ਡੈਮੋਕਰੇਟਸ ਦਾ ਬਹੁਮਤ ਹੋਣ ਕਰਕੇ ਵਿਰੋਧੀ ਦਲਾਂ ਦੀ ਇਹ ਮੰਗ ਪੂਰੀ ਨਹੀਂ ਹੋ ਸਕੀ।
