20.09C Vancouver 20.09C VancouverDec 22, 2020 4:39 PM -
ਸਰਦੀਆਂ ਦੇ ਪਹਿਲੇ ਦਿਨ ਦੱਖਣੀ ਬ੍ਰਿਟਿਸ਼ ਕੋਲੰਬੀਆ ਦੇ ਵਿੱਚ ਪਈ ਬਰਫ਼ ਕਾਰਨ ਹਜ਼ਾਰਾਂ ਲੋਕਾਂ ਦੇ ਘਰਾਂ ਦੀ ਬਿਜਲੀ ਚਲੀ ਗਈ ਸੀ ਜਿਸ ਨੂੰ ਠੀਕ ਕਰਨ ਦੇ ਯਤਨ ਬੀ.ਸੀ.ਹਾਇਡ੍ਰੋ ਵੱਲੋਂ ਤਕਰੀਬਨ ਸਾਰੀ ਰਾਤ ਜਾਰੀ ਰਹੇ।
ਬੀ.ਸੀ.ਹਾਇਡ੍ਰੋ ਮੁਤਾਬਕ ਬਰਫ਼ੀਲੇ ਤੂਫ਼ਾਨ ਕਾਰਨ ਤਕਰੀਬਨ 90,000 ਗਾਹਕਾਂ ਦੇ ਘਰਾਂ ਦੀ ਬਿਜਲੀ ਗੁੱਲ ਹੋ ਗਈ ਸੀ।
ਵੈਨਕੂਵਰ ਆਇਲੈਂਡ ਅਤੇ ਦੱਖਣੀ ਤੱਟ ਦੇ ਤਕਰੀਬਨ 38,000 ਗਾਹਕਾਂ ਦੀ ਬਿਜਲੀ ਬੀ.ਸੀ.ਹਾਇਡ੍ਰੋ ਮੰਗਲਵਾਰ ਸਵੇਰ ਤੱਕ ਵਾਪਸ ਲਿਆਉਣ ਵਿੱਚ ਸਫਲ ਰਹੀ।
ਕੋਕਾਹਾਲਾ ਹਾਈਵੇਅ ’ਤੇ ਖਰਾਬ ਮੌਸਮ ਕਾਰਨ ਦਰਜਨਾਂ ਸੜਕ ਹਾਦਸੇ ਵਾਪਰੇ ਸਨ ਅਤੇ ਸੋਮਵਾਰ ਤਕਰੀਬਨ ਸਾਰਾ ਦਿਨ ਇਹ ਰਸਤਾ ਬੰਦ ਰੱਖਣਾ ਪਿਆ।
ਮੰਗਲਵਾਰ ਤੱਕ ਬੀ.ਸੀ. ਦੇ ਇੰਟੀਰਿਅਰ ਦੇ ਜ਼ਿਆਦਾਤਰ ਰਸਤੇ ਸਾਫ ਕਰ ਦਿੱਤੇ ਗਏ ਸਨ।
ਬੀ.ਸੀ. ਸਰਕਾਰ ਦੀ ਵੈੱਬਸਾਈਟ ਡ੍ਰਾਈਵ ਬੀ.ਸੀ. ਮੁਤਾਬਕ ਮੈਨਿੰਗ ਪਾਰਕ ਦੇ ਵਿਚੋਂ ਦੀ ਲੰਘਦੀ ਹਾਈਵੇਅ 3 ਮੰਗਲਵਾਰ ਸਵੇਰ ਤੱਕ ਵੀ ਬੰਦ ਸੀ ਅਤੇ ਇੰਟੀਰੀਅਰ ਵਿੱਚ ਪਹਾੜੀ ਰਾਹਾਂ ’ਤੇ ਸਿਰਫ਼ ਜ਼ਰੂਰੀ ਸਫ਼ਰ ਕਰਨ ਦੀ ਹਦਾਇਤ ਦਿੱਤੀ ਗਈ ਹੈ।
ਵੈਨਕੂਵਰ ਆਇਲੈਂਡ ਅਤੇ ਮੇਨਲੈਂਡ ਵਿਚਕਾਰ ਜਿੱਥੇ ਸੋਮਵਾਰ ਨੂੰ ਮੌਸਮ ਕਾਰਨ ਫੇਰੀ ਸੇਵਾਵਾਂ ਰੱਦ ਕਰਨੀਆਂ ਪਈਆਂ ਸਨ ਉਥੇ ਹੀ ਮੰਗਲਵਾਰ ਨੂੰ ਹਾਲਾਤ ਬਿਹਤਰ ਜਾਪ ਰਹੇ ਹਨ।
ਇਨਵਾਇਰਮੈਂਟ ਕੈਨੇਡਾ ਨੇ ਜਿਥੇ ਪੂਰਬੀ ਵੈਨਕੂਵਰ ਆਇਲੈਂਡ, ਗਲਫ ਆਇਲੈਂਡ ਅਤੇ ਕੈਮਲੂਪਸ ਦੇ ਇਲਾਕਿਆਂ ਵਿੱਚ ਤੇਜ਼ ਹਵਾਵਾਂ ਨਾਲ ਸੰਬੰਧੀ ਚਿਤਾਵਨੀਆਂ ਹਟਾ ਦਿੱਤੀਆਂ ਹਨ ਓਥੇ ਹੀ ਸੂਬੇ ਦੇ ਦੱਖਣ ਪੂਰਬੀ ਹਿੱਸੇ ਵਿੱਚ 10 ਤੋਂ 25 ਸੈਂਟੀਮੀਟਰ ਬਰਫਬਾਰੀ ਹੋਣ ਦਾ ਅਨੁਮਾਨ ਹੈ।
