ਕੈਲਗਰੀ 'ਚ ਇਕ ਹਫਤੇ ਦੌਰਾਨ ਦੋ ਟੈਸਲਾ ਗੱਡੀਆਂ ਨੂੰ ਜਾਣ-ਬੁੱਝ ਕੇ ਲਾਈ ਗਈ ਅੱਗ

ਕੈਲਗਰੀ ਵਿਚ ਇਸ ਹਫਤੇ ਦੋ ਟੇਸਲਾ ਵਾਹਨਾਂ ਨੂੰ ਜਾਣ-ਬੁੱਝ ਕੇ ਅੱਗ ਦੇ ਹਵਾਲੇ ਕੀਤਾ ਗਿਆ, ਜਿਸ ਦੀ ਪੁਲਿਸ ਵਲੋਂ ਜਾਂਚ ਕੀਤੀ ਜਾ ਰਹੀ ਹੈ। ਪੁਲਿਸ ਮੁਤਾਬਕ ਪਹਿਲੀ ਵਾਰਦਾਤ 12 ਐਵੇਨਿਊ ਸਾਊਥ ਈਸਟ ਅਤੇ ਮੈਕਲੋਡ ਟ੍ਰੇਲ ਸਾਊਥ ਈਸਟ ਦੇ ਟੇਸਲਾ ਚਾਰਜਿੰਗ ਸਟੇਸ਼ਨ ਵਿਚ ਮੰਗਲਵਾਰ ਰਾਤ ਕਰੀਬ 11 ਵਜੇ ਵਾਪਰੀ। ਇਕ ਔਰਤ ਨੇ ਆਪਣੀ ਗੱਡੀ ਰਾਤ ਕਰੀਬ 9.30 ਵਜੇ ਇੱਥੇ ਪਾਰਕ ਕੀਤੀ ਸੀ ਅਤੇ ਉਸ ਨੂੰ ਜਾਣਕਾਰੀ ਮਿਲੀ ਕਿ ਉਸ ਦੀ ਗੱਡੀ ਚਾਰਜ ਨਹੀਂ ਹੋ ਰਹੀ। ਜਦ ਉਹ ਗੱਡੀ ਚੈੱਕ ਕਰਨ ਗਈ ਤਾਂ ਇਹ ਅੱਗ ਦੀਆਂ ਲਪਟਾਂ ਵਿਚ ਘਿਰੀ ਹੋਈ ਸੀ।

ਅਗਲੇ ਦਿਨ ਸਾਊਥ ਗਲੇਨਮੋਰ ਟ੍ਰੇਲ ਦੇ ਫੇਅਰਮਾਉਂਟ ਡਰਾਈਵ ਸਾਊਥ ਈਸਟ ਦੇ ਟੇਸਲਾ ਸਟੋਰੇਜ ਲਾਟ ਖੜ੍ਹੀ ਗੱਡੀ ਨੂੰ ਰਾਤ ਕਰੀਬ 9.50 ਵਜੇ ਸਾੜਿਆ ਗਿਆ। ਪੁਲਿਸ ਮੁਤਾਬਕ ਦੋਵੇਂ ਵਾਹਨਾਂ ਨੂੰ ਜਲਣਸ਼ੀਲ ਪਦਾਰਥ ਸੁੱਟ ਕੇ ਅੱਗ ਲਾਈ ਗਈ ਅਤੇ ਦੋਵੇਂ ਵਾਰਦਾਤਾਂ ਇਕ-ਦੂਜੇ ਨਾਲ ਸਬੰਧਤ ਹਨ।

ਔਫੀਸਰਜ਼ ਇਸ ਸਬੰਧੀ ਹੋਰ ਸਬੂਤ ਇਕੱਠੇ ਕਰ ਰਹੇ ਹਨ। ਕੈਲਗਰੀ ਔਫੀਸਰ ਨੇ ਸਲਾਹ ਦਿੱਤੀ ਕਿ ਜਦ ਕੋਈ ਅਸੁਰੱਖਿਅਤ ਥਾਂ 'ਤੇ ਵਾਹਨ ਪਾਰਕ ਕਰੇ ਤਾਂ ਇਸ ਦੇ ਸੈਂਟਰੀ ਮੋਡ ਨੂੰ ਚਲਾ ਦੇਵੇ ਤਾਂ ਕਿ ਜੇਕਰ ਕੋਈ ਸ਼ੱਕੀ ਵਾਰਦਾਤ ਵਾਪਰਦੀ ਹੈ ਤਾਂ ਇਸ ਦੇ ਮਾਲਕ ਨੂੰ ਨੋਟੀਫਿਕੇਸ਼ਨ ਮਿਲੇਗੀ। ਗੌਰਤਲਬ ਹੈ ਕਿ ਪਿਛਲੇ ਹਫਤੇ ਬੀ. ਸੀ. ਅਤੇ ਹੈਮਿਲਟਨ ਵਿਚ ਟੇਸਲਾ ਦੇ ਕਈ ਵਾਹਨ ਨੁਕਸਾਨੇ ਗਏ ਹਨ ਅਤੇ ਇਸ ਕੰਪਨੀ ਖਿਲਾਫ ਲੋਕ ਵਿਰੋਧ ਪ੍ਰਦਰਸ਼ਨ ਕਰ ਰਹੇ ਹਨ।