ਕਪਿਲ ਸ਼ਰਮਾ ਦੇ ਕੈਨੇਡੀਅਨ ਰੈਸਟੋਰੈਂਟ ਉੱਤੇ ਤੀਜੀ ਵਾਰ ਚੱਲੀਆਂ ਗੋਲੀਆਂ

ਸਰੀ ਵਿਚ ਅੱਜ ਤੜਕੇ 3.45 ਵਜੇ ਦੇ ਕਰੀਬ 120 ਸਟ੍ਰੀਟ ਦੇ 8400-ਬਲਾਕ ਵਿਚ ਕਪਿਲ ਸ਼ਰਮਾ ਦੇ ਕੈਪਸ ਕੈਫੇ 'ਤੇ ਗੋਲੀਆਂ ਚੱਲੀਆਂ। ਪੁਲਿਸ ਮੁਤਾਬਕ, ਜਿਸ ਸਮੇਂ ਵਾਰਦਾਤ ਹੋਈ ਉਸ ਸਮੇਂ ਸਟਾਫ ਅੰਦਰ ਮੌਜੂਦ ਸੀ ਪਰ ਕਿਸੇ ਦੇ ਜ਼ਖਮੀ ਹੋਣ ਤੋਂ ਬਚਾਅ ਰਿਹਾ। ਰਿਪੋਰਟਸ ਅਨੁਸਾਰ, ਗੈਂਗਸਟਰ ਗੋਲਡੀ ਢਿੱਲੋਂ ਅਤੇ ਕੁਲਦੀਪ ਸਿੱਧੂ ਨੇ ਸੋਸ਼ਲ ਮੀਡੀਆ 'ਤੇ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ।

ਫੈਡਰਲ ਸਰਕਾਰ ਵਲੋਂ ਪਿਛਲੇ ਮਹੀਨੇ ਬਿਸ਼ਨੋਈ ਗੈਂਗ ਨੂੰ ਅੱਤਵਾਦੀ ਸੰਗਠਨ ਵਜੋਂ ਲਿਸਟ ਕੀਤੇ ਜਾਣ ਤੋਂ ਬਾਅਦ ਇਹ ਪਹਿਲਾ ਹਮਲਾ ਹੈ ਅਤੇ ਪਿਛਲੇ 4 ਮਹੀਨਿਆਂ ਵਿਚ ਤੀਜੀ ਵਾਰ ਹੈ, ਜਦੋਂ ਕਪਿਲ ਸ਼ਰਮਾ ਦੇ ਰੈਸਟੋਰੈਂਟ ਨੂੰ ਗੋਲੀਆਂ ਨਾਲ ਨਿਸ਼ਾਨਾ ਬਣਾਇਆ ਗਿਆ ਹੈ।

ਕੈਪਸ ਕੈਫੇ 'ਤੇ ਪਹਿਲਾ ਹਮਲਾ 10 ਜੁਲਾਈ ਨੂੰ ਹੋਇਆ ਸੀ, ਦੂਜਾ ਹਮਲੇ ਵਿਚ ਘੱਟੋ-ਘੱਟ 25 ਗੋਲੀਆਂ ਚਲਾਈਆਂ ਗਈਆਂ ਸਨ ਜੋ 7 ਅਗਸਤ ਨੂੰ ਹੋਇਆ ਸੀ। ਤਾਜ਼ਾ ਸ਼ੂਟਿੰਗ ਦੀ ਵਾਰਦਾਤ ਉਦੋਂ ਹੋਈ ਹੈ ਜਦੋਂ ਸਰੀ ਪੁਲਿਸ ਇਸ ਸਾਲ 50 ਤੋਂ ਵੱਧ ਜ਼ਬਰੀ ਵਸੂਲੀ ਮਾਮਲਿਆਂ ਦੀ ਜਾਂਚ ਕਰ ਰਹੀ ਹੈ, ਜਿਨ੍ਹਾਂ ਵਿਚ ਦੱਖਣੀ ਏਸ਼ੀਆਈ ਨਿਵਾਸੀ ਅਤੇ ਕਾਰੋਬਾਰੀ ਮਾਲਕ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ।