ਸਪੀਕਰ ਨੇ ਗੈਰ-ਸੰਸਦੀ ਟਿੱਪਣੀਆਂ ’ਤੇ ਪੋਲੀਵਰੇ ਨੂੰ ਹਾਊਸ ਆਫ਼ ਕਾਮਨਜ਼ ਤੋਂ ਕੱਢਿਆ ਬਾਹਰ

ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਵਲੋਂ ਹਾਊਸ ਆਫ ਕਾਮਨਜ਼ ਵਿਚ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਲਈ ਵਾਕੋ ਅਤੇ ਕੱਟੜਪੰਥੀ ਵਰਗੇ ਸ਼ਬਦਾਂ ਦੀ ਵਰਤੋਂ ਕੀਤੇ ਜਾਣ ’ਤੇ ਸਪੀਕਰ ਗ੍ਰੇਗ ਫਰਗਸ ਨੇ ਵਿਰੋਧੀ ਧਿਰ ਦੇ ਲੀਡਰ ਨੂੰ ਪ੍ਰਸ਼ਨ ਪੀਰੀਅਡ ਦੌਰਾਨ ਹਾਊਸ ਆਫ ਕਾਮਨਜ਼ ਤੋਂ ਬਾਹਰ ਕੱਢ ਦਿੱਤਾ।

ਸਪੀਕਰ ਵਲੋਂ ਪੋਲੀਵਰੇ ਨੂੰ ਆਪਣੇ ਸ਼ਬਦ ਵਾਪਸ ਲੈਣ ਲਈ ਕਈ ਮੌਕੇ ਦਿੱਤੇ ਗਏ ਪਰ ਉਨ੍ਹਾਂ ਅਜਿਹਾ ਨਹੀਂ ਕੀਤਾ। ਪੋਲੀਵਰੇ ਨੂੰ ਬਾਹਰ ਭੇਜੇ ਜਾਣ ਨਾਲ ਪਾਰਟੀ ਦੇ ਸਾਰੇ ਐੱਮ.ਪੀ. ਨੇ ਵੀ ਵਿਰੋਧ ਵਿਚ ਹਾਊਸ ਵਿਚੋਂ ਵਾਕਆਊਟ ਕਰ ਦਿੱਤਾ। ਪੀਅਰੇ ਪੋਲੀਵਰੇ ਹਾਊਸ ਵਿਚ ਬ੍ਰਿਟਿਸ਼ ਕੋਲੰਬੀਆ ਦੇ ਡਰੱਗ ਦੇ ਮੁੱਦੇ ’ਤੇ ਬੋਲ ਰਹੇ ਸਨ, ਜਦੋਂ ਉਨ੍ਹਾਂ ਨੇ ਟਰੂਡੋ ਨੂੰ ਸਨਕੀ ਕਿਹਾ।

ਪੋਲੀਵਰੇ ਦਾ ਕਹਿਣਾ ਸੀ ਕਿ ਟਰੂਡੋ ਦੀਆਂ ਗਲਤ ਨੀਤੀਆਂ ਨੇ ਡਰੱਗ ਓਵਰਡੋਜ਼ ਕਾਰਨ ਬੀ.ਸੀ. ਵਿਚ ਹਰ ਸਾਲ 2,500 ਲੋਕਾਂ ਦੀ ਜਾਨ ਲਈ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਜਦੋਂ ਸੂਬਾ ਸਰਕਾਰ ਨੇ ਨਸ਼ਿਆਂ ਦਾ ਅਪਰਾਧੀ ਕਰਨ ਪਾਲਿਸੀ ਨੂੰ ਵਾਪਸ ਲੈਣ ਲਈ ਕਿਹਾ ਹੈ ਤਾਂ ਪ੍ਰਧਾਨ ਮੰਤਰੀ ਇਸ ਨੂੰ ਵਾਪਸ ਕਿਉਂ ਨਹੀਂ ਲੈ ਰਹੇ, ਪੋਲੀਵਰੇ ਨੇ ਕਿਹਾ ਇਸ ਸਨਕੀ ਪਾਲਿਸੀ ਨੂੰ ਸਨਕੀ ਪ੍ਰਧਾਨ ਮੰਤਰੀ ਵਲੋਂ ਕਦੋਂ ਖਤਮ ਕੀਤਾ ਜਾਵੇਗਾ।