ਕੈਨੇਡੀਅਨ ਅਰਥਵਿਵਸਥਾ ਲਈ ਮਾਰਚ ਦਾ ਮਹੀਨਾ ਰੁਜ਼ਗਾਰ ਦੇ ਪੱਖੋਂ ਰਿਹਾ ਰਾਹਤ ਭਰਿਆ

ਕੈਨੇਡੀਅਨ ਅਰਥਵਿਵਸਥਾ ਲਈ ਮਾਰਚ ਦਾ ਮਹੀਨਾ ਰੁਜ਼ਗਾਰ ਦੇ ਪੱਖੋਂ ਕੁਝ ਰਾਹਤ ਲੈ ਕੇ ਆਇਆ ਹੈ,ਜਿਸ ਦੌਰਾਨ 14,100 ਨਵੀਆਂ ਨੌਕਰੀਆਂ ਪੈਦਾ ਹੋਈਆਂ ਹਨ। ਹਾਲਾਂਕਿ,ਇਹ ਅੰਕੜਾ ਅਰਥਸ਼ਾਸਤਰੀਆਂ ਦੀਆਂ ਉਮੀਦਾਂ ਦੇ ਮੁਤਾਬਕ ਹੈ ਪਰ ਇਹ ਸਾਲ ਦੇ ਪਹਿਲੇ ਦੋ ਮਹੀਨਿਆਂ ਵਿਚ ਹੋਏ 109,000 ਨੌਕਰੀਆਂ ਦੇ ਨੁਕਸਾਨ ਦੀ ਭਰਪਾਈ ਕਰਨ ਵਿਚ ਨਾਕਾਮ ਰਿਹਾ ਹੈ।

ਸਟੈਟਿਸਟਿਕਸ ਕੈਨੇਡਾ ਵਲੋਂ ਸ਼ੁੱਕਰਵਾਰ ਨੂੰ ਜਾਰੀ ਕੀਤੀ ਗਈ ਰਿਪੋਰਟ ਅਨੁਸਾਰ,ਨੌਕਰੀਆਂ ਵਿਚ ਤਾਜ਼ਾ ਵਾਧਾ ਮੁੱਖ ਤੌਰ 'ਤੇ ਨਿੱਜੀ ਅਤੇ ਮੁਰੰਮਤ ਸੇਵਾਵਾਂ ਅਤੇ ਕੁਦਰਤੀ ਸਰੋਤ ਦੇ ਖੇਤਰਾਂ ਵਿਚ ਦੇਖਿਆ ਗਿਆ ਹੈ। ਜੌਬਸ ਦੇ ਮਾਮਲੇ ਵਿਚ ਇਹ ਸਾਲ 2026 ਦੀ ਪਹਿਲੀ ਸਕਾਰਾਤਮਕ ਰਿਪੋਰਟ ਹੈ ਪਰ ਇਸ ਦੇ ਬਾਵਜੂਦ ਦੇਸ਼ ਦੀ ਬੇਰੁਜ਼ਗਾਰੀ ਦਰ 6.7 ਫੀਸਦੀ 'ਤੇ ਸਥਿਰ ਰਹੀ।

ਇਹ ਅੰਕੜੇ ਦਰਸਾਉਂਦੇ ਹਨ ਕਿ ਲੇਬਰ ਮਾਰਕੀਟ ਵਿਚ ਸੁਧਾਰ ਦੀ ਗਤੀ ਅਜੇ ਵੀ ਹੌਲੀ ਹੈ ਅਤੇ ਆਰਥਿਕ ਸਥਿਰਤਾ ਲਈ ਆਉਣ ਵਾਲੇ ਮਹੀਨੇ ਕਾਫੀ ਅਹਿਮ ਰਹਿਣਗੇ। ਸਟੈਟਕੈਨ ਦੀ ਲੇਟਸਟ ਰਿਪੋਰਟ ਤੋਂ ਬਾਅਦ ਹੁਣ ਅਗਲੀਆਂ ਨਜ਼ਰਾਂ ਬੈਂਕ ਔਫ ਕੈਨੇਡਾ 'ਤੇ ਹਨ, ਜਿਸ ਵਲੋਂ 29 ਅਪ੍ਰੈਲ ਨੂੰ ਵਿਆਜ ਦਰ ਬਾਰੇ ਫੈਸਲਾ ਲਿਆ ਜਾਣਾ ਹੈ।