ਕੈਨੇਡਾ ਦੀ ਸਟੈਟਿਸਟਿਕਸ ਏਜੰਸੀ ਨੇ ਸੈਂਕੜੇ ਅਹੁਦਿਆਂ ਨੂੰ ਖਤਮ ਕਰਨ ਦਾ ਕੀਤਾ ਫੈਸਲਾ

ਕੈਨੇਡਾ ਦੀ ਸਟੈਟਿਸਟਿਕਸ ਏਜੰਸੀ ਨੇ ਸੈਂਕੜੇ ਅਹੁਦਿਆਂ ਨੂੰ ਖਤਮ ਕਰਨ ਦਾ ਫੈਸਲਾ ਕੀਤਾ ਹੈ। ਇਸ ਦੀ ਸ਼ੁਰੂਆਤ ਇਸੇ ਹਫਤੇ 100 ਕਟੌਤੀਆਂ ਨਾਲ ਕੀਤੀ ਜਾ ਰਹੀ ਹੈ। ਸਟੈਟਿਸਟਿਕਸ ਕੈਨੇਡਾ ਵਲੋਂ ਦੋ ਸਾਲਾਂ ਵਿਚ ਲਗਭਗ 850 ਜੌਬਸ ਦੀ ਕਟੌਤੀ ਕੀਤੀ ਜਾਵੇਗੀ, ਜਿਸ ਵਿਚ ਏਜੰਸੀ ਦੀ ਕਾਰਜਕਾਰੀ ਟੀਮ ਦਾ 12 ਫੀਸਦੀ ਹਿੱਸਾ ਵੀ ਸ਼ਾਮਲ ਹੈ।

ਸਟੈਟਿਸਟਿਕਸ ਕੈਨੇਡਾ ਦੇ ਬੁਲਾਰੇ ਕਾਰਟਰ ਮੈਨ ਨੇ ਇੱਕ ਬਿਆਨ ਵਿੱਚ ਪੁਸ਼ਟੀ ਕੀਤੀ ਕਿ ਏਜੰਸੀ ਵਰਕਫੋਰਸ ਐਡਜਸਟਮੈਂਟ ਦੇ ਦੌਰ ਵਿਚ ਦਾਖਲ ਹੋ ਰਹੀ ਹੈ। ਏਜੰਸੀ ਦੇ ਅੰਦਰੂਨੀ ਮੈਮੋ ਅਨੁਸਾਰ, ਸਰਕਾਰ ਵੱਲੋਂ ਕਰਮਚਾਰੀਆਂ ਨੂੰ ਵੋਲੰਟਰੀ ਡਿਪਾਚਰ ਪ੍ਰੋਗਰਾਮ ਅਤੇ ਅਰਲੀ ਰਿਟਾਇਰਮੈਂਟ ਇਨਸ਼ੇਟਿਵ ਵਰਗੀਆਂ ਸਕੀਮਾਂ ਪੇਸ਼ ਕੀਤੀਆਂ ਜਾ ਰਹੀਆਂ ਹਨ। ਬੁਲਾਰੇ ਨੇ ਕਿਹਾ ਕਿ ਇਨ੍ਹਾਂ ਤਬਦੀਲੀਆਂ ਦੇ ਬਾਵਜੂਦ ਡਿਪਾਰਟਮੈਂਟ ਕੈਨੇਡੀਅਨਜ਼ ਨੂੰ ਸੇਵਾਵਾਂ ਦੇਣ 'ਤੇ ਧਿਆਨ ਕੇਂਦਰਿਤ ਰੱਖੇਗਾ।

ਸਰਕਾਰ ਦੇ ਅੰਕੜਿਆਂ ਅਨੁਸਾਰ, 31 ਮਾਰਚ 2025 ਤੱਕ ਸਟੈਟਿਸਟਿਕਸ ਕੈਨੇਡਾ ਵਿਚ ਕੁੱਲ 7,274 ਕਰਮਚਾਰੀ ਕੰਮ ਕਰ ਰਹੇ ਸਨ, ਜਿਨ੍ਹਾਂ ਵਿਚੋਂ 99 ਅਧਿਕਾਰੀ ਐਗਜ਼ੀਕਿਊਟਿਵ ਟੀਮ ਦਾ ਹਿੱਸਾ ਸਨ। ਹੋਰ ਵਿਭਾਗਾਂ ਵਿਚ ਵੀ ਛਾਂਟੀ ਦਾ ਡਰ ਹੈ।ਆਈ.ਆਰ.ਸੀ.ਸੀ., ਇਨਵਾਇਰਮੈਂਟ ਐਂਡ ਕਲਾਈਮੇਟ ਚੇਂਜ ਅਤੇ ਇੰਪਲਾਇਮੈਂਟ ਐਂਡ ਸੋਸ਼ਲ ਡਿਵੈਲਪਮੈਂਟ ਡਿਪਾਰਟਮੈਂਟਸ ਨੇ ਪਿਛਲੇ ਸਾਲ ਦੇ ਅਖੀਰ ਵਿਚ ਆਪਣੇ ਸਟਾਫ਼ ਨੂੰ ਜਾਣਕਾਰੀ ਦਿੱਤੀ ਸੀ ਕਿ ਜਨਵਰੀ ਮਹੀਨੇ ਵਿਚ ਨੌਕਰੀਆਂ ਵਿਚ ਕਟੌਤੀ ਦੀਆਂ ਖ਼ਬਰਾਂ ਸਾਂਝੀਆਂ ਕੀਤੀਆਂ ਜਾ ਸਕਦੀਆਂ ਹਨ।