ਕੈਨੇਡਾ ਸਰਕਾਰ ਵਲੋਂ ਇਮੀਗ੍ਰੇਸ਼ਨ 'ਤੇ ਸ਼ਿਕੰਜਾ ਕੱਸਣ ਨਾਲ ਆਬਾਦੀ ਦੇ ਵਾਧੇ ਵਿਚ ਆਈ ਕਮੀ

ਕੈਨੇਡਾ ਸਰਕਾਰ ਵਲੋਂ ਇਮੀਗ੍ਰੇਸ਼ਨ 'ਤੇ ਸ਼ਿਕੰਜਾ ਕੱਸਣ ਨਾਲ ਦੇਸ਼ ਵਿਚ ਵੱਧਦੀ ਆਬਾਦੀ ਦੀ ਰਫ਼ਤਾਰ ਹੌਲੀ ਹੋ ਗਈ ਹੈ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, 31 ਦਸੰਬਰ ਨੂੰ ਖਤਮ ਹੋਈ ਚੌਥੀ ਤਿਮਾਹੀ ਵਿਚ ਕੈਨੇਡਾ ਦੀ ਆਬਾਦੀ ਵਿਚ 63,382 ਲੋਕ ਸ਼ਾਮਲ ਹੋਏ, ਜੋ 1 ਅਕਤੂਬਰ 2024 ਦੇ ਮੁਕਾਬਲੇ 0.2 ਫੀਸਦੀ ਦਾ ਵਾਧਾ ਹੈ ਪਰ 2020 ਦੀ ਕੋਵਿਡ ਮਹਾਂਮਾਰੀ ਤੋਂ ਬਾਅਦ ਸਭ ਤੋਂ ਹੌਲੀ ਰਫਤਾਰ ਹੈ ਜਦੋਂ ਯਾਤਰਾ ਸਬੰਧੀ ਪਾਬੰਦੀਆਂ ਲਗਾਈਆਂ ਗਈਆਂ ਸਨ। ਏਜੰਸੀ ਨੇ ਕਿਹਾ ਕਿ ਕੈਨੇਡਾ ਦੀ ਕੁੱਲ ਆਬਾਦੀ ਮੌਜੂਦਾ ਸਮੇਂ 41,528,680 ਹੈ।

ਉਥੇ ਹੀ, ਜੇ ਪਿਛਲੇ ਪੂਰੇ ਸਾਲ ਦਾ ਦੇਖੀਏ ਤਾਂ 2024 ਵਿਚ ਕੈਨੇਡਾ ਦੀ ਆਬਾਦੀ ਵਿਚ 744,324 ਲੋਕ ਸ਼ਾਮਲ ਹੋਏ। ਗੌਰਤਲਬ ਹੈ ਕਿ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ 2025 ਅਤੇ 2026 ਦੋਵਾਂ ਵਿਚ ਆਬਾਦੀ ਦੀ ਰਫ਼ਤਾਰ ਹੋਰ ਹੌਲੀ ਕਰਨ ਵਾਲੇ ਉਪਾਵਾਂ ਦਾ ਐਲਾਨ ਕੀਤਾ ਸੀ।

ਇਸ ਵਿਚਕਾਰ ਉਦਯੋਗ ਸਮੂਹ ਨੇ ਚਿਤਾਵਨੀ ਦਿੱਤੀ ਹੈ ਕਿ ਇਮੀਗ੍ਰੇਸ਼ਨ ਦੀ ਰਫ਼ਤਾਰ ਸਲੌ ਹੋਣ ਨਾਲ ਲੇਬਰ ਦੀ ਉਪਲੱਬਧਤਾ ਪ੍ਰਭਾਵਿਤ ਹੋ ਸਕਦੀ ਹੈ, ਖਾਸ ਕਰਕੇ ਅਜਿਹੇ ਸਮੇਂ ਜਦੋਂ ਅਮਰੀਕਾ ਵਲੋਂ ਟੈਰਿਫ ਲਗਾਏ ਜਾਣ ਨਾਲ ਉਪਭੋਗਤਾ ਅਤੇ ਕਾਰੋਬਾਰੀ ਭਾਵਨਾ 'ਤੇ ਪਹਿਲਾਂ ਹੀ ਅਸਰ ਪੈਣਾ ਸ਼ੁਰੂ ਹੋ ਗਿਆ ਹੈ।