ਕੈਨੇਡੀਅਨ ਸੰਸਦ ਦੀ ਕਾਰਵਾਈ ਅੱਜ ਤੋਂ ਸ਼ੁਰੂ ,ਪੋਇਲੀਵਰੇ ਪੇਸ਼ ਕਰ ਸਕਦੇ ਨੇ ਬੇਭਰੋਸਗੀ ਮਤਾ

ਕੈਨੇਡੀਅਨ ਸੰਸਦ ਦੀ ਕਾਰਵਾਈ ਅੱਜ ਤੋਂ ਸ਼ੁਰੂ ਹੋ ਗਈ ਹੈ ਅਤੇ ਇਸ ਸੈਸ਼ਨ ਦੌਰਾਨ ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਇਲੀਵਰੇ ਪੀ ਐੱਮ ਜਸਟਿਨ ਟਰੂਡੋ ਦੀ ਘੱਟ ਗਿਣਤੀ ਲਿਬਰਲ ਸਰਕਾਰ ਖਿਲਾਫ ਕਿਸੇ ਵੇਲੇ ਵੀ ਅਵਿਸ਼ਵਾਸ ਪ੍ਰਸਤਾਵ ਪੇਸ਼ ਕਰ ਸਕਦੇ ਹਨ।

ਖਾਸ ਗੱਲ ਇਹ ਹੈ ਕਿ ਐਨ ਡੀ ਪੀ ਪ੍ਰਧਾਨ ਜਗਮੀਤ ਸਿੰਘ ਨੇ ਭਾਵੇਂ ਲਿਬਰਲਸ ਨਾਲ ਸਮਝੌਤਾ ਤੋੜ ਦਿੱਤਾ ਹੈ ਪਰ ਪਾਰਟੀ ਨੇ ਨੇੜਲੇ ਭਵਿੱਖ ਵਿਚ ਚੋਣਾਂ ਦੀ ਕੋਈ ਦਿਲਚਸਪੀ ਨਹੀਂ ਦਿਖਾਈ ਹੈ ਪਰ ਪੋਇਲੀਵਰੇ ਸਰਕਾਰ ਡੇਗਣ ਲਈ ਪੂਰਾ ਦਬਾਅ ਬਣਾ ਰਹੇ ਹਨ। ਉਨ੍ਹਾਂ ਬਲਾਕ ਕਿਊਬੇਕੋਇਸ ਨੂੰ ਵੀ ਲਿਬਰਲਸ ਖਿਲਾਫ ਭੁਗਤਣ ਦੀ ਚੁਣੌਤੀ ਦਿੱਤੀ ਹੈ।

ਪੋਇਲੀਵਰੇ ਨੇ ਇਹ ਵੀ ਆਰੋਪ ਲਗਾਇਆ ਕਿ ਜਗਮੀਤ ਸਿੰਘ ਆਪਣੀ ਪੈਨਸ਼ਨ ਨੂੰ ਪੱਕੀ ਕਰਨ ਵਾਸਤੇ ਵੋਟਰਾਂ ਨੂੰ ਸਰਕਾਰ ਬਦਲਣ ਲਈ ਇੰਤਜ਼ਾਰ ਕਰਵਾ ਰਹੇ ਹਨ।

ਉੱਥੇ ਹੀ, ਜਗਮੀਤ ਸਿੰਘ ਨੇ ਪਲਟਵਾਰ ਕਰਦੇ ਕਿਹਾ ਹੈ ਕਿ ਉਨ੍ਹਾਂ ਦੀ ਪਾਰਟੀ ਕੈਨੇਡੀਅਨਜ਼ ਦੇ ਹਿੱਤ ਨੂੰ ਧਿਆਨ ਵਿਚ ਰੱਖਦੇ ਹੋਏ ਹੀ ਸਦਨ ਵਿਚ ਹੋਣ ਵਾਲੀ ਕਿਸੇ ਵੀ ਵੋਟਿੰਗ ਲਈ ਸੋਚ-ਸਮਝ ਕੇ ਫੈਸਲਾ ਲਵੇਗੀ। ਦੂਜੇ ਪਾਸੇ, ਬਲਾਕ ਕਿਊਬੇਕੋਇਸ ਕੁਝ ਸ਼ਰਤਾਂ ਨਾਲ ਸਰਕਾਰ ਨੂੰ ਸਪੋਰਟ ਦੇਣ ਲਈ ਤਿਆਰ ਹੈ।

ਗੌਰਤਲਬ ਹੈ ਕਿ ਸੰਸਦ ਵਿਚ ਕਈ ਮਹੱਤਵਪੂਰਨ ਬਿੱਲ ਪੈਂਡਿੰਗ ਹਨ, ਇਨ੍ਹਾਂ ਵਿਚ ਐੱਨ ਡੀ ਪੀ ਸਮਰਥਿਤ ਫਾਰਮਾਕੇਅਰ ਬਿੱਲ ਵੀ ਸ਼ਾਮਲ ਹੈ ਜੋ ਸੈਨੇਟ ਵਿਚ ਹੈ।