ਔਨਲਾਈਨ ਨਿਊਜ਼ ਐਕਟ ਅੱਜ ਤੋਂ ਹੋਇਆ ਲਾਗੂ, ਮੀਡੀਆ ਇੰਡਸਟਰੀ ਨੂੰ ਮਿਲੇਗੀ ਮਦਦ

ਕੈਨੇਡਾ ਵਿੱਚ ਫੇਸਬੁੱਕ ਅਤੇ ਇੰਸਟਾਗ੍ਰਾਮ ਦੀ ਪੇਰੈਂਟ ਕੰਪਨੀ ਮੇਟਾ ਵੱਲੋਂ ਖ਼ਬਰਾਂ 'ਤੇ ਲਗਾਈ ਗਈ ਰੋਕ ਵਿਚਕਾਰ ਸਰਕਾਰ ਦਾ ਵਿਵਾਦਤ ਔਨਲਾਈਨ ਨਿਊਜ਼ ਐਕਟ 19 ਦਸੰਬਰ ਯਾਨੀ ਅੱਜ ਤੋਂ ਲਾਗੂ ਹੋ ਗਿਆ ਹੈ। ਇਹ ਕਾਨੂੰਨ ਤਕਨੀਕੀ ਕੰਪਨੀਆਂ ਨੂੰ ਲੋਕਲ ਖਬਰਾਂ ਦੇ ਬਦਲੇ ਨਿਊਜ਼ ਆਊਟਲੈੱਟ ਨੂੰ ਭੁਗਤਾਨ ਕਰਨ ਦਾ ਆਦੇਸ਼ ਦਿੰਦਾ ਹੈ।

ਇਸ ਕਾਨੂੰਨ ਨਾਲ ਕੈਨੇਡਾ ਦੀ ਸੰਘਰਸ਼ ਕਰ ਰਹੀ ਮੀਡੀਆ ਇੰਡਸਟਰੀ ਨੂੰ ਮਦਦ ਮਿਲਣ ਵਾਲੀ ਹੈ ਕਿਉਂਕਿ ਹੁਣ ਤੱਕ ਔਨਲਾਈਨ ਵਿਗਿਆਪਨ ਦਾ ਵੱਡਾ ਹਿੱਸਾ ਡਿਜੀਟਲ ਪਲੇਟਫਾਰਮ ਕਮਾ ਰਹੇ ਸਨ ਅਤੇ ਵਿਗਿਆਪਨ ਦੇ ਨੁਕਸਾਨ ਦੇ ਚਲਦੇ ਹਰ ਸਾਲ ਕਈ ਲੋਕਲ ਨਿਊਜ਼ ਆਊਟਲੈੱਟ ਬੰਦ ਹੋ ਰਹੇ ਸਨ।

ਸਰਕਾਰ ਮੁਤਾਬਕ, 2022 ਵਿੱਚ ਕੈਨੇਡਾ ਵਿੱਚ ਔਨਲਾਈਨ ਵਿਗਿਆਪਨ ਦੀ ਆਮਦਨ $14 ਬਿਲੀਅਨ ਸੀ ਅਤੇ ਇਸ ਦਾ ਲਗਭਗ 80 ਫੀਸਦੀ ਹਿੱਸਾ ਦੋ ਵੱਡੇ ਪਲੇਟਫਾਰਮ ਪ੍ਰਾਪਤ ਕਰ ਰਹੇ ਸਨ। ਗੂਗਲ ਨੇ ਜਿੱਥੇ ਸਰਕਾਰ ਨਾਲ ਡੀਲ ਤਹਿਤ ਹਰ ਸਾਲ ਇੱਕ ਫਿਕਸਡ ਹਿੱਸਾ ਨਿਊਜ਼ ਆਊਟਲੈੱਟ ਨੂੰ ਦੇਣ ਦੀ ਸਹਿਮਤੀ ਦਿੱਤੀ ਹੈ, ਉਥੇ ਹੀ ਮੇਟਾ ਨੇ ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਕੈਨੇਡੀਅਨਜ਼ ਲਈ ਖ਼ਬਰਾਂ 'ਤੇ ਪਾਬੰਦੀ ਬਰਕਰਾਰ ਰੱਖੀ ਹੋਈ ਹੈ।

ਗੌਰਤਲਬ ਹੈ ਕਿ ਕੈਨੇਡਾ ਦਾ ਆਨਲਾਈਨ ਨਿਊਜ਼ ਐਕਟ ਸ਼ਾਹੀ ਮਨਜ਼ੂਰੀ ਪ੍ਰਾਪਤ ਕਰਨ ਦੇ 180 ਦਿਨਾਂ ਬਾਅਦ ਲਾਗੂ ਹੋਇਆ ਹੈ। ਇਸ ਨੂੰ 22 ਜੂਨ, 2023 ਨੂੰ ਸ਼ਾਹੀ ਮਨਜ਼ੂਰੀ ਮਿਲੀ ਸੀ।