14.37C Vancouver 14.37C VancouverMar 19, 2021 3:33 PM -
ਚੀਨ ਦੀ ਅਦਾਲਤ ਵਿੱਚ ਕਨੇਡੀਅਨ ਮਾਈਕਲ ਸਪਾਵੋਰ ਦੀ ਪਹਿਲੀ ਅਦਾਲਤੀ ਸੁਣਵਾਈ ਅੱਜ, ਸ਼ੁਕਰਵਾਰ ਨੂੰ ਦੋ ਘੰਟੇ ਚੱਲੀ।
ਇਸ ਬੰਦ ਦਰਵਾਜ਼ਾ ਸੁਣਵਾਈ ਦੌਰਾਨ ਅਦਾਲਤ ਵੱਲੋਂ ਕੋਈ ਵੀ ਫ਼ੈਸਲਾ ਨਹੀਂ ਸੁਣਾਇਆ ਗਿਆ।
ਕੈਨੇਡਾ ਦੇ ਕਾਊਂਸਲਰ ਅਧਿਕਾਰੀਆਂ ਨੂੰ ਵੀ ਇਸ ਕਾਰਵਾਈ ਵਿਚ ਸ਼ਮੂਲੀਅਤ ਕਰਨ ਦੀ ਇਜਾਜ਼ਤ ਨਹੀਂ ਸੀ।
ਅਮਰੀਕਾ ਬ੍ਰਿਟੇਨ ਅਤੇ ਆਸਟ੍ਰੇਲੀਆ ਸਮੇਤ 8 ਦੇਸ਼ਾਂ ਦੇ 10 ਡਿਪਲੋਮੈਟ ਮਾਈਕਲ ਸਪਾਵੋਰ ਅਤੇ ਮਾਈਕਲ ਕੋਵਰਿਗ ਦੀ ਰਿਹਾਈ ਲਈ ਚੀਨ ਵਿੱਚ ਡੈਨਡੌਂਗ ਵਿਖੇ ਅਦਾਲਤ ਦੇ ਸਾਹਮਣੇ ਖੜ੍ਹੇ ਕੈਨੇਡਾ ਨੂੰ ਸਹਿਯੋਗ ਦਿੰਦੇ ਨਜ਼ਰ ਆਏ।
ਚੀਨ ਵਿੱਚ ਕਨੇਡੀਅਨ ਐਮਬੈਸੀ ਦੇ ਡਿਪਟੀ ਚੀਫ ਆਫ ਮਿਸ਼ਨ, ਜਿੰਮ ਨਿਕਲ ਨੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ ਕਿ ਅਮਰੀਕਾ ਵੱਲੋਂ ਦੋਵਾਂ ਮਾਈਕਲਾਂ ਦੀ ਰਿਹਾਈ ਲਈ ਪ੍ਰਦਾਨ ਕੀਤੇ ਜਾ ਰਹੇ ਸਹਿਯੋਗ ਲਈ ਕੈਨੇਡਾ ਧੰਨਵਾਦੀ ਹੈ।
ਸਪਾਵੋਰ ਅਤੇ ਕੋਵਰਿਗ ਦਸੰਬਰ 2018 ਤੋਂ ਚੀਨ ਦੀ ਹਿਰਾਸਤ ਵਿਚ ਹਨ ਅਤੇ ਇਹ ਮੰਨਿਆ ਜਾਂਦਾ ਹੈ ਕਿ ਇਨ੍ਹਾਂ ਦੋਵਾਂ ਨੂੰ ਅਮਰੀਕਾ ਦੇ ਕਹਿਣ ’ਤੇ ਵੈਨਕੂਵਰ ਵਿੱਚ ਹੋਈ ਵੁਆਵੇ ਦੀ ਉੱਚ ਅਧਿਕਾਰੀ ਮੰਗ ਵੈਨਜੋ ਦੀ ਗ੍ਰਿਫ਼ਤਾਰੀ ਦੇ ਬਦਲੇ ਕੈਦ ਕੀਤਾ ਗਿਆ ਹੈ।
ਸਾਬਕਾ ਕਨੇਡੀਅਨ ਡਿਪਲੋਮੈਟ ਮਾਈਕਲ ਕੋਵਰਿਗ ਦੀ ਅਦਾਲਤੀ ਕਾਰਵਾਈ ਸੋਮਵਾਰ ਨੂੰ ਸ਼ੁਰੂ ਹੋਣ ਦਾ ਅੰਦਾਜ਼ਾ ਹੈ।
