ਵੈਨਕੂਵਰ ਪੁਲਿਸ ਨੇ ਜਿਨਸੀ ਹਮਲੇ ਤੇ ਡਕੈਤੀ ਦੇ ਮਾਮਲੇ 'ਚ ਸਰੀ ਵਾਸੀ 'ਤੇ ਲਗਾਏ ਦੋਸ਼

ਵੈਨਕੂਵਰ ਪੁਲਿਸ ਨੇ ਇੱਕ ਲੜਕੀ 'ਤੇ ਹੋਏ ਜਿਨਸੀ ਹਮਲੇ ਦੇ ਮਾਮਲੇ 'ਚ ਸਰੀ ਦੇ 62 ਸਾਲਾ ਜੌਨ ਫ੍ਰੈਡਰਿਕ ਨੂੰ ਚਾਰਜ ਕੀਤਾ ਹੈ।

ਇਹ ਘਟਨਾ ਇੱਕ ਕਥਿਤ ਅਪਰਾਧਿਕ ਲੜੀ ਦਾ ਹਿੱਸਾ ਸੀ ਜਿਸ ਦੌਰਾਨ ਇੱਕ ਬੈਂਕ ਡਕੈਤੀ ਵੀ ਹੋਈ ਅਤੇ ਇੱਕ ਹੋਰ ਔਰਤ ਨੂੰ ਵੀ ਹਮਲੇ ਦਾ ਸਾਹਮਣਾ ਕਰਨਾ ਪਿਆ ਸੀ।
ਹਾਲਾਂਕਿ ਦੂਜੀ ਔਰਤ ਦਾ ਹਮਲੇ 'ਚ ਕਿਸੇ ਬਹੁਤੀ ਸੱਟਫੇਟ ਤੋਂ ਬਚਾਅ ਰਿਹਾ।
ਇਹ ਹਿੰਸਕ ਘਟਨਾਵਾਂ ਦੋ ਦਿਨ ਪਹਿਲਾਂ 28 ਮਈ ਨੂੰ ਸ਼ਾਮ ਕਰੀਬ ਸਵਾ ਪੰਜ ਵਜੇ ਕੈਂਬੀ ਸਟ੍ਰੀਟ ਅਤੇ ਵੈਸਟ 41 ਐਵੀਨਿਊ ਕੋਲ ਸਥਿਤ ਇੱਕ ਇਮਾਰਤ 'ਚ ਵਾਪਰੀਆਂ ਸਨ।
ਪਹਿਲਾਂ ਇੱਕ 58 ਸਾਲਾ ਔਰਤ ਨੂੰ ਹਾਲਵੇ 'ਚ ਜੱਫਾ ਪਾ ਲਿਆ ਗਿਆ ਸੀ ਅਤੇ ਹਮਲੇ ਦੀ ਕੋਸ਼ਿਸ਼ ਕੀਤੀ ਗਈ ਸੀ ਪਰ ਔਰਤ ਰੌਲਾ ਪਾ ਕੇ ਮੌਕੇ ਤੋਂ ਨਿਕਲਣ 'ਚ ਕਾਮਯਾਬ ਰਹੀ।
ਕੁਝ ਹੀ ਮਿੰਟ 'ਚ ਇਸ ਵਿਅਕਤੀ ਨੇ ਇੱਕ ਪਬਲਿਕ ਵਾਸ਼ਰੂਮ 'ਚ ਇੱਕ 14 ਸਾਲਾ ਲੜਕੀ 'ਤੇ ਜਿਨਸੀ ਹਮਲਾ ਕੀਤਾ ਅਤੇ ਉਸ ਨੂੰ ਜਬਰਦਸਤੀ ਕਾਬੂ 'ਚ ਰੱਖਿਆ।
ਪੀੜਤ ਲੜਕੀ ਇੱਕ ਹੋਰ ਵਿਅਕਤੀ ਦੇ ਵਾਸ਼ਰੂਮ 'ਚ ਦਾਖਿਲ ਹੋਣ 'ਤੇ ਖੁਦ ਨੂੰ ਛੁਡਾ ਕੇ ਮੌਕੇ ਤੋਂ ਭੱਜ ਨਿਕਲੀ।
ਇਸ ਤੋਂ ਬਾਅਦ ਸ਼ੱਕੀ ਨੇ ਡਕੈਤੀ ਨੂੰ ਅੰਜਾਮ ਦਿੱਤਾ। ਪੁਲਿਸ ਵੱਲੋਂ ਸ਼ੱਕੀ ਨੂੰ ਸ਼ਾਮ ਕਰੀਬ ਪੌਣੇ ਛੇ ਵਜੇ ਕਾਬੂ ਕਰ ਲਿਆ ਗਿਆ ਸੀ।
ਮਾਮਲੇ 'ਚ ਫ੍ਰੈਡਰਿਕ 'ਤੇ 16 ਸਾਲ ਤੋਂ ਘੱਟ ਉਮਰ ਦੇ ਵਿਅਕਤੀ 'ਤੇ ਹਥਿਆਰ ਨਾਲ ਜਿਨਸੀ ਹਮਲਾ ਕਰਨ, ਫੋਰਸੀਬਲ ਕਨਫਾਈਨਮੈਂਟ, ਕੰਸੀਲਡ ਹਥਿਆਰ ਰੱਖਣ, ਡਕੈਤੀ ਅਤੇ ਹਮਲੇ ਦੇ ਦੋਸ਼ ਲੱਗੇ ਹਨ।