ਯੇਰੂਸ਼ਲਮ ਦੇ ਬੱਸ ਅੱਡੇ 'ਤੇ ਗੋਲੀਬਾਰੀ 'ਚ ਤਿੰਨ ਦੀ ਮੌਤ, ਕਈ ਜ਼ਖਮੀ

ਇਜ਼ਰਾਇਲ-ਹਮਾਸ ਵਿਚਕਾਰ ਅੱਜ 7ਵੇਂ ਦਿਨ ਲਈ ਵਧਾਈ ਗਈ ਜੰਗਬੰਦੀ ਵਿਚਕਾਰ ਵੀਰਵਾਰ ਸਵੇਰੇ ਯੇਰੂਸ਼ਲਮ ਦੇ ਬੱਸ ਅੱਡੇ 'ਤੇ ਦੋ ਫਲਸਤੀਨੀ ਬੰਦੂਕਧਾਰੀਆਂ ਨੇ ਗੋਲੀਬਾਰੀ ਕਰ ਦਿੱਤੀ, ਜਿਸ ਵਿੱਚ ਤਿੰਨ ਇਜ਼ਰਾਇਲੀ ਲੋਕ ਮਾਰੇ ਗਏ ਅਤੇ ਛੇ ਹੋਰ ਜ਼ਖਮੀ ਹੋ ਗਏ, ਇਨ੍ਹਾਂ ਵਿੱਚੋਂ ਦੋ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ।

ਪੁਲਿਸ ਮੁਤਾਬਕ ਸਵੇਰੇ ਕਰੀਬ 8 ਵਜੇ ਦੋ ਹਮਲਾਵਰਾਂ ਨੇ ਯੇਰੂਸ਼ਲਮ ਦੇ ਮੁੱਖ ਪ੍ਰਵੇਸ਼ ਦੁਆਰ ਦੇ ਬੱਸ ਅੱਡੇ 'ਤੇ ਮੌਜੂਦ ਲੋਕਾਂ 'ਤੇ ਗੋਲੀਆਂ ਚਲਾਈਆਂ। ਪੁਲਿਸ ਨੇ ਕਿਹਾ ਕਿ ਖੇਤਰ ਵਿੱਚ ਮੌਜੂਦਾ ਦੋ ਆਫ-ਡਿਊਟੀ ਸਿਪਾਹੀ ਅਤੇ ਇੱਕ ਹਥਿਆਰਬੰਦ ਨਾਗਰਿਕ ਵੱਲੋਂ ਜਵਾਬੀ ਕਾਰਵਾਈ ਵਿੱਚ ਦੋਵੇਂ ਹਮਲਾਵਰ ਮਾਰੇ ਗਏ।

ਦੋਵੇਂ ਹਮਲਾਵਰ ਹਮਾਸ ਗਰੁੱਪ ਦੇ ਮੈਂਬਰ ਸਨ ਅਤੇ ਭਰਾ ਸਨ। ਇਜ਼ਰਾਈਲ ਸੁਰੱਖਿਆ ਏਜੰਸੀ ਮੁਤਾਬਕ, 38 ਸਾਲਾ ਮੁਰਾਦ ਨੇਮਰ ਅਤੇ 30 ਸਾਲਾ ਇਬਰਾਹਿਮ ਨੇਮਰ ਪਹਿਲਾਂ ਅੱਤਵਾਦੀ ਗਤੀਵਿਧੀਆਂ ਵਿੱਚ ਜੇਲ੍ਹ ਜਾ ਚੁੱਕੇ ਸਨ।