ਬੀ.ਸੀ. ਦੇ ਕਈ ਮੁੱਖ ਹਾਈਵੇਅ 'ਤੇ ਹੋਈ ਬਰਫ਼ਬਾਰੀ ,ਜਾਰੀ ਕੀਤੀ ਗਈ ਚਿਤਾਵਨੀ

ਬੀ.ਸੀ. ਦੇ ਕਈ ਮੁੱਖ ਹਾਈਵੇਅ 'ਤੇ ਰਾਤ ਬਰਫ਼ਬਾਰੀ ਹੋਈ, ਜਿਸ ਕਾਰਨ ਅੰਦਰੂਨੀ ਖੇਤਰ ਵੱਲ ਸਫਰ ਕਰਨ ਵਾਲੇ ਡਰਾਈਵਰਾਂ ਨੂੰ ਖਾਸ ਕਰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਇਨਵਾਇਰਮੈਂਟ ਅਨੁਸਾਰ, ਕੋਕੀਹਾਲਾ ਹਾਈਵੇਅ 'ਤੇ 30 ਸੈਂਟੀਮੀਟਰ ਬਰਫ਼ ਦਰਜ ਕੀਤੀ ਗਈ, ਜੋ ਕਿ ਸੂਬੇ ਵਿਚ ਸਭ ਤੋਂ ਵੱਧ ਸੀ। ਇਸ ਤੋਂ ਇਲਾਵਾ ਸਾਲਮੋ ਅਤੇ ਕ੍ਰੇਸਟਨ ਵਿਚਕਾਰ ਹਾਈਵੇਅ 3 'ਤੇ ਸਥਿਤ ਕੂਟੇਨੇ ਪਾਸ 'ਤੇ ਵੀ 21 ਸੈਂਟੀਮੀਟਰ ਬਰਫ਼ ਪਈ।

ਮੌਸਮ ਵਿਭਾਗ ਨੇ ਹਾਈਵੇਅ 3 ਲਈ ਅਜੇ ਵੀ ਬਰਫ਼ਬਾਰੀ ਵਾਰਨਿੰਗ ਜਾਰੀ ਰੱਖੀ ਹੈ, ਜਿੱਥੇ 25 ਸੈਂਟੀਮੀਟਰ ਹੋਰ ਬਰਫ਼ਬਾਰੀ ਹੋਣ ਦੀ ਸੰਭਾਵਨਾ ਹੈ। ਰੌਕੀਜ਼ ਨੇੜੇ ਕੂਟੇਨੇ ਅਤੇ ਯੋਹੋ ਰਾਸ਼ਟਰੀ ਪਾਰਕ ਵਿਚ ਵੀ ਵੀਰਵਾਰ ਸਵੇਰ ਤੱਕ 20 ਸੈਂਟੀਮੀਟਰ ਤੱਕ ਬਰਫ਼ਬਾਰੀ ਹੋ ਸਕਦੀ ਹੈ।

ਇਸ ਤੋਂ ਇਲਾਵਾ ਫੋਰਟ ਸੇਂਟ ਜੇਮਜ਼ ਅਤੇ ਪ੍ਰਿੰਸ ਜਾਰਜ ਨੇੜੇ ਹਾਈਵੇਅ 97 'ਤੇ ਬੁੱਧਵਾਰ ਸਵੇਰ ਤੱਕ 7 ਸੈਂਟੀਮੀਟਰ ਬਰਫ਼ ਪੈ ਚੁੱਕੀ ਹੈ ਅਤੇ 5 ਸੈਂਟੀਮੀਟਰ ਹੋਰ ਪੈਣ ਦਾ ਅਨੁਮਾਨ ਹੈ।