9.15C Vancouver 9.15C VancouverMar 31, 2021 8:21 PM -
ਅੱਜ ਬੀ.ਸੀ. ਦੇ ਲੋਅਰ ਮੇਨਲੈਂਡ 'ਚ ਕੋਵਿਡ-19 ਵੈਕਸੀਨ ਹਾਸਿਲ ਕਰਨ ਦੇ ਚਾਹਵਾਨ ਲੋਕਾਂ ਵੱਲੋਂ ਅਪਾਇੰਟਮੈਂਟ ਹਾਸਿਲ ਕਰਨ ਲਈ ਫੋਨਲਾਈਨਸ 'ਤੇ ਜਬਰਦਸਤ ਰਿਸਪਾਂਸ ਵੇਖਣ ਨੂੰ ਮਿਲਿਆ ਹੈ।
ਇਸ ਦੇ ਚਲਦਿਆਂ ਉਲਝਣ ਅਤੇ ਲੰਮੀ ਉਡੀਕ ਜਿਹਾ ਮਾਹੌਲ ਬਣ ਗਿਆ।
ਬੀ.ਸੀ. 'ਚ ਕੱਲ ਹੀ ਐਲਾਨ ਕੀਤਾ ਗਿਆ ਸੀ ਕਿ ਲੋਅਰ ਮੇਨਲੈਂਡ ਦੇ 55 ਤੋਂ 65 ਸਾਲ ਦੇ ਦਰਮਿਆਨ ਦੇ ਨਿਵਾਸੀਆਂ ਨੂੰ ਇਹ ਆਪਸ਼ਨ ਹੋਵੇਗੀ ਕਿ ਉਹ ਆਪਣੇ ਨੇੜੇ ਦੇ ਫਾਰਮੇਸੀ ਵਾਲਿਆਂ ਨਾਲ ਸੰਪਰਕ ਕਰ ਕੇ ਕੋਵਿਡ-19 ਵੈਕਸੀਨ ਹਾਸਿਲ ਕਰ ਸਕਣਗੇ।
ਇਸ ਪ੍ਰੀਕਿਰਿਆ 'ਚ ਔਕਸਫਰਡ-ਐਸਟ੍ਰਾਜ਼ੈਨਕਾ ਵੈਕਸੀਨ ਦੀ ਵਰਤੋਂ ਕੀਤੀ ਜਾਵੇਗੀ।
ਲੋਅਰ ਮੇਨਲੈਂਡ ਦੇ ਵਾਸੀਆਂ ਦੀ ਚੋਣ ਇਸ ਪ੍ਰੀਕਿਰਿਆ ਲਈ ਇਸਲਈ ਕੀਤੀ ਗਈ ਕਿ ਇਲਾਕੇ 'ਚ ਕੋਵਿਡ-19 ਮਾਮਲਿਆਂ ਦੀ ਗਿਣਤੀ ਕਾਫੀ ਵੱਡੀ ਰਹੀ ਹੈ।
ਬੀਤੀ ਰਾਤ ਤਕ ਹੀ ਲੰਡਨ ਡਰੱਗਸ ਦੀਆਂ ਫੈਸਿਲਟੀਆਂ 'ਤੇ ਵੱਡੀ ਗਿਣਤੀ 'ਚ ਬੁਕਿੰਗ ਹੋ ਗਈ ਸੀ।
ਲੰਡਨ ਡਰੱਗਸ ਵੱਲੋਂ ਇੱਕ ਬਿਆਨ ਵੀ ਜਾਰੀ ਕੀਤਾ ਗਿਆ ਅਤੇ ਦੱਸਿਆ ਗਿਆ ਕਿ ਲੋਕਾਂ ਨੂੰ ਸਬਰ ਨਾਲ ਕੰਮ ਲੈਣ ਦੀ ਲੋੜ ਹੈ।
ਜਾਣਕਾਰੀ ਦਿੱਤੀ ਗਈ ਕਿ ਉਨ੍ਹਾਂ ਦੀਆਂ 3 ਫਾਰਮੇਸੀਆਂ 'ਤੇ ਪੂਰੀ ਤਰ੍ਹਾਂ ਬੁਕਿੰਗ ਹੋ ਚੁੱਕੀ ਹੈ ਅਤੇ ਫ਼ਿਲਹਾਲ ਉਨ੍ਹਾਂ ਕੋਲ ਸੀਮਤ ਗਿਣਤੀ 'ਚ ਵੈਕਸੀਨ ਪਹੁੰਚੀ ਹੈ। ਹਾਲਾਂਕਿ ਵਧੇਰੇ ਵੈਕਸੀਨ ਖੁਰਾਕਾਂ ਪਹੁੰਚਣ ਦੀ ਆਸ ਹੈ।
