15.79C Vancouver 15.79C VancouverNov 6, 2025 2:58 PM - "Connect Newsroom - Jasmine Singh with files from The Canadian Press"
ਸੁਪਰੀਮ ਕੋਰਟ ਔਫ ਕੈਨੇਡਾ ਨੇ ਬੀ.ਸੀ.ਦੇ ਯੂਨੀਵਰਸਲ ਸ਼ੁਤਰਮੁਰਗ ਫਾਰਮ ਦੀ ਅੰਤਿਮ ਅਪੀਲ ਖਾਰਜ ਕਰ ਦਿੱਤੀ ਹੈ,ਜਿਸ ਨਾਲ ਸੀ.ਐਫ.ਆਈ.ਏ.ਯਾਨੀ ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਵਲੋਂ ਫਾਰਮ ਦੇ ਲਗਭਗ 300 ਸ਼ਤਰਮੁਰਗਾਂ ਨੂੰ ਮਾਰਨ ਦਾ ਰਾਹ ਪੱਧਰਾ ਹੋ ਗਿਆ ਹੈ।
ਸੀ.ਐਫ.ਆਈ.ਏ.ਨੇ ਦਸੰਬਰ 2024 ਵਿਚ ਫਾਰਮ ਦੇ ਕੁਝ ਸ਼ੁਤਰਮੁਰਗਾਂ ਵਿਚ ਏਵੀਅਨ ਫਲੂ ਦਾ ਪਤਾ ਲੱਗਣ ਤੋਂ ਬਾਅਦ ਇਸ ਨੂੰ ਆਪਣੇ ਲਗਭਗ ਪੂਰੇ ਝੁੰਡ ਨੂੰ ਮਾਰਨ ਦਾ ਆਦੇਸ਼ ਦਿੱਤਾ ਸੀ ਪਰ ਉਦੋਂ ਤੋਂ ਫਾਰਮ ਇਸ ਖਿਲਾਫ ਲੜਾਈ ਅਦਾਲਤਾਂ ਵਿਚ ਲੜ ਰਿਹਾ ਸੀ। ਫਾਰਮ ਦੇ ਮਾਲਕਾਂ ਦੀ ਦਲੀਲ ਸੀ ਕਿ ਬਚੇ ਹੋਏ ਸ਼ੁਤਰਮੁਰਗਾਂ ਵਿਚ ਬਿਮਾਰੀ ਦੇ ਕੋਈ ਲੱਛਣ ਨਹੀਂ ਹਨ ਅਤੇ ਉਨ੍ਹਾਂ ਨੂੰ ਮਾਰਿਆ ਨਹੀਂ ਜਾਣਾ ਚਾਹੀਦਾ।
ਉਥੇ ਹੀ,ਏਜੰਸੀ ਦਾ ਕਹਿਣਾ ਸੀ ਕਿ ਸਿਹਤਮੰਦ ਦਿਖਾਈ ਦੇਣ ਵਾਲੇ ਸ਼ੁਤਰਮੁਰਗ ਅਜੇ ਵੀ ਬਿਮਾਰੀ ਫੈਲਾ ਸਕਦੇ ਹਨ। ਯੂਨੀਵਰਸਲ ਸ਼ੁਤਰਮੁਰਗ ਫਾਰਮ ਵਲੋਂ ਇਸ ਮਾਮਲੇ ਵਿਚ ਸੁਪਰੀਮ ਕੋਰਟ ਦਾ ਰੁਖ਼ ਕਰਨ 'ਤੇ ਸਰਵਉੱਚ ਅਦਾਲਤ ਨੇ ਸੀ.ਐਫ.ਆਈ.ਏ.ਦੇ ਮਾਰਨ ਦੇ ਹੁਕਮ 'ਤੇ ਸਤੰਬਰ ਵਿਚ ਅਸਥਾਈ ਰੋਕ ਲਗਾ ਦਿੱਤੀ ਸੀ।
ਬੁੱਧਵਾਰ ਨੂੰ ਫੈਸਲੇ ਵਿਚ ਸੁਪਰੀਮ ਕੋਰਟ ਔਫ ਕੈਨੇਡਾ ਨੇ ਮਾਮਲੇ ਵਿਚ ਸੁਣਵਾਈ ਕਰਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਕਿਹਾ ਕਿ ਐਗਜ਼ੀਕਿਊਸ਼ਨ 'ਤੇ ਰੋਕ ਲਗਾਉਣ ਦੀ ਮੰਗ ਖਾਰਜ ਕੀਤੀ ਜਾਂਦੀ ਹੈ।
