20.39C Vancouver 20.39C VancouverJul 17, 2020 5:22 PM -
ਅੱਜ ਹਾਊਸ ਔਫ਼ ਕੌਮਨਜ਼ ਦੀ ਇੱਕ ਹੋਰ ਕਮੇਟੀ ਵੱਲੋਂ ਇਹ ਫੈਸਲਾ ਲਿਆ ਜਾਵੇਗਾ ਕਿ ਉਹਨਾਂ ਵੱਲੋਂ 'ਵੀ ਚੈਰਿਟੀ' ਮਾਮਲੇ ਦੀ ਜਾਂਚ ਕੀਤੀ ਜਾਵੇਗੀ ਕਿ ਨਹੀਂ।
ਸਰਕਾਰ ਵੱਲੋਂ 'ਵੀ ਚੈਰਿਟੀ' ਨੂੰ $912 ਮਿਲੀਅਨ ਦੀ ਲਾਗਤ ਵਾਲੇ 'ਕੈਨੇਡਾ ਸਟੂਡੈਂਟ ਸਰਵਿਸ ਗ੍ਰਾਂਟ' ਪ੍ਰੋਗਰਾਮ ਦੇ ਪ੍ਰਬੰਧਨ ਲਈ $19.5 ਮਿਲੀਅਨ ਦਾ ਠੇਕਾ ਦਿੱਤਾ ਗਿਆ ਸੀ, ਜਿਸ ਨੂੰ ਬਾਅਦ ਵਿੱਚ ਰੱਦ ਕਰ ਦਿੱਤਾ ਗਿਆ।
ਕੌਮਨਜ਼ ਐਥਿਕਸ ਕਮੇਟੀ ਦੇ ਕੰਜ਼ਰਵੇਟਿਵ ਮੈਂਬਰਾਂ ਵੱਲੋਂ 'ਵੀ' ਦੇ ਸਮਾਗਮਾਂ 'ਤੇ ਜਸਟਿਨ ਟਰੂਡੋ, ਉਹਨਾਂ ਦੀ ਪਤਨੀ, ਮਾਂ ਅਤੇ ਭਰਾ ਵੱਲੋਂ ਦਿੱਤੇ ਗਏ ਸਾਰੇ ਭਾਸ਼ਨਾਂ ਦੇ ਰਿਕਾਰਡ ਜਨਤਕ ਕਰਨ ਦੀ ਮੰਗ ਕੀਤੀ ਜਾਣ ਦੀ ਸੰਭਾਵਨਾ ਹੈ।
'ਵੀ' ਦੇ ਮੁਤਾਬਕ ਜਸਟਿਨ ਟਰੂਡੋ ਦੀ ਮਾਂ, ਮਾਰਗਰੇਟ ਟਰੂਡੋ ਨੂੰ 2016-2020 ਦਰਮਿਆਨ ਉਹਨਾਂ ਦੇ ਭਾਸ਼ਨਾਂ ਲਈ ਭੁਗਤਾਨ ਕੀਤਾ ਗਿਆ ਪਰ ਜਸਟਿਨ ਟਰੂਡੋ ਨੂੰ ਕਦੇ ਵੀ ਕੋਈ ਭੁਗਤਾਨ ਨਹੀਂ ਹੋਇਆ।
ਕੱਲ ਕੌਮਨਜ਼ ਫ਼ਾਇਨੈਂਸ ਕਮੇਟੀ ਦੇ ਸਾਹਮਣੇ ਯੂਥ ਮਿਨਿਸਟਰ ਬਰਦੀਸ਼ ਚੱਗੜ ਨੇ ਦੱਸਿਆ ਕਿ ਇਸ ਪ੍ਰੋਗਰਾਮ ਲਈ 'ਵੀ' ਦੀ ਚੋਣ ਕਿਵੇਂ ਕੀਤੀ ਗਈ।
ਕਮੇਟੀ ਨੂੰ ਦੱਸਿਆ ਗਿਆ ਕਿ 'ਵੀ' ਵੱਲੋਂ ਸਰਕਾਰ ਨੂੰ ਕਿਸੇ ਹੋਰ ਪ੍ਰੋਗਰਾਮ ਲਈ ਇੱਕ ਪ੍ਰਸਤਾਵ ਪੇਸ਼ ਕੀਤਾ ਗਿਆ ਸੀ, ਜਿਸ ਵਿੱਚ ਬਾਅਦ ਵਿੱਚ ਤਰਮੀਮ ਕਰਕੇ, ਵਿਦਿਆਰਥੀਆਂ ਲਈ ਘੜੇ ਗਏ ਇਸ ਪ੍ਰੋਗਰਾਮ ਲਈ ਵਰਤਿਆ ਗਿਆ।
