ਪ੍ਰਧਾਨ ਮੰਤਰੀ ਮੋਦੀ ਦੇ ਪੰਜਾਬ ਦੌਰੇ ਦਾ ਅੱਜ ਦੂਜਾ ਦਿਨ, ਗੁਰਦਾਸਪੁਰ ਤੇ ਜਲੰਧਰ ’ਚ ਕੀਤੀ ਚੋਣ ਰੈਲੀ

ਪੰਜਾਬ ਦੌਰੇ ਦੇ ਦੂਜੇ ਦਿਨ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਗੁਰਦਾਸਪੁਰ ਅਤੇ ਜਲੰਧਰ ਵਿਚ ਚੋਣ ਰੈਲੀਆਂ ਨੂੰ ਸੰਬੋਧਨ ਕੀਤਾ। ਇਸ ਮੌਕੇ ਉਨ੍ਹਾਂ ਵਿਰੋਧੀ ਧਿਰਾਂ ਦੇ ਗਠਜੋੜ ਉੱਤੇ ਨਿਸ਼ਾਨੇ ਸਾਧੇ, ਪੀਐੱਮ ਮੋਦੀ ਨੇ ਕਿਹਾ ਕਿ ਪੰਜਾਬ ਨੂੰ ਸਭ ਤੋਂ ਵੱਧ ਜ਼ਖ਼ਮ ਇਸੇ ਇੰਡੀਆ ਗਠਜੋੜ ਨੇ ਦਿੱਤੇ, ਆਜ਼ਾਦੀ ਤੋਂ ਬਾਅਦ ਵੰਡ ਦਾ ਜ਼ਖ਼ਮ, ਸਵਾਰਥ ਦੇ ਚੱਲਦਿਆਂ ਅਸਥਿਰਤਾ ਦਾ ਜ਼ਖ਼ਮ, ਪੰਜਾਬ ਵਿਚ ਅਸ਼ਾਂਤੀ ਦਾ ਲੰਬਾ ਦੌਰ ਅਤੇ ਪੰਜਾਬ ਦੇ ਭਾਈਚਾਰੇ ’ਤੇ ਹਮਲਾ। ਉਨ੍ਹਾਂ ਇਲਜ਼ਾਮ ਲਗਾਇਆ ਕਿ ਕਾਂਗਰਸ ਨੇ ਸੰਨ 47 ਵਿਚ ਆਪਣੇ ਪਰਿਵਾਰ ਨੂੰ ਸੱਤਾ ਦਿਵਾਉਣ ਲਈ ਪੰਜਾਬ ਨੂੰ ਵੰਡ ਦਿੱਤਾ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਝਾੜੂ ਅਤੇ ਪੰਜੇ ਵਾਲੇ ਲੋਕਾਂ ਨੂੰ ਮੂਰਖ ਬਣਾ ਰਹੇ ਨੇ, ਇਹ ਦਿੱਲੀ ਵਿਚ ਇੱਕ ਦੂਜੇ ਲਈ ਵੋਟਾਂ ਮੰਗਦੇ ਹਨ ਅਤੇ ਪੰਜਾਬ ਵਿਚ ਇੱਕ ਦੂਜੇ ਨੂੰ ਗਾਲ੍ਹਾਂ ਕੱਢਦੇ ਹਨ। ਦੱਸ ਦੇਈਏ ਪੀਐੱਮ ਮੋਦੀ ਅੱਜ ਵੀ ਸਿਰ ’ਤੇ ਦਸਤਾਰ ਸਜਾਏ ਹੋਏ ਸਨ।