15.25C Vancouver 15.25C VancouverAug 27, 2020 3:40 PM -
ਕੰਜ਼ਰਵੇਟਿਵ ਪਾਰਟੀ ਵੱਲੋਂ ‘ਵੀ’ ਸੰਸਥਾ ਦੀ ਸਪੀਕਿੰਗ ਏਜੰਸੀ ਤੋਂ ਉਨ੍ਹਾਂ ਦਸਤਾਵੇਜ਼ਾਂ ਦੀ ਮੰਗ ਕੀਤੀ ਜਾ ਰਹੀ ਹੈ ਜਿਸ ਵਿੱਚ ਸੰਸਥਾ ਵੱਲੋਂ ਜਸਟਿਨ ਟਰੂਡੋ ਦੇ ਪਰਿਵਾਰ ਨੂੰ ਆਪਣੇ ਸਮਾਗਮਾਂ ਵਿੱਚ ਸ਼ਮੂਲੀਅਤ ਲਈ ਹਜ਼ਾਰਾਂ ਡਾਲਰ ਦੇ ਭੁਗਤਾਨ ਦਾ ਵੇਰਵਾ ਹਨ।
ਕੰਜ਼ਰਵੇਟਿਵ ਐੱਮ.ਪੀ. ਮਾਈਕਲ ਬੈਰੇਟ ਵੱਲੋਂ ‘ਸਪੀਕਰਜ਼ ਸਪੌਟਲਾਈਟ’ ਨੂੰ ਲਿਖੀ ਚਿੱਠੀ ਮੁਤਾਬਕ ਹਾਊਸ ਆਫ ਕਾਮਨਜ਼ ਐਥਿਕਸ ਕਮੇਟੀ ਵੱਲੋਂ ਏਜੇਂਸੀ ਤੋਂ ਇਨ੍ਹਾਂ ਦਸਤਾਵੇਜ਼ਾਂ ਨੂੰ ਪੇਸ਼ ਕਰਨ ਦੀ ਮੰਗ ਪਿਛਲੇ ਮਹੀਨੇ ਕੀਤੀ ਗਈ ਸੀ।
ਸਤੰਬਰ ਤੱਕ ਪਾਰਲੀਮੈਂਟ ‘ਪ੍ਰੋਰੋਗ’ ਕਰਨ ਦੇ ਪ੍ਰਧਾਨ ਮੰਤਰੀ ਦੇ ਐਲਾਨ ਤੋਂ ਪਹਿਲਾਂ ਏਜੰਸੀ ਨੇ ਇਸ ਸੰਬੰਧ ਵਿੱਚ ਹੋਰ ਸਮਾਂ ਮੰਗਿਆ ਸੀ ਪਰ ਫੇਰ ‘ਪ੍ਰੋਰੋਗ’ ਦੀ ਘੋਸ਼ਣਾ ਕਾਰਨ ‘ਵੀ’ ਮਾਮਲੇ ਵਿਚ ਚਾਰ ਕਮੇਟੀ ਜਾਂਚਾਂ ਰੱਦ ਕਰ ਦਿੱਤੀਆਂ ਗਈਆਂ ਸਨ।
ਬੈਰੇਟ ਮੁਤਾਬਕ ਕਮੇਟੀ ਨੇ ਭਰੋਸਾ ਕਰਕੇ ਮਿਆਦ ਵਧਾਉਣ ਦੀ ਮਨਜ਼ੂਰੀ ਦਿੱਤੀ ਅਤੇ ਪਾਰਲੀਮੈਂਟ 'ਪ੍ਰੋਰੋਗ' ਹੋਣ ਕਾਰਨ ਦਸਤਾਵੇਜ਼ ਜਾਰੀ ਕਰਨ ਵਿੱਚ ਰੁਕਾਵਟ ਨਹੀਂ ਪੈਣੀ ਚਾਹੀਦੀ।
'ਵੀ' ਸੰਸਥਾ ਵੱਲੋਂ ਟਰੂਡੋ ਦੀ ਮਾਂ ਅਤੇ ਭਰਾ ਨੂੰ ਤਕਰੀਬਨ $300,000 ਦਿੱਤੇ ਗਏ ਸਨ ਅਤੇ ਸਮਾਗਮਾਂ ਵਿੱਚ ਸ਼ਾਮਲ ਹੋਣ ਲਈ $200,000 ਦੇ ਖਰਚੇ ਦਾ ਭੁਗਤਾਨ ਵੀ ਕੀਤਾ ਗਿਆ ਸੀ।
ਟਰੂਡੋ ਦੀ ਪਤਨੀ ਦੇ ਖਰਚੇ ਵੀ ‘ਵੀ’ ਸੰਸਥਾ ਵੱਲੋਂ ਚੁੱਕੇ ਗਏ ਸਨ।
‘ਵੀ’ ਸੰਸਥਾ ਨੂੰ ਸਟੂਡੈਂਟ ਵੌਲੰਟੀਅਰ ਪ੍ਰੋਗਰਾਮ ਦੀ ਜ਼ਿਮੇਂਦਾਰੀ ਦੇਣ ਦੇ ਫੈਡਰਲ ਸਰਕਾਰ ਦੇ ਫੈਸਲੇ ਨਾਲ ਟਰੂਡੋ ਨੇ ‘ਕੌਨਫਲਿਕਟ ਆਫ ਇੰਟਰਸਟ ਐਕਟ’ ਦੀ ਉਲੰਘਣਾ ਕੀਤੀ ਜਾਂ ਨਹੀਂ ਇਸ ਸੰਬੰਧ ਵਿੱਚ ਫੈਡਰਲ ਐਥਿਕਸ ਕਮਿਸ਼ਨਰ ਦੀ ਜਾਂਚ ਕੀਤੀ ਜਾ ਰਹੀ ਹੈ।
