12.53C Vancouver 12.53C VancouverMar 1, 2024 4:21 PM - The Connect News
ਐਲਬਰਟਾ ਸਰਕਾਰ ਨੇ ਬੀਤੇ ਦਿਨ ਪੇਸ਼ ਕੀਤੇ ਬਜਟ ਵਿਚ ਐਲਾਨ ਕੀਤਾ ਕਿ ਇਲੈਕਟ੍ਰਿਕ ਵਾਹਨਾਂ ’ਤੇ $200 ਸਾਲਾਨਾ ਟੈਕਸ ਲਾਗੂ ਕੀਤਾ ਜਾਵੇਗਾ। ਇਹ ਟੈਕਸ ਜਨਵਰੀ 2025 ਤੋਂ ਲਾਗੂ ਹੋਵੇਗਾ। ਇਸ ਟੈਕਸ ਦਾ ਭੁਗਤਾਨ ਉਦੋਂ ਕੀਤਾ ਜਾਵੇਗਾ ਜਦੋਂ ਮਾਲਕ ਆਪਣੇ ਵਾਹਨਾਂ ਨੂੰ ਰਜਿਸਟਰ ਕਰਨਗੇ ਅਤੇ ਮੌਜੂਦਾ ਰਜਿਸਟਰੇਸ਼ਨ ਫੀਸ ਤੋਂ ਇਲਾਵਾ ਫੀਸ ਭਰੀ ਜਾਵੇਗੀ।
ਐਲਬਰਟਾ ਸਰਕਾਰ ਮੁਤਾਬਕ ਗੈਸ ਵਾਹਨਾਂ ਦੇ ਡਰਾਈਵਜ਼ ਜਿੰਨਾ ਸਲਾਨਾ ਬਾਲਣ ਟੈਕਸ ਭਰਦੇ ਹਨ, ਉਨਾ ਹੀ ਇਲੈਕਟ੍ਰਿਕ ਵਾਹਨਾਂ ਲਈ ਵਸੂਲਿਆ ਜਾਵੇਗਾ। ਹਾਈਬਿ੍ਰਡ ਵਾਹਨਾਂ ਦੇ ਮਾਲਕਾਂ ’ਤੇ ਇਹ ਟੈਕਸ ਲਾਗੂ ਨਹੀਂ ਹੋਵੇਗਾ।
ਸਰਕਾਰ ਦਾ ਕਹਿਣਾ ਹੈ ਕਿ ਇਲੈਕਟ੍ਰਿਕ ਵਾਹਨ ਭਾਰੇ ਹੁੰਦੇ ਹਨ ਅਤੇ ਸੜਕਾਂ ਨੂੰ ਨੁਕਸਾਨ ਪਹੁੰਚਾਉਂਦੇ ਹਨ ਪਰ ਇਨ੍ਹਾਂ ਦੇ ਮਾਲਕ ਬਾਲਣ ਟੈਕਸ ਨਹੀਂ ਭਰਦੇ। 2024-25 ਲਈ ਇਸ ਟੈਕਸ ਨਾਲ ਸਰਕਾਰ ਨੂੰ $1 ਮਿਲੀਅਨ ਦਾ ਰੈਵੇਨਿਊ ਇਕੱਠਾ ਹੋਣ ਦੀ ਆਸ ਹੈ।
ਸਰਕਾਰੀ ਅਨੁਮਾਨਾਂ ਮੁਤਾਬਕ ਇਲੈਕਟ੍ਰਿਕ ਵਾਹਨ ਅਪਣਾਉਣ ਵਿਚ ਤੇਜ਼ੀ ਆਉਣ ਦੀ ਉਮੀਦ ਹੈ,ਇਸ ਨਾਲ ਸਰਕਾਰ ਨੂੰ 2025-26 ਵਿਚ $5 ਮਿਲੀਅਨ ਅਤੇ 2026-27 ਵਿਚ $8 ਮਿਲੀਅਨ ਦੀ ਕਮਾਈ ਹੋਣ ਦੀ ਆਸ ਹੈ।
ਬੀਤੇ ਸਾਲ ਜੂਨ ਵਿਚ ਹੋਏ ਸਰਵੇ ਮੁਤਾਬਕ 66 ਫੀਸਦੀ ਕੈਨੇਡੀਅਨ ਦਾ ਕਹਿਣਾ ਸੀ ਕਿ ਉਹ ਇਲੈਕਟ੍ਰਿਕ ਵਾਹਨ ਲੈਣ ਦਾ ਵਿਚਾਰ ਕਰ ਰਹੇ ਹਨ। ਹਾਲਾਂਕਿ ਟੈਕਸ ਲਾਗੂ ਹੋਣ ਨਾਲ ਲੋਕਾਂ ਦੇ ਵਿਚਾਰ ਵਿਚ ਤਬਦੀਲੀ ਆਉਣ ਦੀ ਆਸ ਹੈ।
