ਵੈਨਕੂਵਰ ਦੇ ਸਟੈਨਲੀ ਪਾਰਕ ਵਿੱਚ ਕਾਰ ਦਰੱਖਤ ਨਾਲ ਟਕਰਾਉਣ ਕਾਰਨ ਇੱਕ ਨੌਜਵਾਨ ਦੀ ਮੌਤ

ਵੈਨਕੂਵਰ ਦੇ ਸਟੈਨਲੀ ਪਾਰਕ ਵਿਚ ਅੱਜ ਸਵੇਰ ਮੰਦਭਾਗੀ ਘਟਨਾ ਵਾਪਰੀ, ਇੱਥੇ ਇੱਕ ਕਾਰ ਦਰੱਖਤ ਨਾਲ ਟਕਰਾਉਣ ਕਾਰਨ ਇੱਕ ਨੌਜਵਾਨ ਦੀ ਮੌਤ ਹੋ ਗਈ। ਵੈਨਕੂਵਰ ਪੁਲਿਸ ਦਾ ਕਹਿਣਾ ਹੈ ਕਿ ਮ੍ਰਿਤਕ ਨੌਜਵਾਨ 18 ਸਾਲ ਦਾ ਸੀ। ਪੁਲਿਸ ਨੇ ਦੱਸਿਆ ਕਿ ਚਿੱਟੇ ਰੰਗ ਦੀ ਬੀ.ਐਮ.ਡਬਲਿਊ ਸਵੇਰੇ 3 ਵਜੇ ਦੇ ਕਰੀਬ ਦੂਜੇ ਅਤੇ ਤੀਜੇ ਬੀਚ ਵਿਚਕਾਰ ਸਟੈਨਲੀ ਪਾਰਕ ਡਰਾਈਵ 'ਤੇ ਜਾ ਰਹੀ ਸੀ ਜਦੋਂ ਕਾਰ ਬੇਕਾਬੂ ਹੋ ਕੇ ਇੱਕ ਦਰੱਖਤ ਨਾਲ ਟਕਰਾ ਗਈ।

ਇਸ ਘਟਨਾ ਵਿਚ ਡਰਾਈਵਰ ਨੂੰ ਜ਼ਖਮੀ ਹਾਲਤ ਵਿਚ ਹਸਪਤਾਲ ਲਿਜਾਇਆ ਗਿਆ, ਜਦੋਂ ਕਿ 18 ਸਾਲਾ ਨੌਜਵਾਨ ਜੋ ਯਾਤਰੀ ਸੀਟ 'ਤੇ ਸੀ ਉਸ ਦੀ ਮੌਕੇ 'ਤੇ ਮੌਤ ਹੋ ਗਈ।

ਪੁਲਿਸ ਨੇ ਬਿਆਨ ਵਿਚ ਕਿਹਾ ਕਿ ਜਾਂਚਕਰਤਾ ਨੂੰ ਡਰਾਈਵਰ ਦੇ ਸ਼ਰਾਬ ਜਾਂ ਕਿਸੇ ਹੋਰ ਨਸ਼ੇ ਵਿਚ ਹੋਣ ਦਾ ਸ਼ੱਕ ਨਹੀਂ ਹੈ। ਵੈਨਕੂਵਰ ਪੁਲਿਸ ਨੇ ਜਾਂਚ ਵਿਚ ਚਸ਼ਮਦੀਦਾਂ ਤੋਂ ਸਹਿਯੋਗ ਮੰਗਿਆ ਹੈ ਅਤੇ ਵੀਡੀਓ ਫੁਟੇਜ ਲੱਭਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।