ਮੈਟਰੋ ਵੈਨਕੂਵਰ ਹੇਲਸ ਏਂਜਲਸ ਈਵੈਂਟ ਕਾਰਨ ਪ੍ਰਭਾਵਿਤ ਹੋ ਸਕਦੀ ਟ੍ਰੈਫਿਕ

ਮੈਟਰੋ ਵੈਨਕੂਵਰ ਵਿਚ ਟ੍ਰੈਫਿਕ ਅਤੇ ਕਾਰੋਬਾਰ ਭਲਕੇ ਹੇਲਸ ਏਂਜਲਸ ਈਵੈਂਟ ਕਾਰਨ ਪ੍ਰਭਾਵਿਤ ਹੋਣ ਦੀ ਸੰਭਾਵਨਾ ਹੈ। ਸਰੀ ਪੁਲਿਸ ਸਰਵਿਸ ਨੇ ਐਡਵਾਇਜ਼ਰੀ ਵਿਚ ਕਿਹਾ ਹੈ ਕਿ ਹੇਲਸ ਏਂਜਲਸ ਮੋਟਰਸਾਈਕਲ ਦਾ ਵੱਡਾ ਕਾਫਲਾ ਵੀਰਵਾਰ ਤੋਂ ਸ਼ੁਰੂ ਹੋ ਰਿਹਾ ਹੈ, ਜਿਸ ਦੀ ਐਤਵਾਰ ਤੱਕ ਸ਼ਹਿਰ ਵਿਚ ਮੌਜੂਦਗੀ ਦੇਖੀ ਜਾ ਸਕਦੀ ਹੈ। ਇਸ ਕਾਫਲੇ ਵਿਚ 700 ਤੋਂ ਜ਼ਿਆਦਾ ਮੋਟਰਸਾਈਕਲ ਸਵਾਰ ਸ਼ਾਮਲ ਹੋਣ ਦੀ ਉਮੀਦ ਹੈ।

ਇਹ ਕਾਫਲਾ ਕੱਲ੍ਹ ਸਵੇਰੇ 11.30 ਵਜੇ ਕੋਕੁਇਟਲਮ ਤੋਂ ਸ਼ੁਰੂ ਹੋਵੇਗਾ ਅਤੇ ਸਰੀ ਦੇ ਪੱਟੂਲੋ ਪਲੇਸ ਦੇ 12300-ਬਲਾਕ ਵਿਚ ਬੈਂਕੁਇਟ ਹਾਲ ਵਿਖੇ ਸਮਾਪਤ ਹੋਵੇਗਾ।

ਸਰੀ ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਕਾਰਨ ਭਲਕੇ 11.30 ਵਜੇ ਤੋਂ ਦੁਪਹਿਰ 12:00 ਵਜੇ ਵਿਚਕਾਰ ਵਾਹਨ ਚਾਲਕਾਂ ਨੂੰ ਸ਼ਹਿਰ ਦੇ ਕੁਝ ਹਿੱਸਿਆਂ ਵਿਚ ਦੇਰੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਰਿਲੀਜ਼ ਵਿਚ ਕਿਹਾ ਗਿਆ ਹੈ ਕਿ ਪੁਲਿਸ ਇਸ ਦੌਰਾਨ ਪ੍ਰਮੁੱਖ ਚੌਰਾਹੇ 'ਤੇ ਮੌਜੂਦ ਰਹੇਗੀ ਤਾਂ ਜੋ ਡਰਾਈਵਰਾਂ ਅਤੇ ਪੈਦਲ ਚੱਲਣ ਵਾਲਿਆਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਇਆ ਜਾ ਸਕੇ।