13.91C Vancouver 13.91C VancouverSep 29, 2021 7:20 PM -
ਬੀ.ਸੀ. ਦੀ ਮੈਂਟਲ ਹੈਲਥ ਐਂਡ ਐਡਿਕਸ਼ਨਸ ਮੰਤਰੀ, ਸ਼ੀਲਾ ਮੈਲਕੌਮਸਨ ਨੇ ਓਵਰਡੋਜ਼ ਸੰਬੰਧੀ ਦਰਜ ਕੀਤੀਆਂ ਗਈਆਂ ਮੌਤਾਂ ਤੋਂ ਬਾਅਦ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ।
ਉਨ੍ਹਾਂ ਫਿਕਰ ਜਾਹਿਰ ਕਰਦੇ ਹੋਏ ਕਿਹਾ ਕਿ ਜਹਿਰੀਲੇ ਡਰੱਗਸ ਕਾਰਨ ਜਾਨ ਗਵਾ ਰਹੇ ਲੋਕਾਂ ਦੀ ਗਿਣਤੀ 'ਚ ਲਗਾਤਾਰ ਵਾਧਾ ਹੋ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਸੋਚ ਵਿੱਚ ਉਹ ਸਾਰੇ ਲੋਕ ਹਨ ਜਿੰਨਾ ਨੇ ਇਸ ਓਵਰਡੋਜ਼ ਕਾਰਨ ਕੋਈ ਆਪਣਾ ਗਵਾ ਦਿੱਤਾ ਹੈ।
ਉਨ੍ਹਾਂ ਕਿਹਾ ਕਿ ਸੇਵਾਵਾਂ ਅਤੇ ਸਹਿਯੋਗ 'ਚ ਲਗਾਤਾਰ ਕੀਤੇ ਗਏ ਵਾਧੇ ਦੇ ਬਾਵਜੂਦ ਇਹ ਸੰਕਟ ਰੁਕਣ ਦਾ ਨਾਮ ਨਹੀਂ ਲੈ ਰਿਹਾ।
ਉਨ੍ਹਾਂ ਕਿਹਾ ਕਿ ਜਦ ਆਪਣੇ ਆਲੇ-ਦੁਆਲੇ ਜਹਿਰੀਲੇ ਡਰੱਗਸ ਦੀ ਸਪਲਾਈ ਹੋ ਰਹੀ ਹੈ ਤਾਂ ਕੋਸ਼ਿਸ਼ ਕੀਤੀ ਜਾਵੇ ਕਿ ਜੇਕਰ ਆਪਣੇ ਕਿਸੇ ਕਰੀਬੀ ਬਾਰੇ ਪਤਾ ਹੈ ਕਿ ਉਹ ਡਰੱਗਸ ਦਾ ਸੇਵਨ ਕਰਦੇ ਹਨ ਤਾਂ ਉਨ੍ਹਾਂ ਦਾ ਧਿਆਨ ਰੱਖਿਆ ਜਾਵੇ ਅਤੇ ਉਨ੍ਹਾਂ ਲਈ ਇਸ ਪ੍ਰੀਕਿਰਿਆ ਨੂੰ ਵੱਧ ਤੋਂ ਵੱਧ ਸੁਰੱਖਿਅਤ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਜਾਵੇ।
ਉਨ੍ਹਾਂ ਕਿਹਾ ਕਿ ਕਿਸੇ ਪੀੜਤ ਦੀ ਜਾਨ ਬਚਾਉਣ ਲਈ ਨੈਲੋਕਸੋਨ ਇੱਕ ਅਹਿਮ ਸਾਧਨ ਹੈ।
ਜੁਲਾਈ ਮਹੀਨੇ 'ਚ 184 ਓਵਰਡੋਜ਼ ਸੰਬੰਧੀ ਮੌਤਾਂ ਹੋਈਆਂ ਰਿਪੋਰਟ
ਬੀ.ਸੀ. ਕੋਰੋਨਰਸ ਸਰਵਿਸ ਨੇ ਜੁਲਾਈ ਮਹੀਨੇ ਦੇ ਓਵਰਡੋਜ਼ ਸੰਬੰਧੀ ਮੌਤਾਂ ਦੇ ਅੰਕੜੇ ਸਾਂਝੇ ਕੀਤੇ ਹਨ।
ਸੂਬੇ 'ਚ ਸਾਲ ਦੇ 7ਵੇਂ ਮਹੀਨੇ ਦੌਰਾਨ 184 ਲੋਕਾਂ ਨੇ ਓਵਰਡੋਜ਼ ਕਾਰਨ ਜਾਨ ਗਵਾ ਦਿੱਤੀ।
ਇਹ ਸੂਬੇ 'ਚ ਲਗਾਤਾਰ 17ਵਾਂ ਮਹੀਨਾ ਹੈ ਜਦ ਓਵਰਡੋਜ਼ ਸੰਬੰਧੀ 100 ਤੋਂ ਵਧੇਰੇ ਮੌਤਾਂ ਰਿਪੋਰਟ ਹੋਈਆਂ ਹਨ।
ਇਹ ਬੀ.ਸੀ. ਦੇ ਇਤਿਹਾਸ 'ਚ ਕਿਸੇ ਵੀ ਮਹੀਨੇ 'ਚ ਰਿਕਾਰਡ ਹੋਇਆ ਓਵਰਡੋਜ਼ ਸੰਬੰਧੀ ਮੌਤਾਂ ਦਾ ਦੂਜਾ ਸਭ ਤੋਂ ਵੱਡਾ ਅੰਕੜਾ ਹੈ।
ਜੂਨ 2020 'ਚ ਓਵਰਡੋਜ਼ ਸੰਬੰਧੀ ਮੌਤਾਂ ਦੀ ਗਿਣਤੀ 186 ਰਹੀ ਸੀ।
ਹੁਣ ਇਸ ਸਾਲ 7 ਮਹੀਨੇ ਦੇ ਸਮੇਂ ਦੌਰਾਨ ਓਵਰਡੋਜ਼ ਕਾਰਨ ਹੋਈਆਂ ਮੌਤਾਂ ਦੀ ਗਿਣਤੀ 1,204 ਤਕ ਪਹੁੰਚ ਗਈ ਹੈ।
ਇਹ ਬੀ.ਸੀ. ਲਈ ਇਸ ਸਾਲ ਪਹਿਲੇ 7 ਮਹੀਨੇ 'ਚ ਦਰਜ ਹੋਇਆ ਓਵਰਡੋਜ਼ ਸੰਬੰਧੀ ਮੌਤਾਂ ਦਾ ਸਭ ਤੋਂ ਵੱਡਾ ਅੰਕੜਾ ਹੈ।
ਸਾਲ 2017 'ਚ ਜਨਵਰੀ ਤੋਂ ਜੁਲਾਈ ਮਹੀਨੇ ਵਿਚਾਲੇ 954 ਮੌਤਾਂ ਦਰਜ ਹੋਈਆਂ ਸਨ।
ਇਸ ਸਾਲ ਹੁਣ ਤਕ ਓਵਰਡੋਜ਼ ਕਾਰਨ ਜਾਨ ਗਵਾਉਣ ਵਾਲਿਆਂ 'ਚ 72% ਲੋਕ 30 ਤੋਂ 59 ਸਾਲ ਵਿਚਾਲੇ ਦੇ ਸਨ।
ਇਸ 'ਚ 79% ਮੌਤਾਂ ਪੁਰਸ਼ਾਂ ਨਾਲ ਸੰਬੰਧਤ ਸਨ।
ਸਭ ਤੋਂ ਵੱਧ ਮੌਤਾਂ ਵੈਨਕੂਵਰ, ਸਰੀ ਅਤੇ ਵਿਕਟੋਰੀਆ 'ਚ ਦਰਜ ਹੋਈਆਂ ਹਨ।
ਇਸ ਅੰਕੜੇ ਦੇ ਨਾਲ ਹੁਣ ਬੀ.ਸੀ. 'ਚ ਲਗਾਤਾਰ 7ਵਾਂ ਮਹੀਨਾ ਹੈ ਜਦ ਔਸਤ ਅਨੁਸਾਰ ਹਰ ਰੋਜ਼ 5 ਤੋਂ ਵਧੇਰੇ ਲੋਕਾਂ ਨੇ ਓਵਰਡੋਜ਼ ਕਾਰਨ ਜਾਨ ਗਵਾ ਦਿੱਤੀ।
