21.55C Vancouver 21.55C VancouverJan 14, 2026 5:36 PM - Connect Newsroom - Ramandeep Kaur with files from The Canadian Press
ਸਰੀ ਦੇ ਨਿਊਟਨ ਵਿਚ ਇੱਕ ਕਾਰੋਬਰ 'ਤੇ ਗੋਲੀਆਂ ਚਲਾਈਆਂ ਗਈਆਂ ਹਨ। ਪੁਲਿਸ ਦਾ ਮੰਨਣਾ ਹੈ ਕਿ ਮਾਮਲਾ ਜ਼ਬਰੀ ਵਸੂਲੀ ਨਾਲ ਸਬੰਧਤ ਹੋ ਸਕਦਾ ਹੈ। ਐਸ.ਪੀ.ਐਸ. ਮੁਤਾਬਕ, ਅੱਜ ਵੱਡੇ ਤੜਕੇ ਕਰੀਬ ਦੋ ਵਜੇ ਔਫੀਸਰ ਨੂੰ 80 ਐਵੇਨਿਊ ਦੇ ਨਜ਼ਦੀਕ ਕਿੰਗ ਜਾਰਜ ਬੁਲੇਵਾਰਡ 'ਤੇ ਸਥਿਤ ਬਿਜ਼ਨਸ 'ਤੇ ਫਾਇਰਿੰਗ ਹੋਣ ਦੀਆਂ ਰਿਪੋਰਟਸ ਮਿਲੀਆਂ, ਇਸ ਨਾਲ ਕਾਰੋਬਾਰ ਨੂੰ ਨੁਕਸਾਨ ਪਹੁੰਚਿਆ ਹੈ ਪਰ ਕੋਈ ਜ਼ਖਮੀ ਨਹੀਂ ਹੋਇਆ।
ਸਾਰਜੈਂਟ ਟਾਈਗ ਪੋਲਕ ਨੇ ਪੁਸ਼ਟੀ ਕੀਤੀ ਕਿ ਇਹ ਇਸ ਸਾਲ ਦੀ ਸ਼ੁਰੂਆਤ ਤੋਂ ਹੁਣ ਤੱਕ ਜ਼ਬਰੀ ਵਸੂਲੀ ਨਾਲ ਸਬੰਧਤ 16ਵੀਂ ਜਾਂਚ ਹੈ ਅਤੇ ਸ਼ੂਟਿੰਗ ਨਾਲ ਜੁੜੀ ਤੀਜੀ ਵਾਰਦਾਤ ਹੈ। ਸਾਰਜੈਂਟ ਪੋਲਕ ਨੇ ਕਿਹਾ ਕਿ ਇਹ ਸਾਡੇ ਲਈ ਵੀ ਚਿੰਤਾਜਨਕ ਹੈ ਅਤੇ ਜਾਂਚਕਰਤਾ ਇਨ੍ਹਾਂ ਮਾਮਲਿਆਂ ਨੂੰ ਹੱਲ ਕਰਨ ਦੀ ਕੋਸ਼ਿਸ਼ ਕਰਨ ਲਈ ਪੂਰੀ ਮਿਹਨਤ ਨਾਲ ਕੰਮ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪੁਲਿਸ ਸੂਬੇ ਦੀ ਐਕਸਟੋਸ਼ਨ ਟਾਸਕ ਫੋਰਸ ਨਾਲ ਸਹਿਯੋਗ ਕਰਨ ਤੋਂ ਇਲਾਵਾ ਹੋਰ ਔਫੀਸਰ ਵੀ ਭਰਤੀ ਕਰ ਰਹੀ ਹੈ ਅਤੇ ਖੁਫੀਆ ਤਰੀਕਿਆਂ 'ਤੇ ਵੀ ਜ਼ੋਰ ਦਿੱਤਾ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਅਸੀਂ ਆਪਣੀਆਂ ਕੁਝ ਯੂਨਿਟਸ ਨੂੰ ਹੋਰ ਜ਼ਿੰਮੇਵਾਰੀਆਂ ਤੋਂ ਬਦਲ ਕੇ ਜ਼ਬਰੀ ਵਸੂਲੀ 'ਤੇ ਵਧੇਰੇ ਫੋਕਸ ਕੀਤਾ ਹੈ। ਗੌਰਤਲਬ ਹੈ ਕਿ ਪਿਛਲੇ ਹਫ਼ਤੇ ਤੋਂ ਲੋਅਰ ਮੇਨਲੈਂਡ ਵਿਚ ਲਗਭਗ ਲਗਾਤਾਰ ਸ਼ੂਟਿੰਗਸ ਦੀਆਂ ਵਾਰਦਾਤਾਂ ਰਿਪੋਰਟ ਕੀਤੀਆਂ ਜਾ ਰਹੀਆਂ ਹਨ, ਜਿਸ ਨਾਲ ਲੋਕਾਂ ਵਿਚ ਸਰਕਾਰ ਅਤੇ ਪ੍ਰਸ਼ਾਸਨ ਖਿਲਾਫ ਗੁੱਸਾ ਭੜਕ ਰਿਹਾ ਹੈ।
