ਬੀ. ਸੀ. ਦੇ ਕੂਟੇਨੇ ਖੇਤਰ ਵਿਚ ਰੇਲਗੱਡੀ ਦੇ ਕਈ ਡੱਬੇ ਪਟੜੀ ਤੋਂ ਉਤਰੇ

ਬੀ. ਸੀ. ਦੇ ਕੂਟੇਨੇ ਖੇਤਰ ਵਿਚ ਐਲਬਰਟਾ ਸੀਮਾ ਦੇ ਨੇੜੇ ਮੰਗਲਵਾਰ ਰਾਤ ਇੱਕ ਰੇਲਗੱਡੀ ਦੇ ਕਈ ਡੱਬੇ ਪਟੜੀ ਤੋਂ ਉਤਰ ਗਏ। ਇਸ ਘਟਨਾ ਦੀ ਜਾਂਚ ਫੈਡਰਲ ਜਾਂਚਕਰਤਾਵਾਂ ਵਲੋਂ ਕੀਤੀ ਜਾ ਰਹੀ ਹੈ। ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਐਲਕੋ ਟਾਊਨ ਨੇੜੇ ਹੋਈ ਇਸ ਘਟਨਾ ਦੀ ਇਨਵੈਸਟੀਗੇਸ਼ਨ ਲਈ ਇੱਕ ਟੀਮ ਤਾਇਨਾਤ ਕੀਤੀ ਗਈ ਹੈ, ਜੋ ਇਹ ਜਾਣਕਾਰੀ ਇਕੱਠਾ ਕਰਨਗੇ ਕਿ ਡੱਬੇ ਪਟੜੀ ਤੋਂ ਉਤਰਨ ਦਾ ਕਾਰਨ ਕੀ ਸੀ।

ਰੇਲ ਆਪਰੇਟਰ ਕੈਨੇਡੀਅਨ ਪੈਸੀਫਿਕ ਕੈਨਸਸ ਸਿਟੀ ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ ਦੁਰਘਟਨਾ ਵਿਚ ਸ਼ਾਮਲ 12 ਡੱਬੇ ਖਾਲੀ ਸਨ ਅਤੇ ਇਨ੍ਹਾਂ ਦੇ ਪਟੜੀ ਤੋਂ ਉਤਰਨ ਕਾਰਨ ਕੋਈ ਜ਼ਖ਼ਮੀ ਨਹੀਂ ਹੋਇਆ।

ਉਨ੍ਹਾਂ ਦੱਸਿਆ ਕਿ ਕੰਪਨੀ ਦੇ ਕਰਮਚਾਰੀਆਂ ਨੇ ਕੱਲ੍ਹ ਰਾਤ ਹੀ ਘਟਨਾ ਸਥਾਨ ਤੋਂ ਡੱਬੇ ਹਟਾ ਦਿੱਤੇ ਸਨ ਅਤੇ ਰੇਲ ਲਾਈਨ ਦੁਬਾਰਾ ਖੋਲ੍ਹ ਦਿੱਤੀ ਗਈ ਸੀ। ਗੌਰਤਲਬ ਹੈ ਕਿ ਬੀ. ਸੀ. ਦਾ ਐਲਕੋ ਟਾਊਨ ਕੈਲਗਰੀ ਤੋਂ ਲਗਭਗ 330 ਕਿਲੋਮੀਟਰ ਦੱਖਣ-ਪੱਛਮ ਵਿਚ ਹੈ।