ਟੋਰਾਂਟੋ ਵਿਚ ਗ੍ਰਿਫਤਾਰ ਕੀਤੇ ਗਏ ਦਹਿਸ਼ਤਗਰਦੀ ਪਿਓ-ਪੁੱਤ ਦੇ ਮਾਮਲੇ ਵਿਚ ਜਾਂਚ ਸ਼ੁਰੂ

ਕੈਨੇਡਾ ਦੇ ਹਾਊਸ ਆਫ਼ ਕਾਮਨ ਦੀ ਨੈਸ਼ਨਲ ਸਕਿਓਰਟੀ ਕਮੇਟੀ ਨੇ ਟੋਰਾਂਟੋ ਵਿਚ ਗ੍ਰਿਫਤਾਰ ਕੀਤੇ ਗਏ ਦਹਿਸ਼ਤਗਰਦੀ ਪਿਓ-ਪੁੱਤ ਦੇ ਮਾਮਲੇ ਵਿਚ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਕਿ ਉਨ੍ਹਾਂ ਨੂੰ ਕੈਨੇਡਾ ਵਿਚ ਐਂਟਰੀ ਕਿਵੇਂ ਮਿਲੀ। ਇਸ ਸਬੰਧ ਵਿਚ ਕਮੇਟੀ ਸਾਹਮਣੇ ਅੱਜ ਜਨਤਕ ਸੁਰੱਖਿਆ ਮੰਤਰੀ ਡੋਮਿਨਿਕ ਲੇਬਲੈਂਕ ਅਤੇ ਹੋਰ ਸੀਨੀਅਰ ਸਰਕਾਰੀ ਅਧਿਕਾਰੀ ਪੇਸ਼ ਹੋਏ ਹਨ, ਉੱਥੇ ਹੀ ਇਮੀਗ੍ਰੇਸ਼ਨ ਮਿਨਿਸਟਰ ਮਾਰਕ ਮਿਲਰ ਦੇ ਕਮੇਟੀ ਸਾਹਮਣੇ ਬਾਅਦ ਦੀ ਤਰੀਕ ਵਿਚ ਪੇਸ਼ ਹੋਣ ਦੀ ਉਮੀਦ ਹੈ।

ਪੁਲਿਸ ਨੇ ਪਿਛਲੇ ਮਹੀਨੇ 62 ਸਾਲਾ ਅਹਿਮਦ ਫੂਆਦ ਮੁਸਤਫਾ ਏਲਦੀਦੀ ਅਤੇ ਉਸ ਦੇ 26 ਸਾਲਾ ਪੁੱਤ ਮੁਸਤਫਾ ਏਲਦੀਦੀ ਨੂੰ ਰਿਚਮੰਡ ਹਿੱਲ ਦੇ ਇੱਕ ਹੋਟਲ ਤੋਂ ਗ੍ਰਿਫਤਾਰ ਕੀਤਾ ਸੀ, ਇਹ ਦੋਵੇਂ ਟੋਰੌਂਟੋ ਵਿਚ ਆਈ.ਐੱਸ.ਆਈ.ਐੱਸ. ਲਈ ਹਮਲੇ ਦੀ ਸਾਜ਼ਿਸ਼ ਬਣਾ ਰਹੇ ਸਨ। 62 ਸਾਲਾ ਏਲਦੀਦੀ ਕੋਲ ਕੈਨੇਡੀਅਨ ਨਾਗਰਿਕਤਾ ਹੈ, ਜਦੋਂ ਕਿ 2015 ਵਿਚ ਉਸ ਦੇ ਕੈਨੇਡਾ ਵਿਚ ਆਉਣ ਤੋਂ ਪਹਿਲਾਂ ਉਸ ’ਤੇ ਵਿਦੇਸ਼ ਵਿਚ ਆਈ. ਐੱਸ. ਆਈ. ਐੱਸ. ਨਾਲ ਸਬੰਧਤ ਗੰਭੀਰ ਹਮਲੇ ਦਾ ਦੋਸ਼ ਸੀ।

ਕਮੇਟੀ ਜਾਣਨਾ ਚਾਹੁੰਦੀ ਹੈ ਕਿ ਮੁਲਜ਼ਮ ਸਕਿਓਰਿਟੀ ਸਕ੍ਰੀਨਿੰਗ ਤੋਂ ਕਿਵੇਂ ਬਚ ਨਿਕਲੇ। ਇਮੀਗ੍ਰੇਸ਼ਨ ਮਿਨਿਸਟਰ ਮਾਰਕ ਮਿਲਰ ਨੇ ਕਿਹਾ ਸੀ ਕਿ ਸਰਕਾਰ ਇਸ ਗੱਲ ਦਾ ਵਿਚਾਰ ਕਰ ਰਹੀ ਹੈ ਕਿ ਏਲਦੀਦੀ ਦੀ ਕੈਨੇਡਾ ਦੀ ਨਾਗਰਿਕਤਾ ਰੱਦ ਕੀਤੀ ਜਾ ਸਕਦੀ ਹੈ ਜਾਂ ਨਹੀਂ। ਮਿਲਰ ਨੇ ਇਸ ਦੇ ਰਿਵਿਊ ਦੀ ਜ਼ਿੰਮੇਵਾਰੀ ਡਿਪਟੀ ਮਨਿਸਟਰ ਨੂੰ ਸੌਂਪੀ ਹੈ।