ਸਰੀ-ਗਿਲਡਫੋਰਡ ਤੋਂ ਬੀ.ਸੀ. ਕੰਜ਼ਰਵੇਟਿਵ ਉਮੀਦਵਾਰ ਨੇ ਨਤੀਜਿਆਂ ਖਿਲਾਫ ਅਦਾਲਤੀ ਚੁਣੌਤੀ ਵਾਪਸ ਲਈ

ਬੀ. ਸੀ. ਦੀਆਂ ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਸਰੀ-ਗਿਲਡਫੋਰਡ ਸੀਟ 'ਤੇ ਫਸਵੀਂ ਟੱਕਰ ਤੋਂ ਬਾਅਦ ਪੈਦਾ ਹੋਇਆ ਕਾਨੂੰਨੀ ਵਿਵਾਦ ਖ਼ਤਮ ਹੋ ਗਿਆ ਹੈ।ਕੰਜ਼ਰਵੇਟਿਵ ਉਮੀਦਵਾਰ ਹੋਨਵੀਰ ਸਿੰਘ ਰੰਧਾਵਾ, ਜੋ ਮਹਿਜ਼ 22 ਵੋਟਾਂ ਦੇ ਫਰਕ ਨਾਲ ਇਹ ਸੀਟ ਹਾਰੇ ਸਨ, ਉਨ੍ਹਾਂ ਬੀ. ਸੀ. ਸੁਪਰੀਮ ਕੋਰਟ ਤੋਂ ਚੋਣ ਨਤੀਜੇ ਨੂੰ ਚੁਣੌਤੀ ਦੇਣ ਵਾਲੀ ਆਪਣੀ ਪਟੀਸ਼ਨ ਵਾਪਸ ਲੈ ਲਈ ਹੈ। ਇਸ ਫੈਸਲੇ ਨਾਲ ਜਿੱਥੇ ਐਨ.ਡੀ.ਪੀ. ਦੇ ਗੈਰੀ ਬੇਗ ਦੀ ਜਿੱਤ ਪੱਕੀ ਹੋ ਗਈ ਹੈ, ਉੱਥੇ ਹੀ ਲੰਬੇ ਸਮੇਂ ਤੋਂ ਚੱਲੀ ਆ ਰਹੀ ਅਨਿਸ਼ਚਿਤਤਾ ਵੀ ਦੂਰ ਹੋ ਗਈ ਹੈ।

ਰੰਧਾਵਾ ਨੇ ਅਦਾਲਤ ਨੂੰ ਦੱਸਿਆ ਕਿ ਉਹ ਹੁਣ ਇਸ ਕੇਸ ਨੂੰ ਅੱਗੇ ਨਹੀਂ ਵਧਾਉਣਾ ਚਾਹੁੰਦੇ ਕਿਉਂਕਿ ਉਨ੍ਹਾਂ ਦਾ ਮੁੱਖ ਮਕਸਦ ਚੋਣ ਪ੍ਰਣਾਲੀ ਦੀਆਂ ਕਮੀਆਂ ਨੂੰ ਸਾਹਮਣੇ ਲਿਆਉਣਾ ਸੀ। ਉਨ੍ਹਾਂ ਅਨੁਸਾਰ, ਮੁੱਖ ਚੋਣ ਅਧਿਕਾਰੀ ਨੇ ਕੁਝ ਪ੍ਰਬੰਧਕੀ ਗਲਤੀਆਂ ਨੂੰ ਸਵੀਕਾਰ ਕੀਤਾ ਹੈ,ਜਿਸ ਨਾਲ ਉਨ੍ਹਾਂ ਦੇ ਸੰਘਰਸ਼ ਦਾ ਮਕਸਦ ਪੂਰਾ ਹੋਇਆ ਹੈ।

ਹੋਨਵੀਰ ਸਿੰਘ ਨੇ ਆਪਣੀ ਪਟੀਸ਼ਨ ਵਿਚ ਕਲੇਮ ਕੀਤਾ ਸੀ ਕਿ ਇਸ ਚੋਣ ਵਿਚ ​ਰਾਈਡਿੰਗ ਦੇ ਕੁਝ ਗੈਰ-ਨਿਵਾਸੀਆਂ ਨੇ ਵੀ ਵੋਟ ਪਾਈ ਅਤੇ ​ਕੁਝ ਵੋਟਰਾਂ ਵਲੋਂ ਇੱਕ ਤੋਂ ਵੱਧ ਵਾਰ ਵੋਟ ਪਾਈ ਗਈ। ਇਸ ਤੋਂ ਇਲਾਵਾ ​ਕੇਅਰ ਹੋਮ ਦੇ ਅਜਿਹੇ ਬਜ਼ੁਰਗਾਂ ਦੀਆਂ ਡਾਕ ਰਾਹੀਂ ਵੋਟਾਂ ਪਵਾਈਆਂ ਗਈਆਂ, ਜਿਨ੍ਹਾਂ ਨੂੰ ਚੋਣਾਂ ਹੋਣ ਬਾਰੇ ਪਤਾ ਤੱਕ ਨਹੀਂ ਸੀ। ਰੰਧਾਵਾ ਮੁਤਾਬਕ, ਇਸ ਕਾਨੂੰਨੀ ਲੜਾਈ ਵਿਚ $200,000 ਤੋਂ ਵੱਧ ਖਰਚ ਹੋਇਆ ਹੈ।