ਕੈਨੇਡੀਅਨ ਅਰਥਵਿਵਸਥਾ ਨੇ ਨਵੰਬਰ ਵਿਚ ਦਰਜ ਕੀਤੀ 0.2 ਫੀਸਦੀ ਦੀ ਗਿਰਾਵਟ

ਕੈਨੇਡੀਅਨ ਅਰਥਵਿਵਸਥਾ ਨੇ ਨਵੰਬਰ ਵਿਚ 0.2 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਹੈ, ਜੋ ਲਗਭਗ ਦੋ ਸਾਲਾਂ ਵਿਚ ਸਭ ਤੋਂ ਵੱਡੀ ਮਹੀਨਾਵਾਰ ਗਿਰਾਵਟ ਹੈ। ਸਟੈਟਿਸਟਿਕਸ ਕੈਨੇਡਾ ਨੇ ਸ਼ੁੱਕਰਵਾਰ ਨੂੰ ਜੀ. ਡੀ. ਪੀ. ਸਬੰਧੀ ਰਿਪੋਰਟ ਵਿਚ ਇਹ ਜਾਣਕਾਰੀ ਦਿੱਤੀ।

ਹਾਲਾਂਕਿ, ਦਸੰਬਰ ਲਈ ਜੀ. ਡੀ. ਪੀ. ਗ੍ਰੋਥ 0.2 ਫੀਸਦੀ ਦੀ ਦਰ ਨਾਲ ਵਧਣ ਦਾ ਅਨੁਮਾਨ ਲਗਾਇਆ ਗਿਆ ਹੈ, ਜਿਸ ਨਾਲ ਮੌਜੂਦਾ ਵਿੱਤੀ ਸਾਲ ਦੀ ਚੌਥੀ ਤਿਮਾਹੀ ਦੀ ਓਵਰਆਲ ਜੀ. ਡੀ. ਪੀ. ਗ੍ਰੋਥ ਸਾਲਾਨਾ ਦਰ ਨਾਲ 1.8 ਫੀਸਦੀ ਰਹਿ ਸਕਦੀ ਹੈ, ਇਹ ਬੈਂਕ ਆਫ ਕੈਨੇਡਾ ਦੇ ਪੂਰਵ ਅਨੁਮਾਨ ਅਨੁਸਾਰ ਹੈ।

ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਨਵੰਬਰ ਵਿਚ ਕੈਨੇਡਾ ਨੇ ਮਾਈਨਿੰਗ, ਤੇਲ-ਗੈਸ, ਅਤੇ ਸਹੂਲਤ ਸੈਕਟਰ ਵਿਚ 0.6 ਫੀਸਦੀ ਗਿਰਾਵਟ ਦਰਜ ਕੀਤੀ। ਇਸ ਤੋਂ ਇਲਾਵਾ ਸੇਵਾ-ਉਤਪਾਦਕ ਉਦਯੋਗ ਵਿਚ 0.1 ਫੀਸਦੀ ਦੀ ਗਿਰਾਵਟ ਆਈ। ਗੌਰਤਲਬ ਹੈ ਕਿ ਇਹ ਆਰਥਿਕ ਰਿਪੋਰਟ ਉਦੋਂ ਆਈ ਹੈ ਜਦੋਂ ਅਮਰੀਕਾ ਨੇ ਸ਼ਨੀਵਾਰ ਤੋਂ ਕੈਨੇਡਾ ਤੋਂ ਆਉਣ ਵਾਲੇ ਸਮਾਨ 'ਤੇ ਟੈਰਿਫ ਲਗਾਉਣ ਦੀ ਧਮਕੀ ਦਿੱਤੀ ਹੈ।