ਜ਼ਿਆਦਾਤਰ ਕੈਨੇਡੀਅਨਜ਼ ਦਾ ਮੰਨਣਾ ਹਾਊਸਿੰਗ ਸੰਕਟ ਲਈ ਇਮੀਗ੍ਰੇਸ਼ਨ ਜ਼ਿੰਮੇਵਾਰ : ਸਰਵੇ

ਕੈਨੇਡਾ ਵਿੱਚ ਹਾਊਸਿੰਗ ਸੰਕਟ ਲਈ ਬਹੁਤ ਸਾਰੇ ਕੈਨੇਡੀਅਨਜ਼ ਵਧੇਰੇ ਇਮੀਗ੍ਰੇਸ਼ਨ ਨੂੰ ਜ਼ਿੰਮੇਵਾਰ ਮੰਨਦੇ ਹਨ। ਇੱਕ ਨਵੇਂ ਸਰਵੇ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ , ਜਿਸ ਦਾ ਕਹਿਣਾ ਹੈ ਕਿ ਹੈਲਥ ਕੇਅਰ ਸਿਸਟਮ 'ਤੇ ਵੀ ਇਸ ਨਾਲ ਦਬਾਅ ਪੈ ਰਿਹਾ ਹੈ।

ਪੋਲਿੰਗ ਫਰਮ ਲੇਜਰ ਦਾ ਇਹ ਵੀ ਕਹਿਣਾ ਹੈ ਕਿ ਕੰਜ਼ਰਵੇਟਿਵ ਲਗਾਤਾਰ ਸੱਤਾਧਾਰੀ ਲਿਬਰਲਸ ਤੋਂ ਵੱਡੀ ਲੀਡ ਵਿੱਚ ਬਣੇ ਹੋਏ ਹਨ । ਸਰਵੇ ਰਿਪੋਰਟ ਮੁਤਾਬਕ 63 ਫੀਸਦੀ ਉੱਤਰਦਾਤਾ ਨੇ ਕਿਹਾ ਕਿ ਨਵੇਂ ਆਉਣ ਵਾਲੇ ਲੋਕਾਂ ਦੀ ਵਧੇਰੇ ਗਿਣਤੀ ਸਿੱਖਿਆ ਪ੍ਰਣਾਲੀਆਂ ਲਈ ਵੀ ਮੁਸ਼ਕਿਲ ਵਧਾ ਰਹੀ ਹੈ।

ਹਾਲਾਂਕਿ ਬਹੁਤ ਸਾਰੇ ਕੈਨੇਡੀਅਨਜ਼ ਮੰਨਦੇ ਹਨ ਕਿ ਹਾਈ ਇਮੀਗ੍ਰੇਸ਼ਨ ਨਾਲ ਉਨ੍ਹਾਂ ਨੂੰ ਕੁੱਝ ਲਾਭ ਹੋਏ ਹਨ। 63 ਫੀਸਦੀ ਨੇ ਕਿਹਾ ਕਿ ਨੌਜਵਾਨ ਪ੍ਰਵਾਸੀਆਂ ਦੇ ਆਉਣ ਨਾਲ ਵਰਕਫ਼ੋਰਸ ਅਤੇ ਟੈਕਸ ਬੇਸ ਵਿੱਚ ਵਾਧਾ ਹੋਇਆ ਹੈ ਜਿਸ ਨਾਲ ਪੁਰਾਣੀਆਂ ਪੀੜ੍ਹੀਆਂ ਨੂੰ ਸਪੋਰਟ ਮਿਲੀ ਹੈ।

ਲੇਜਰ ਨੇ ਇਹ ਸਰਵੇ ਲੰਘੇ ਸ਼ੁੱਕਰਵਾਰ ਤੋਂ ਐਤਵਾਰ ਤੱਕ ਆਨਲਾਈਨ ਕੀਤਾ ,ਜਿਸ ਵਿੱਚ 1,529 ਲੋਕ ਸ਼ਾਮਲ ਹੋਏ। ਗੌਰਤਲਬ ਹੈ ਕਿ ਕੈਨੇਡਾ ਵੱਲੋਂ 2024 ਅਤੇ 2025 ਵਿੱਚ ਕ੍ਰਮਵਾਰ 485,000 ਅਤੇ 500,000 ਪਰਮਾਨੈਂਟ ਰੈਜ਼ੀਡੈਂਸ ਦਾ ਸਵਾਗਤ ਕੀਤਾ ਜਾਵੇਗਾ।ਲੇਜਰ ਸਰਵੇ ਦੇ ਅੱਧੇ ਤੋਂ ਵੱਧ ਉੱਤਰਦਾਤਾ ਨੇ ਕਿਹਾ ਕਿ ਇਹ ਗਿਣਤੀ ਬਹੁਤ ਜ਼ਿਆਦਾ ਹੈ। ਜਦੋਂ ਕਿ 28 ਫੀਸਦੀ ਨੇ ਇਸ ਨੂੰ ਸਹੀ ਕਰਾਰ ਦਿੱਤਾ।