ਕੈਨੇਡਾ ਅਤੇ ਅਮਰੀਕਾ ਦੇ ਸ਼ੇਅਰ ਬਜ਼ਾਰਾਂ 'ਚ ਟਰੰਪ ਟੈਰਿਫ ਕਾਰਨ ਭਾਰੀ ਗਿਰਾਵਟ

ਕੈਨੇਡੀਅਨ ਅਤੇ ਅਮਰੀਕੀ ਸਟਾਕ ਮਾਰਕੀਟ ਵਿਚ ਟਰੰਪ ਦੇ ਟੈਰਿਫ ਕਾਰਨ ਲਗਾਤਾਰ ਦੂਜੇ ਦਿਨ ਭਾਰੀ ਗਿਰਾਵਟ ਦਰਜ ਹੋਈ ਹੈ। ਟੋਰਾਂਟੋ ਸਟਾਕ ਐਕਸਚੇਂਜ ਦੇ S&P/TSX ਕੰਪੋਜ਼ਿਟ ਇੰਡੈਕਸ ਵਿਚ 1,000 ਤੋਂ ਵੱਧ ਅੰਕ ਯਾਨੀ 4.16 ਫੀਸਦੀ ਦੀ ਗਿਰਾਵਟ ਦੇਖਣ ਨੂੰ ਮਿਲੀ। ਵੀਰਵਾਰ ਨੂੰ ਕੈਨੇਡੀਅਨ ਮਾਰਕੀਟ 3.8 ਫੀਸਦੀ ਦੀ ਗਿਰਾਵਟ ਨਾਲ ਬੰਦ ਹੋਈ ਸੀ, ਜੋ ਕੋਵਿਡ ਸਮੇਂ ਦੇ ਜੂਨ 2020 ਤੋਂ ਬਾਅਦ ਸਭ ਤੋਂ ਵੱਡੀ ਗਿਰਾਵਟ ਸੀ।

ਉਥੇ ਹੀ, ਅਮਰੀਕੀ ਸਟਾਕ ਮਾਰਕੀਟ ਦਾ ਪ੍ਰਮੁੱਖ ਇੰਡੈਕਸ ਡਾਓ ਜੋਨਸ ਅੱਜ ਕਾਰੋਬਾਰ ਦੌਰਾਨ 1,900 ਤੋਂ ਵੱਧ ਅੰਕ ਟੁੱਟਾ। ਹਾਲਾਂਕਿ, ਬਾਅਦ ਵਿਚ ਇਸ ਲੇਵਲ ਤੋਂ ਕੁਝ ਰਿਕਵਰੀ ਦੇਖਣ ਨੂੰ ਮਿਲੀ। ਇਸ ਵਿਚਕਾਰ ਕੱਚੇ ਤੇਲ ਦੀਆਂ ਕੀਮਤਾਂ ਡਿੱਗ ਕੇ 2021 ਤੋਂ ਬਾਅਦ ਆਪਣੇ ਸਭ ਤੋਂ ਹੇਠਲੇ ਪੱਧਰ 'ਤੇ ਆ ਗਈਆਂ ਹਨ।

ਉਥੇ ਹੀ, ਸ਼ੇਅਰ ਬਾਜ਼ਾਰ ਵਿਚ ਵਿਕਵਾਲੀ ਵਿਚਕਾਰ ਅਮਰੀਕਾ ਵਿਚ ਸਪਾਟ ਗੋਲਡ 1.9 ਫੀਸਦੀ ਡਿੱਗ ਕੇ $3,053 ਪ੍ਰਤੀ ਔਂਸ 'ਤੇ ਆ ਗਿਆ। ਵੀਰਵਾਰ ਨੂੰ ਇਹ $3,167 ਦੇ ਰਿਕਾਰਡ ਉੱਚ ਪੱਧਰ 'ਤੇ ਪਹੁੰਚ ਗਿਆ ਸੀ। ਵਿਸ਼ਲੇਸ਼ਕਾਂ ਮੁਤਾਬਕ, ਨਿਵੇਸ਼ਕਾਂ ਨੇ ਸ਼ੇਅਰ ਬਾਜ਼ਾਰ ਵਿਚ ਹੋਏ ਨੁਕਸਾਨ ਦੀ ਭਰਪਾਈ ਲਈ ਕੁਝ ਸੋਨੇ ਦੇ ਭੰਡਾਰ ਨੂੰ ਵੇਚਿਆ ਹੈ।