23.8C Vancouver 23.8C VancouverDec 19, 2023 6:42 PM - The Canadian Press
ਕੈਨੇਡਾ ਸਰਕਾਰ ਨੇ ਇਲੈਕਟ੍ਰਿਕ ਵਾਹਨ ਪਾਲਿਸੀ ਜਾਰੀ ਕਰ ਦਿੱਤੀ ਹੈ, ਜਿਸ ਤਹਿਤ 2035 ਤੋਂ ਵਿਕਣ ਵਾਲੇ ਸਾਰੇ ਨਵੇਂ ਵਾਹਨ ਜ਼ੀਰੋ ਨਿਕਾਸ ਹੋਣਗੇ। ਇਸ ਵਿੱਚ ਕਾਰਾਂ,ਐਸ.ਯੂ.ਵੀ ਅਤੇ ਲਾਈਟ ਟਰੱਕ ਸ਼ਾਮਲ ਹਨ। ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਤੋਂ ਪਹਿਲਾਂ ਇਹ ਯਕੀਨੀ ਕੀਤਾ ਜਾ ਰਿਹਾ ਹੈ ਕਿ 2030 ਤੱਕ ਘੱਟੋ-ਘੱਟ 5 ਨਵੇਂ ਯਾਤਰੀ ਵਾਹਨ ਵਿੱਚੋਂ ਇੱਕ ਇਲੈਕਟ੍ਰਿਕ ਵਾਹਨ ਹੋਵੇ।
ਮੰਗਲਵਾਰ ਨੂੰ ਪ੍ਰੈੱਸ ਕਾਨਫਰੰਸ ਵਿੱਚ ਵਾਤਾਵਰਣ ਮੰਤਰੀ ਸਟੀਵਨ ਗਿਲਬੌਲਟ ਨੇ ਨਵੇਂ ਨਿਯਮਾਂ ਦੀ ਘੋਸ਼ਣਾ ਕੀਤੀ। ਉਨ੍ਹਾਂ ਕਿਹਾ ਕਿ ਇਹ ਨਿਯਮ ਵਧੇਰੇ ਕਿਫਾਇਤੀ ਇਲੈਕਟ੍ਰਿਕ ਵਾਹਨ ਅਤੇ ਹੋਰ ਚਾਰਜਿੰਗ ਸਟੇਸ਼ਨ ਦੀ ਸਥਾਪਨਾ ਲਈ ਰਾਹ ਪੱਧਰਾ ਕਰਨਗੇ।
ਮਿਨਿਸਟਰ ਨੇ ਕਿਹਾ ਕਿ ਕੈਨੇਡਾ ਦੇ ਘੱਟ ਕਾਰਬਨ ਭਵਿੱਖ ਲਈ ਟ੍ਰਾਂਸਪੋਰਟੇਸ਼ਨ ਨੂੰ ਨਿਕਾਸ ਮੁਕਤ ਕਰਨਾ ਜ਼ਰੂਰੀ ਹੈ ਜੋ ਮੌਜੂਦਾ ਸਮੇਂ ਗ੍ਰੀਨਹਾਉਸ ਗੈਸ ਨਿਕਾਸ ਵਿੱਚ 22 ਫੀਸਦੀ ਲਈ ਜਿੰਮੇਵਾਰ ਹੈ।
ਗੌਰਤਲਬ ਹੈ ਕਿ ਕੈਨੇਡਾ ਦੀ ਇਲੈਕਟ੍ਰਿਕ ਵਾਹਨ ਨੀਤੀ ਕੈਲੀਫੋਰਨੀਆ ਵੱਲੋਂ ਅਪਣਾਏ ਗਏ ਨਿਯਮਾਂ ਦੇ ਸਮਾਨ ਹੈ। ਕੈਲੀਫੋਰਨੀਆ ਦੇ ਨਿਯਮ ਵੀ ਇਹੀ ਕਹਿੰਦੇ ਹਨ ਕਿ 2035 ਤੋਂ ਵਿਕਣ ਵਾਲੇ ਨਵੇਂ ਵਾਹਨ 100 ਫੀਸਦੀ ਜ਼ੀਰੋ ਨਿਕਾਸ ਹੋਣਗੇ ਯਾਨੀ ਬੈਟਰੀ ਨਾਲ ਚੱਲਣ ਵਾਲਾ ਇਲੈਕਟ੍ਰਿਕ ਕਾਰਾਂ, ਪਲੱਗ-ਇਨ ਹਾਈਬ੍ਰਿਡ ਇਲੈਕਟ੍ਰਿਕ ਕਾਰਾਂ ਅਤੇ ਹਾਈਡ੍ਰੋਜਨ ਮਾਡਲ ਦੀ ਹੀ ਵਿਕਰੀ ਹੋਵੇਗੀ।
