17.04C Vancouver 17.04C VancouverOct 27, 2022 8:31 PM - Connect News
ਮੈਨੀਟੋਬਾ 'ਚ ਇੱਕ ਅੱਗ ਲੱਗਣ ਦੀ ਘਟਨਾ 'ਚ 4 ਬੱਚਿਆਂ ਦੀ ਮੌਤ ਦੀ ਦੁੱਖਦਾਈ ਖਬਰ ਉਜਾਗਰ ਹੋਈ ਹੈ।
ਘਟਨਾ ਥਾਂਪਸਨ ਦੇ ਇਲਾਕੇ 'ਚ ਵਾਪਰੀ ਦੱਸੀ ਗਈ ਹੈ।
ਘਰ 'ਚ ਲੱਗੀ ਅੱਗ ਤੋਂ ਬਚ ਕੇ ਬਾਹਰ ਨਿਕਲੀ 41 ਸਾਲਾ ਔਰਤ ਦਾ ਕਹਿਣਾ ਸੀ ਕਿ ਉਹ ਬੇਸਮੈਂਟ 'ਚ ਇੱਕ 62 ਸਾਲਾ ਆਦਮੀ ਨਾਲ ਮੌਜੂਦ ਸੀ ਜਦ ਉਨ੍ਹਾਂ ਨੂੰ ਘਰ ਦੇ ਉੱਪਰ ਵਾਲੇ ਪਾਸੇ ਅੱਗ ਦਾ ਖੜਕਾ ਸੁਣਾਈ ਦਿੱਤਾ।
ਉਹ ਕਿਸੇ ਤਰ੍ਹਾਂ ਘਰ ਦੇ ਉੱਪਰ ਵਾਲੇ ਹਿੱਸੇ 'ਚ ਪਹੁੰਚੇ ਪਰ ਅੱਗ ਅਤੇ ਧੂਏਂ ਕਾਰਨ ਉਹ ਘਰ ਦੇ ਬਾਹਰ ਨਿਕਲਣ ਲਈ ਮਜਬੂਰ ਹੋ ਗਏ।
ਔਰਤ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੇ 4 ਤੋਂ 13 ਸਾਲ ਦੀ ਉਮਰ ਵਿਚਾਲੇ ਦੇ 5 ਬੱਚੇ ਘਰ ਦੇ ਉੱਪਰ ਵਾਲੇ ਪਾਸੇ ਸਨ।
ਉਨ੍ਹਾਂ ਦੱਸਿਆ ਕਿ 13 ਸਾਲਾ ਲੜਕੀ ਤਾਂ ਘਰ ਦੀ ਖਿੜਕੀ ਵਿੱਚੋਂ ਬਾਹਰ ਨਿਕਲ ਗਈ ਪਰ ਬਾਕੀ ਬੱਚੇ ਬਾਹਰ ਨਹੀਂ ਨਿਕਲ ਸਕੇ।
ਘਰ ਬੁਰੀ ਤਰ੍ਹਾਂ ਅੱਗ ਦੀਆਂ ਲਪਟਾਂ 'ਚ ਘਿਰ ਗਿਆ ਸੀ ਅਤੇ ਫਾਇਰ ਟੀਮਾਂ ਨੂੰ ਅੱਗ 'ਤੇ ਕਾਬੂ ਪਾਉਣ 'ਚ ਕਾਫੀ ਸਮਾਂ ਲੱਗਿਆ।
ਅੱਗ 'ਤੇ ਕਾਬੂ ਪਾਉਣ ਤੋਂ ਬਾਅਦ ਘਰ 'ਚ ਦਾਖਿਲ ਹੋਏ ਫਾਇਰ ਕਰਮੀਆਂ ਨੂੰ ਅੰਦਰ 10 ਸਾਲ ਦੀ ਬੱਚੀ, 9, 7 ਅਤੇ 4 ਸਾਲ ਦੇ ਲੜਕੇ ਮਿਲੇ।
ਚਾਰੇ ਬੱਚਿਆਂ ਨੂੰ ਹਸਪਤਾਲ ਪਹੁੰਚਾਇਆ ਗਿਆ ਜਿੱਥੇ ਬੱਚਿਆਂ ਦੀ ਮੌਤ ਹੋ ਗਈ।
ਅੱਗ ਲੱਗਣ ਦੇ ਕਾਰਨ ਸੰਬੰਧੀ ਜਾਂਚ ਕੀਤੀ ਜਾ ਰਹੀ ਹੈ।
ਮੈਨੀਟੋਬਾ ਦੀ ਪ੍ਰੀਮਿਅਰ ਹੈਦਰ ਸਟੈਫਨਸਨ ਨੇ ਘਟਨਾ ਨੂੰ ਬੇਹੱਦ ਦੁੱਖਦਾਈ ਦੱਸਿਆ।
