ਕੈਨੇਡੀਅਨਾਂ ਲਈ ਰਾਹਤ ਭਰੀ ਖ਼ਬਰ: ਬੈਂਕ ਆਫ ਕੈਨੇਡਾ ਨੇ ਵਿਆਜ ਦਰ ਵਿਚ ਕੀਤੀ ਵੱਡੀ ਕਟੌਤੀ

ਕੈਨੇਡੀਅਨਾਂ ਨੂੰ ਰਾਹਤ ਦਿੰਦੇ ਬੈਂਕ ਆਫ ਕੈਨੇਡਾ ਨੇ ਬੁੱਧਵਾਰ ਨੂੰ ਵਿਆਜ ਦਰ ਵਿਚ 0.50 ਫੀਸਦੀ ਦੀ ਵੱਡੀ ਕਟੌਤੀ ਕੀਤੀ ਹੈ। ਇਸ ਦਾ ਵੈਰੀਏਬਲ ਰੇਟ ਵਾਲੇ ਕੈਨੇਡੀਅਨ ਘਰ ਦੇ ਮਾਲਕ ਨੂੰ ਨਾਲ ਹੀ ਫਾਇਦਾ ਮਿਲੇਗਾ ਅਤੇ ਹੋਰ ਵੀ ਕੈਨੇਡੀਅਨਾਂ ਦੇ ਵੈਰੀਏਬਲ ਰੇਟ ’ਤੇ ਸ਼ਿਫਟ ਹੋਣ ਦੀ ਉਮੀਦ ਹੈ ਕਿਉਂਕਿ ਸੈਂਟਰਲ ਬੈਂਕ ਵਲੋਂ ਪਾਲਿਸੀ ਰੇਟ ਵਿਚ ਕਟੌਤੀ ਨਾਲ ਪਰਿਵਰਤਨਸ਼ੀਲ-ਦਰ ਮੌਰਗੇਜ ਵਿਚ ਤੁਰੰਤ ਇਸ ਦਾ ਲਾਭ ਮਿਲਦਾ ਹੈ।

ਬੈਂਕ ਆਫ ਕੈਨੇਡਾ ਵਲੋਂ ਆਪਣਾ ਪ੍ਰਮੁੱਖ ਪਾਲਿਸੀ ਰੇਟ 0.50 ਫੀਸਦੀ ਘਟਾ ਕੇ 3.25 ਫੀਸਦੀ ਕੀਤਾ ਗਿਆ ਹੈ। ਇਹ ਸੈਂਟਰਲ ਬੈਂਕ ਵਲੋਂ ਲਗਾਤਾਰ ਪੰਜਵਾਂ ਰੇਟ ਕੱਟ ਅਤੇ ਦੂਜੀ ਵੱਡੀ ਕਟੌਤੀ ਹੈ।

ਕੈਨੇਡਾ ਦੀ ਆਰਥਿਕਤਾ ਵਿਚ ਰਫ਼ਤਾਰ ਹੌਲੀ ਦੇ ਸੰਕੇਤਾਂ ਦੇ ਮੱਦੇਨਜ਼ਰ ਅਰਥਸ਼ਾਸਤਰੀ ਪਹਿਲਾਂ ਹੀ ਇੰਟਰਸਟ ਵਿਚ ਅੱਧਾ ਫੀਸਦੀ ਕਟੌਤੀ ਦੀ ਉਮੀਦ ਜਤਾ ਰਹੇ ਸਨ। ਬੈਂਕ ਆਫ ਕੈਨੇਡਾ ਨੇ ਹੁਣ ਅੱਗੇ ਹੋਰ ਜਲਦ ਕਟੌਤੀ ਦੇ ਸੰਕੇਤ ਨਹੀਂ ਦਿੱਤੇ ਹਨ।

ਗਵਰਨਰ ਟਿਫ ਮੈਕਲੇਮ ਨੇ ਸੰਕੇਤ ਦਿੱਤਾ ਕਿ ਸੈਂਟਰਲ ਬੈਂਕ ਸੰਭਾਵਤ ਤੌਰ ’ਤੇ ਵਿਆਜ ਦਰਾਂ ਬਾਰੇ ਹੁਣ ਫੈਸਲੇ ਲਈ ਹੌਲੀ-ਹੌਲੀ ਪਹੁੰਚ ਅਪਣਾਏਗਾ। ਬੈਂਕ ਆਫ ਕੈਨੇਡਾ ਦੀ ਅਗਲੀ ਬੈਠਕ ਹੁਣ 29 ਜਨਵਰੀ 2025 ਨੂੰ ਹੋਵੇਗੀ।