9.74C Vancouver 9.74C VancouverDec 15, 2025 5:55 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਵਿਚ ਫਲੂ ਨਾਲ ਸਬੰਧਤ ਮਾਮਲੇ ਵੱਧ ਰਹੇ ਹਨ। ਪਬਲਿਕ ਹੈਲਥ ਮੁਤਾਬਕ, ਔਟਵਾ ਅਤੇ ਈਸਟਰਨ ਓਨਟਾਰੀਓ ਵਿਚ ਇਨਫਲੂਐਨਜ਼ਾ ਨਾਲ ਸਬੰਧਤ ਪੇਚੀਦਗੀਆਂ ਕਾਰਨ ਪਿਛਲੇ ਦੋ ਹਫ਼ਤਿਆਂ ਵਿਚ ਤਿੰਨ ਬੱਚਿਆਂ ਦੀ ਮੌਤ ਹੋ ਗਈ ਹੈ। ਔਟਵਾ ਅਤੇ ਈਸਟਰਨ ਓਨਟਾਰੀਓ ਹੈਲਥ ਯੂਨਿਟ ਦੇ ਮੈਡੀਕਲ ਔਫੀਸਰ ਮੁਤਾਬਕ, ਮ੍ਰਿਤਕ ਬੱਚਿਆਂ ਦੀ ਉਮਰ ਪੰਜ ਤੋਂ ਨੌਂ ਸਾਲ ਵਿਚਕਾਰ ਸੀ।
ਪਬਲਿਕ ਹੈਲਥ ਯੂਨਿਟ ਨੇ ਕਿਹਾ ਕਿ ਓਨਟਾਰੀਓ ਭਰ ਵਿਚ ਇਨਫਲੂਐਨਜ਼ਾ ਏ ਦੇ ਮਾਮਲਿਆਂ ਵਿਚ ਤੇਜ਼ੀ ਨਾਲ ਅਤੇ ਮਹੱਤਵਪੂਰਨ ਵਾਧਾ ਹੋਇਆ ਹੈ, ਜਦੋਂ ਕਿ ਫਲੂ ਦਾ ਬਹੁਤ ਸਾਰਾ ਸੀਜ਼ਨ ਅਜੇ ਬਾਕੀ ਹੈ।
ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਇਹ ਮੌਤਾਂ ਇੱਕ ਸਖ਼ਤ ਸੰਦੇਸ਼ ਹਨ ਕਿ ਫਲੂ ਗੰਭੀਰ ਬਿਮਾਰੀ ਦਾ ਕਾਰਨ ਬਣ ਸਕਦਾ ਹੈ ਅਤੇ ਇਸ ਲਈ ਫਲੂ ਦਾ ਟੀਕਾ ਲਗਵਾਉਣਾ ਬੱਚਿਆਂ, ਮਾਪਿਆਂ ਅਤੇ ਦੇਖਭਾਲ ਕਰਨ ਵਾਲਿਆਂ ਲਈ ਖਾਸ ਤੌਰ 'ਤੇ ਮਹੱਤਵਪੂਰਨ ਹੈ। ਪਬਲਿਕ ਹੈਲਥ ਏਜੰਸੀ ਔਫ ਕੈਨੇਡਾ ਦੀ ਹਫ਼ਤਾਵਾਰੀ ਨਿਗਰਾਨੀ ਰਿਪੋਰਟ ਅਨੁਸਾਰ, ਅਗਸਤ ਤੋਂ ਹੁਣ ਤੱਕ ਇਨਫਲੂਐਨਜ਼ਾ ਕਾਰਨ 37 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।
ਏਜੰਸੀ ਮੁਤਾਬਕ, ਅਗਸਤ ਤੋਂ ਹੁਣ ਤੱਕ ਫਲੂ ਨਾਲ ਸਬੰਧਤ 180 ਬੱਚਿਆਂ ਦੇ ਹਸਪਤਾਲਾਂ ਵਿਚ ਦਾਖਲ ਹੋਣ ਦੇ ਮਾਮਲੇ ਦੇਖੇ ਜਾ ਚੁੱਕੇ ਹਨ ਅਤੇ 24 ਆਈ.ਸੀ.ਯੂ. ਵਿਚ ਭਰਤੀ ਹੋਏ ਹਨ।
