14.37C Vancouver 14.37C VancouverDec 11, 2024 5:40 PM - The Canadian Press
ਕੈਨੇਡਾ ਪੋਸਟ ਦੇ 55 ਹਜ਼ਾਰ ਤੋਂ ਵੱਧ ਕਰਮਚਾਰੀਆਂ ਦੀ ਦੇਸ਼ ਪੱਧਰੀ ਹੜਤਾਲ 27ਵੇਂ ਦਿਨ ਵਿਚ ਦਾਖ਼ਲ ਹੋ ਗਈ ਹੈ। ਹਾਲਾਂਕਿ, ਜਾਣਕਾਰੀ ਮਿਲੀ ਹੈ ਕਿ ਪੋਸਟਲ ਵਰਕਰਜ਼ ਯੂਨੀਅਨ ਨੇ 4 ਸਾਲਾ ਦੌਰਾਨ ਤਨਖਾਹਾਂ ਵਿਚ ਵਾਧੇ ਦੀ ਆਪਣੀ ਮੰਗ ਨੂੰ ਘਟਾ ਕੇ 19 ਫੀਸਦੀ ਕਰ ਦਿੱਤਾ ਹੈ ਤਾਂ ਕਿ ਕੰਪਨੀ ਨਾਲ ਕਿਸੇ ਸਮਝੌਤੇ ’ਤੇ ਪਹੁੰਚਿਆ ਜਾ ਸਕੇ। ਇਸ ਤੋਂ ਪਹਿਲਾਂ ਯੂਨੀਅਨ 4 ਸਾਲਾਂ ਵਿਚ 24 ਫੀਸਦੀ ਤਨਖਾਹ ਵਾਧੇ ਦੀ ਮੰਗ ਕਰ ਰਹੀ ਸੀ।
ਇਸ ਤੋਂ ਇਲਾਵਾ ਯੂਨੀਅਨ ਨੇ ਸ਼ਹਿਰੀ ਅਤੇ ਪੇਂਡੂ ਸੌਦੇਬਾਜ਼ੀ ਇਕਾਈਆਂ ਨੂੰ ਮਰਜ ਕਰਨ ਦੀ ਮੰਗ ਵੀ ਛੱਡ ਦਿੱਤੀ ਹੈ। ਉਥੇ ਹੀ, ਸਰਕਾਰ ਮੁਤਾਬਕ, ਕੈਨੇਡਾ ਪੋਸਟ ਦੀ ਹੜਤਾਲ ਕਾਰਨ ਹਜ਼ਾਰਾਂ ਪਾਸਪੋਰਟ ਡਿਲਿਵਰ ਹੋਣ ਤੋਂ ਫਸੇ ਹਨ। ਰੁਜ਼ਗਾਰ ਅਤੇ ਸਮਾਜਿਕ ਵਿਕਾਸ ਡਿਪਾਰਟਮੈਂਟ ਮੁਤਾਬਕ, ਸਰਵਿਸ ਕੈਨੇਡਾ ਵਲੋਂ ਲਗਭਗ 185,000 ਪਾਸਪੋਰਟ ਰੋਕ ਕੇ ਰੱਖੇ ਗਏ ਹਨ, ਜਿਨ੍ਹਾਂ ਨੂੰ ਭੇਜਣ ਲਈ ਹੜਤਾਲ ਸਮਾਪਤ ਹੋਣ ਦੀ ਉਡੀਕ ਕੀਤੀ ਜਾ ਰਹੀ ਹੈ।
ਹਾਲਾਂਕਿ, ਡਿਪਾਰਟਮੈਂਟ ਨੇ ਕਿਹਾ ਕਿ ਕੈਨੇਡੀਅਨ ਆਪਣੇ ਨੇੜੇ ਦੀ ਸਰਵਿਸ ਕੈਨੇਡਾ ਲੋਕੇਸ਼ਨ ’ਤੇ ਪਾਸਪੋਰਟ ਟਰਾਂਸਫਰ ਕਰਨ ਦੀ ਬੇਨਤੀ ਕਰ ਸਕਦੇ ਹਨ ਜੋ ਪਿੱਕ ਅੱਪ ਦੀ ਪੇਸ਼ਕਸ਼ ਕਰਦੇ ਹਨ।
