ਜਗਮੀਤ ਸਿੰਘ ਤੇ ਪੋਲੀਵਰੇ ਦੀ ਬਹਿਸ ਤੋਂ ਬਾਅਦ ਐੱਮ.ਪੀ. ਨੇ ਸਦਨ ’ਚ ਵਧੇਰੇ ਅਨੁਸ਼ਾਸਨ ਯਕੀਨੀ ਬਣਾਉਣ ਦੀ ਕੀਤੀ ਮੰਗ

ਐੱਨ.ਡੀ.ਪੀ. ਦੇ ਹਾਊਸ ਲੀਡਰ ਪੀਟਰ ਜੂਲੀਅਨ ਅਤੇ ਗ੍ਰੀਨ ਪਾਰਟੀ ਦੀ ਲੀਡਰ ਐਲਿਜ਼ਾਬੈਥ ਮੇਅ ਨੇ ਪਿਛਲੇ ਹਫ਼ਤੇ ਸੰਸਦ ਵਿਚ ਪੋਲੀਵਰੇ ਅਤੇ ਜਗਮੀਤ ਸਿੰਘ ਵਿਚਕਾਰ ਤਿੱਖੀ ਬਹਿਸ ਤੋਂ ਬਾਅਦ ਤਣਾਅਪੂਰਨ ਹੋਏ ਮਾਹੌਲ ਨੂੰ ਦੇਖਦੇ ਹੋਏ ਸਪੀਕਰ ਗ੍ਰੇਗ ਫਰਗਸ ਨੂੰ ਹਾਊਸ ਵਿਚ ਵਧੇਰੇ ਅਨੁਸ਼ਾਸਨ ਯਕੀਨੀ ਬਣਾਉਣ ਦੀ ਮੰਗ ਕੀਤੀ ਹੈ।

ਗ੍ਰੀਨ ਪਾਰਟੀ ਦੀ ਲੀਡਰ ਨੇ ਕਿਹਾ ਕਿ ਵੀਰਵਾਰ ਪ੍ਰਸ਼ਨ ਕਾਲ ਦੌਰਾਨ ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਅਤੇ ਐੱਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਵਿਚਕਾਰ ਬਹਿਸ ਇੰਨੀ ਗਰਮ ਹੋ ਗਈ ਸੀ ਕਿ ਉਨ੍ਹਾਂ ਨੂੰ ਲੱਗਾ ਕਿ ਦੋਵੇਂ ਲੀਡਰਸ ਹੱਥੋਪਾਈ ਹੋ ਜਾਣਗੇ। ਕੰਜ਼ਰਵੇਟਿਵ ਦਾ ਇਲਜ਼ਾਮ ਸੀ ਕਿ ਜਗਮੀਤ ਸਿੰਘ ਨੇ ਪੋਲੀਵਰੇ ਨੂੰ ਲੜਨ ਦੀ ਚੁਣੌਤੀ ਦਿੱਤੀ, ਜਦੋਂ ਕਿ ਐੱਨ. ਡੀ. ਪੀ. ਨੇ ਕਿਹਾ ਕਿ ਜਗਮੀਤ ਸਿੰਘ ਸਿਰਫ ਪੋਲੀਵਰੇ ਦੇ ਬੋਲਾਂ ਖਿਲਾਫ ਖੜ੍ਹੇ ਹੋਏ ਸਨ।

ਜੂਲੀਅਨ ਅਤੇ ਮੇਅ ਨੇ ਕਿਹਾ ਕਿ ਇਨ੍ਹਾਂ ਹਰਕਤਾਂ ਨਾਲ ਸਦਨ ਦੀ ਮਰਿਆਦਾ ਭੰਗ ਹੋਈ ਹੈ ਅਤੇ ਸਪੀਕਰ ਇਸ ਤਰ੍ਹਾਂ ਦਾ ਦੁਬਾਰਾ ਨਾ ਹੋਣ ਦੇਣ। ਗੌਰਤਲਬ ਹੈ ਕਿ ਪੋਲੀਵਰੇ ਨੇ ਪ੍ਰਸ਼ਨਕਾਲ ਦੌਰਾਨ ਜਗਮੀਤ ਸਿੰਘ ਨੂੰ ਧੋਖੇਬਾਜ਼ ਤੇ ਵਿਕਿਆ ਹੋਇਆ ਲੀਡਰ ਕਹਿਣਾ ਸ਼ੁਰੂ ਕਰ ਦਿੱਤਾ ਸੀ। ਇਸ ਦੌਰਾਨ ਜਗਮੀਤ ਆਪਣੀ ਸੀਟ ਛੱਡ ਕੇ ਅੱਗੇ ਆ ਗਏ ਸਨ। ਹਾਊਸ ਦਾ ਮਾਹੌਲ ਵਿਗੜਦੇ ਦੇਖ ਸਪੀਕਰ ਨੂੰ ਉੱਠਣਾ ਪਿਆ ਸੀ।