ਬੀ.ਸੀ. ਵਿੱਚ ਬਰਫ਼ ਖਿਸਕਣ ਕਾਰਨ ਤਿੰਨ ਹੈਲੀ-ਸਕੀਅਰ ਦੀ ਮੌਤ

ਬ੍ਰਿਟਿਸ਼ ਕੋਲੰਬੀਆ ਦੇ ਕੂਟੇਨੇ ਖੇਤਰ ਤੋਂ ਮੰਦਭਾਗੀ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਸੋਮਵਾਰ ਨੂੰ ਬਰਫ਼ ਦੀ ਢਿੱਗ ਖਿਸਕਣ ਕਾਰਨ 3 ਸਕੀਅਰ ਦੀ ਮੌਤ ਹੋ ਗਈ ਅਤੇ 1 ਗੰਭੀਰ ਜ਼ਖਮੀ ਹੈ। ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਇਹ ਘਟਨਾ ਦੁਪਹਿਰ 1 ਵਜੇ ਵਾਪਰੀ, 4 ਹੈਲੀ-ਸਕੀਅਰ - ਕੂਟੇਨੇ ਝੀਲ ਦੀ ਈਸਟ ਸਾਈਡ ਦੇ ਐਲਪਾਈਨ ਖੇਤਰ ਵਿਚ ਇੱਕ ਸਲਾਈਡ ਵਿਚ ਫਸ ਗਏ ਸਨ।

ਪੁਲਿਸ ਨੇ ਕਿਹਾ ਕਿ ਸਕੀਅਰ ਨੇ ਘਟਨਾ ਤੋਂ ਠੀਕ ਪਹਿਲਾਂ ਕਸਲੋ ਪਿੰਡ ਕੋਲ ਸਕੀਇੰਗ ਪੂਰੀ ਕੀਤੀ ਸੀ ਅਤੇ ਉਹ ਆਪਣੇ ਹੈਲੀਕਾਪਟਰ ਦੇ ਆਉਣ ਲਈ ਟ੍ਰੀ ਲਾਈਨ ਦੇ ਹੇਠਾਂ ਉਡੀਕ ਕਰ ਰਹੇ ਸਨ, ਜਦੋਂ ਪਾਇਲਟ ਕੋਲ ਆ ਰਿਹਾ ਸੀ ਤਾਂ ਉਸ ਨੇ ਬਰਫ਼ ਦੀ ਢਿੱਗ ਡਿੱਗਦੀ ਦੇਖ ਸਾਇਰਨ ਵਜਾਇਆ, ਇਸ ਦੌਰਾਨ ਇੱਕ ਗਰੁੱਪ ਉਥੋਂ ਨਿਕਲਣ ਵਿਚ ਕਾਮਯਾਬ ਰਿਹਾ, ਜਦੋਂ ਕਿ 4 ਸਕਾਈਅਰਜ਼ ਦਾ ਦੂਜਾ ਗਰੁੱਪ ਬਚ ਨਹੀਂ ਸਕਿਆ, ਮ੍ਰਿਤਕਾਂ ਦੀ ਉਮਰ 44 ਤੋਂ 53 ਸਾਲ ਸੀ। ਉਥੇ ਹੀ, 40 ਸਾਲਾ ਜ਼ਖਮੀ ਵਿਅਕਤੀ ਨੈਲਸਨ ਦਾ ਰਹਿਣ ਵਾਲਾ ਹੈ।