15.98C Vancouver 15.98C VancouverMay 2, 2024 4:23 PM - The Canadian Press
ਕੈਨੇਡੀਅਨਾਂ ਨੂੰ ਉੱਚ ਵਿਆਜ ਦਰ ਤੋਂ ਜੂਨ ਵਿਚ ਰਾਹਤ ਮਿਲ ਸਕਦੀ ਹੈ। ਬੈਂਕ ਆਫ਼ ਕੈਨੇਡਾ ਦੇ ਗਵਰਨਰ ਟਿਫ ਮੈਕਲੇਮ ਦਾ ਕਹਿਣਾ ਹੈ ਕਿ ਅਮਰੀਕਾ ਦੇ ਮੁਕਾਬਲੇ ਕੈਨੇਡਾ ਵਿਚ ਵਿਆਜ ਦਰ ਦਾ ਵਧੇਰੇ ਅਸਰ ਦਿਸ ਰਿਹਾ ਹੈ, ਜਿਸ ਨਾਲ ਆਉਣ ਵਾਲੇ ਮਹੀਨਿਆਂ ਵਿਚ ਦੋਹਾਂ ਮੁਲਕਾਂ ਦੀ ਮੁਦਰਾ ਨੀਤੀ ਵੱਖਰੀ ਸਟੇਜ ਸਥਾਪਤ ਕਰਦੀ ਨਜ਼ਰ ਆ ਸਕਦੀ ਹੈ।
ਬੀਤੀ ਸ਼ਾਮ ਸੈਨੇਟ ਦੀ ਬੈਕਿੰਗ ਕਮੇਟੀ ਸਾਹਮਣੇ ਪੇਸ਼ ਹੋਏ ਮੈਕਲੇਮ ਨੇ ਕਿਹਾ ਕਿ 6 ਮਹੀਨੇ ਪਹਿਲਾਂ ਅਮਰੀਕਾ ਦੀ ਆਰਥਿਕਤਾ ਵਿਚ ਮਹਿੰਗਾਈ ਦੀ ਕੁਝ ਚੰਗੀ ਤਸਵੀਰ ਦਿਸ ਰਹੀ ਸੀ, ਜਦੋਂ ਕਿ ਇਸ ਦੇ ਉਲਟ ਸਾਡੀ ਮਹਿੰਗਾਈ ਇੱਕ ਕਿਸਮ ਦੀ ਸਟਿਕੀ ਸੀ ਪਰ ਹਾਲ ਹੀ ਦੇ ਤਿੰਨ ਮਹੀਨਿਆਂ ਵਿਚ ਕੈਨੇਡਾ ਨੇ ਮਹਿੰਗਾਈ ਦਰ ਵਿਚ ਜੋ ਕਮੀ ਦਰਜ ਕੀਤੀ ਉਹ ਉਤਸ਼ਾਹਜਨਕ ਹੈ।
ਇਸ ਦੇ ਨਾਲ ਹੀ ਬੈਂਕ ਆਫ਼ ਕੈਨੇਡਾ ਦੇ ਗਵਰਨਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਨਹੀਂ ਲੱਗਦਾ ਕਿ ਪਿਛਲੇ ਮਹੀਨੇ ਪੇਸ਼ ਕੀਤੇ ਗਏ ਫੈਡਰਲ ਬਜਟ ਦਾ ਮਹਿੰਗਾਈ ’ਤੇ ਜ਼ਿਆਦਾ ਅਸਰ ਪਵੇਗਾ। ਗਵਰਨਰ ਦੀ ਇਹ ਟਿੱਪਣੀ ਕਾਫ਼ੀ ਮਹੱਤਵਪੂਰਨ ਹੈ ਕਿਉਂਕਿ ਬਜਟ ਖ਼ਰਚ ਕਾਰਨ ਵਿਆਜ ਦਰਾਂ ਵਿਚ ਕਟੌਤੀ ਦੇਰੀ ਨਾਲ ਹੋਣ ਦਾ ਖਦਸ਼ਾ ਜਤਾਇਆ ਜਾ ਰਿਹਾ ਸੀ।
ਅਰਥ ਸ਼ਾਸਤਰੀ ਅਤੇ ਨਿਵੇਸ਼ਕ ਉਮੀਦ ਕਰਦੇ ਹਨ ਕਿ ਬੈਂਕ ਆਫ ਕੈਨੇਡਾ ਜੂਨ ਜਾਂ ਜੁਲਾਈ ਵਿਚ ਵਿਆਜ ਦਰਾਂ ਨੂੰ ਘਟਾਉਣਾ ਸ਼ੁਰੂ ਕਰ ਸਕਦਾ ਹੈ, ਜਦੋਂ ਕਿ ਅਮਰੀਕਾ ਦੇ ਸੈਂਟਰਲ ਬੈਂਕ ਵਲੋਂ ਸਤੰਬਰ ਤੋਂ ਪਹਿਲਾਂ ਦਰਾਂ ਵਿਚ ਕਟੌਤੀ ਕੀਤੇ ਜਾਣ ਦੀ ਉਮੀਦ ਨਹੀਂ। ਹਾਲਾਂਕਿ, ਕੈਨੇਡੀਅਨਾਂ ਅਤੇ ਅਮਰੀਕਾ ਦੀਆਂ ਵਿਆਜ ਦਰਾਂ ਵਿਚਕਾਰ ਅੰਤਰ ਕੈਨੇਡੀਅਨ ਡਾਲਰ ’ਤੇ ਥੋੜ੍ਹੇ ਸਮੇਂ ਲਈ ਹੇਠਾਂ ਵੱਲ ਦਬਾਅ ਪਾ ਸਕਦਾ ਹੈ।
