10.91C Vancouver 10.91C VancouverJan 21, 2026 5:46 PM - Connect Newsroom - Ramandeep Kaur with files from The Canadian Press
ਸਰੀ ਦੇ ਇੱਕ 33 ਸਾਲਾ ਮੁਲਜ਼ਮ ਨੂੰ ਵੈਨਕੂਵਰ ਆਈਲੈਂਡ ਦੀ ਅਦਾਲਤ ਨੇ ਨਾਬਾਲਗ ਲੜਕੀ ਨਾਲ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਵਿਚ 5 ਸਾਲ ਜੇਲ੍ਹ ਦੀ ਸਜ਼ਾ ਸੁਣਾਈ ਹੈ। ਪੁਲਿਸ ਵੱਲੋਂ ਬੁੱਧਵਾਰ ਨੂੰ ਜਾਰੀ ਬਿਆਨ ਅਨੁਸਾਰ, ਡਿਲਨ ਕਾਲੇਬ ਪਾਰਟਨੇਨ ਨੇ 2023 ਵਿਚ ਸਨੈਪਚੈਟ ਰਾਹੀਂ ਪੀੜਤ ਨਾਲ ਸੰਪਰਕ ਕੀਤਾ ਸੀ। ਅਪ੍ਰੈਲ 2024 ਵਿਚ ਉਹ ਸਰੀ ਤੋਂ ਕੈਂਪਬੈਲ ਰਿਵਰ ਪਹੁੰਚਿਆ, ਜਿੱਥੇ ਉਸ ਨੇ ਪੀੜਤ ਨਾਲ ਮੁਲਾਕਾਤ ਕੀਤੀ ਅਤੇ ਅਪਰਾਧ ਨੂੰ ਅੰਜਾਮ ਦਿੱਤਾ।
ਪੁਲਿਸ ਨੂੰ ਘਟਨਾ ਵਾਲੇ ਦਿਨ ਹੀ ਮਾਮਲੇ ਦੀ ਜਾਣਕਾਰੀ ਮਿਲ ਗਈ ਸੀ, ਜਿਸ ਤੋਂ ਤੁਰੰਤ ਬਾਅਦ ਪਾਰਟਨੇਨ ਨੂੰ ਕੈਂਪਬੈਲ ਰਿਵਰ ਵਿਚ ਗ੍ਰਿਫ਼ਤਾਰ ਕਰ ਲਿਆ ਗਿਆ ਅਤੇ ਇਸ ਤੋਂ ਬਾਅਦ ਉਸ ਨੂੰ ਅਦਾਲਤੀ ਕਾਰਵਾਈ ਦੀ ਉਡੀਕ ਦੌਰਾਨ ਕੁਝ ਸਖ਼ਤ ਸ਼ਰਤਾਂ 'ਤੇ ਰਿਹਾਅ ਕੀਤਾ ਗਿਆ ਸੀ।
ਇਨ੍ਹਾਂ ਸ਼ਰਤਾਂ ਵਿਚ ਉਸ ਨੂੰ ਫੈਸਲਾ ਆਉਣ ਤੱਕ ਸ਼ਹਿਰ ਦੀ ਹੱਦ ਅੰਦਰ ਦਾਖ਼ਲ ਹੋਣ ਦੀ ਮਨਾਹੀ ਕੀਤੀ ਗਈ ਸੀ। 13 ਜਨਵਰੀ 2026 ਨੂੰ ਅਦਾਲਤ ਨੇ ਉਸ ਨੂੰ ਸਜ਼ਾ ਸੁਣਾਈ, ਨਾਲ ਹੀ ਉਸ ਦਾ ਨਾਂ ਨੈਸ਼ਨਲ ਸੈਕਸ ਓਫੈਂਡਰ ਰਜਿਸਟਰੀ ਵਿਚ ਦਰਜ ਕਰਨ ਅਤੇ ਡੀ.ਐਨ.ਏ. ਸੈਂਪਲ ਲੈਣ ਦਾ ਵੀ ਹੁਕਮ ਦਿੱਤਾ। ਕਾਂਸਟੇਬਲ ਮੌਰੀ ਟਾਇਰ ਨੇ ਕਿਹਾ ਕਿ ਇਹ ਕੇਸ ਮਾਪਿਆਂ ਲਈ ਚਿਤਾਵਨੀ ਹੈ ਕਿ ਕਿਵੇਂ ਸੋਸ਼ਲ ਮੀਡੀਆ ਨੂੰ ਅਪਰਾਧੀਆਂ ਵੱਲੋਂ ਬੱਚਿਆਂ ਤੱਕ ਪਹੁੰਚਣ ਲਈ ਵਰਤਿਆ ਜਾ ਸਕਦਾ ਹੈ।
