13.16C Vancouver 13.16C VancouverAug 25, 2023 7:23 PM - The Canadian Press
ਬੀਜਿੰਗ ਅਤੇ ਓਟਾਵਾ ਆਪਸ ਵਿੱਚ ਗੱਲਬਾਤ ਕਰ ਰਹੇ ਹਨ ਕਿ ਜੂਨ ਵਿੱਚ ਇੱਕ ਅਮਰੀਕੀ ਡੀਲ ਤੋਂ ਬਾਅਦ ਚੀਨ ਅਤੇ ਕੈਨੇਡਾ ਵਿਚਕਾਰ ਉਡਾਣਾਂ ਨੂੰ ਕਿਵੇਂ ਵਧਾਇਆ ਜਾਵੇ।
ਟ੍ਰਾਂਸਪੋਰਟ ਕੈਨੇਡਾ ਦਾ ਕਹਿਣਾ ਹੈ ਕਿ ਦੋਵਾਂ ਦੇਸ਼ਾਂ ਵਿਚਕਾਰ ਕੋਵਿਡ-19 ਤੋਂ ਪਹਿਲਾਂ 2019 ਵਿੱਚ ਗਰਮੀਆਂ ਦੌਰਾਨ ਹਫਤੇ ਵਿੱਚ 100 ਤੋਂ ਵੱਧ ਉਡਾਣਾਂ ਹੁੰਦੀਆਂ ਸਨ, ਪਰ ਹੁਣ ਹਫ਼ਤਾਵਾਰੀ ਉਡਾਣਾਂ ਦੀ ਗਿਣਤੀ ਬਹੁਤ ਘੱਟ ਗਈ ਹੈ।
ਇਹ ਗਿਣਤੀ ਇਸ ਸੀਜ਼ਨ ਵਿੱਚ ਸਿਰਫ 10 ‘ਤੇ ਆ ਗਈ ਹੈ।
ਇਹ ਗਿਰਾਵਟ ਚੀਨ ਦੇ ਸਖਤ ਕੋਵਿਡ-19 ਨਿਯਮਾਂ ਤੋਂ ਪੈਦਾ ਹੋਈ ਹੈ, ਜਿਸ ਵਿੱਚ ਵਿਦੇਸ਼ੀ ਉਡਾਣਾਂ ਅਤੇ ਵਾਰ-ਵਾਰ ਕੁਆਰੰਟੀਨ ਅਤੇ ਸੈਲਾਨੀਆਂ ਲਈ ਟੈਸਟਿੰਗ ਦੀਆਂ ਸ਼ਰਤਾਂ ਸ਼ਾਮਲ ਸਨ।
ਹਾਲਾਂਕਿ ਚੀਨ ਨੇ ਇਸ ਸਾਲ ਦੇ ਸ਼ੁਰੂ ਵਿਚ ਕੋਵਿਡ ਨਿਯਮਾਂ ਵਿਚ ਢਿੱਲ ਦੇ ਦਿੱਤੀ ਸੀ।
ਏਵੀਏਸ਼ਨ ਐਨਲਿਸਟ ਹੈਲੇਨ ਬੈਕਰ ਨੇ ਕਿਹਾ ਕੋਵਿਡ ਨਿਯਮਾਂ ਦੇ ਚਲਦਿਆਂ ਸਿੱਧੀਆਂ ਉਡਾਣਾਂ ਨੂੰ ਬੰਦ ਕੀਤਾ ਗਿਆ ਸੀ।
ਉਦੋਂ ਤੋਂ ਹੁਣ ਤੱਕ ਚੀਨ ਅਤੇ ਕੈਨੇਡਾ ਦਰਮਿਆਨ ਸਿੱਧੀਆਂ ਫਲਾਈਟਸ ਮੁੜ ਬਹਾਲ ਨਹੀਂ ਹੋਈਆਂ।
ਇਸੇ ਦੌਰਾਨ, ਚੀਨ ਨੇ ਕੈਨੇਡਾ ਨੂੰ ਟੂਰ ਗਰੁੱਪਾਂ ਲਈ ਮਨਜ਼ੂਰਸ਼ੁਦਾ ਅੰਤਰਰਾਸ਼ਟਰੀ ਯਾਤਰਾ ਸਥਾਨਾਂ ਦੀ ਸੂਚੀ ਵਿੱਚੋਂ ਬਾਹਰ ਕਰ ਦਿੱਤਾ ਹੈ।
ਕੈਨੇਡਾ ਅਤੇ ਚੀਨ ਦਰਮਿਆਨ ਵਿਦੇਸ਼ੀ ਦਖ਼ਲਅੰਦਾਜ਼ੀ ਵਰਗੇ ਮੁੱਦਿਆਂ ਦੇ ਚਲਦਿਆਂ ਚੀਨ ਸਰਕਾਰ ਨੇ ਇਹ ਫ਼ੈਸਲਾ ਲਿਆ ਸੀ।
ਫਿਰ ਵੀ ਦੋਵੇਂ ਦੇਸ਼ ਕਹਿ ਰਹੇ ਹਨ ਕਿ ਉਹ ਉਡਾਣਾਂ ਦੀ ਗਿਣਤੀ ਵਧਾਉਣ ਲਈ ਵਿਚਾਰ ਕਰ ਰਹੇ ਹਨ।
ਅਮਰੀਕਾ ਅਤੇ ਚੀਨ ਵਿਚਾਲੇ ਹਫ਼ਤਾਵਾਰੀ ਉਡਾਣਾਂ ਨੂੰ ਦੁੱਗਣਾ ਕਰਨ ਦਾ ਸਮਝੌਤਾ ਹੋਇਆ ਹੈ ਅਤੇ ਕੈਨੇਡਾ ਨੇ ਸੰਕੇਤ ਦਿੱਤਾ ਹੈ ਕਿ ਉਹ ਹਾਲ ਹੀ ਵਿਚ ਚੀਨ ਦੇ ਅਮਰੀਕਾ ਨਾਲ ਹੋਏ ਸਮਝੌਤੇ ਦੀ ਤਰਜ਼ ‘ਤੇ ਇਕਰਾਰਨਾਮਾ ਕਰਨ ਦੀ ਮੰਗ ਕਰ ਸਕਦਾ ਹੈ।
