ਟੋਰਾਂਟੋ ਦੇ ਵਿਅਕਤੀ ਨੇ ਅੱਤਵਾਦ ਫੰਡਿੰਗ ਯੋਜਨਾ ਦੇ ਸੰਬੰਧ ਵਿੱਚ ਕਬੂਲੇ ਦੋਸ਼

ਕੈਨੇਡੀਅਨ ਇਤਿਹਾਸ ਦੇ ਸਭ ਤੋਂ ਵੱਡੇ ਅੱਤਵਾਦ ਫਾਈਨਾਸਿੰਗ ਮਾਮਲੇ ਵਿਚ ਟੋਰੌਂਟੋ ਦੇ 36 ਸਾਲਾ ਖਲੀਲੁੱਲਾ ਯੂਸਫ਼ ਨੂੰ ਓਨਟਾਰੀਓ ਸੁਪੀਰੀਅਰ ਕੋਰਟ ਨੇ 12 ਸਾਲ ਦੀ ਸਜ਼ਾ ਸੁਣਾਈ ਹੈ।

ਯੂਸਫ਼ ਨੇ ਸਵੀਕਾਰ ਕੀਤਾ ਕਿ ਉਸ ਨੇ ਆਨਲਾਈਨ ਫੰਡ ਜੁਟਾਉਣ ਲਈ ਮੁਹਿੰਮਾਂ ਲੌਂਚ ਕੀਤੀਆਂ ਸਨ ਅਤੇ ਇਸਲਾਮਿਕ ਸਟੇਟ ਨੂੰ ਸਮਰਥਨ ਦੇਣ ਲਈ ਮਨੀ ਟ੍ਰਾਂਸਫਰ ਅਤੇ ਕ੍ਰਿਪਟੋਕਰੰਸੀ ਦੋਵਾਂ ਵਿਚ ਫੰਡ ਟ੍ਰਾਂਸਫਰ ਕੀਤੇ ਸਨ।

ਉਸ ਨੇ ਅਫਗਾਨਿਸਤਾਨ ਵਿਚ ਵਿਦੇਸ਼ੀ ਨਾਗਰਿਕਾਂ ਉਤੇ ਅੱਤਵਾਦੀ ਹਮਲਿਆਂ ਨੂੰ ਸਹੀ ਠਹਿਰਾਉਣ ਲਈ ਪ੍ਰਚਾਰ ਵੀ ਚਲਾਇਆ ਸੀ। ਆਰਸੀਐਮਪੀ ਮੁਤਾਬਕ, ਟੋਰੌਂਟੋ ਨਿਵਾਸੀ ਖਲੀਲੁੱਲਾ ਯੂਸਫ਼ ਨੇ ਸਤੰਬਰ 2019 ਤੋਂ ਦਸੰਬਰ 2022 ਵਿਚਕਾਰ ਕ੍ਰਿਪਟੋਕਰੰਸੀ ਅਤੇ ਮਨੀ ਟ੍ਰਾਂਸਫਰ ਜ਼ਰੀਏ ਵਿਦੇਸ਼ਾਂ ਵਿਚ ਅੱਤਵਾਦੀ ਸਰਗਰਮੀਆਂ ਨੂੰ ਫੰਡ ਪ੍ਰਦਾਨ ਕੀਤਾ ਸੀ।

ਆਰਸੀਐਮਪੀ ਨੇ ਇੱਕ ਰਿਲੀਜ਼ ਵਿਚ ਕਿਹਾ ਕਿ ਯੂਸਫ਼ ਨੇ ਅੱਤਵਾਦੀ ਸਰਗਰਮੀਆਂ ਵਿਚ ਹਿੱਸਾ ਲੈਣ ਦਾ ਵੀ ਦੋਸ਼ ਸਵੀਕਾਰ ਕੀਤਾ।